💘 അരികത്തായാരോ – 7 💘 വിച്ചു [ ചെകുത്താനെ സ്നേഹിച്ച മാലാഖ ] 1836

കഴുത്ത് തിരിക്കുന്നതിനിടയിൽ യദുവിന്റെ നോട്ടം ദേവിക ഇരിക്കുന്ന ബഞ്ചിലേയ്ക്ക് കൂടി പോയി …. ദേവിക ഇരുന്ന് തകൃതിയായി നോട്ട് എഴുതുകയാണ് പക്ഷെ അഹാനയാകട്ടെ താടിയിൽ കയ്യും കൊടുത്ത് താനിരിക്കുന്ന ബഞ്ചിലേയ്ക്ക് തന്നെ നോക്കി ഇരിക്കുകയാണ് , സ്വപ്നം കണ്ടിരിക്കുന്ന പോലെ .

യദു പതിയെ അവളാരെയാണ് നോക്കി ഇരിക്കുന്നതെന്നറിയാനുള്ള ആകാംഷയിൽ അവൾ നോക്കുന്ന ഭാഗത്തേയ്ക്ക് നോക്കി . പക്ഷെ അവന് അധികം കഷ്ടപ്പെടേണ്ടി വന്നില്ല തന്റെ അടുത്തിരുന്ന് നോട്ടെഴുതിയെടുക്കുന്ന അജുവിനെയാണ് അവൾ നോക്കി ഇരിക്കുന്നതെന്ന് മനസ്സിലാക്കാൻ …. താൻ സ്വപ്നം കാണുകയാണോ എന്ന് കരുതി യദു തന്റെ കണ്ണൊക്കെ ഒന്ന് തിരുമ്മിയ ശേഷം വീണ്ടും നോക്കി , അവന് മനസ്സിലായി അത് സ്വപ്നമല്ല യാഥാർത്ഥ്യമാണെന്ന് .

പെട്ടെന്ന് , യദു തന്നെ ശ്രദ്ധിക്കുന്നു എന്ന് തോന്നിയതും അഹാന തിരിഞ്ഞിരുന്ന് നോട്ടെഴുതി എടുക്കാൻ തുടങ്ങി . യദു അൽപ്പനേരം അവളെ തന്നെ നോക്കി ഇരുന്നു അവൾ തിരിഞ്ഞ് നോക്കുന്നുണ്ടോ എന്നറിയാൻ , പക്ഷെ അവൾ തിരിഞ്ഞ് നോക്കുന്നില്ല , എന്നും ക്ലാസ്സിൽ ഇരിക്കുന്ന പോലെ ക്ലാസ്സിൽ തന്നെ ശ്രദ്ധ കൊടുത്തിരിക്കുകയാണ് …

” എവിടെയോ എന്തോ സ്പെല്ലിംഗ് മിസ്റ്റേക്കുണ്ടല്ലോ ? ”

” എവിടെ …. ? ”

യദു പറഞ്ഞത് കേട്ട് അജു താനെഴുതിയ നോട്ടിലേയ്ക്ക് നോട്ടം പായിച്ചു …

” ശ്ശോ … എടാ നീ എഴുതിയ നോട്ടിൽ സ്പെല്ലിംഗ് മിസ്റ്റേക്കുണ്ടെന്നല്ല ഞാൻ പറഞ്ഞത് …. ”

” പിന്നെ .. ? ”

അജു അവനോട് ചോദിച്ചു.