✮കൽക്കി࿐ (ഭാഗം – 9) വിച്ചു [ ചെകുത്താനെ സ്നേഹിച്ച മാലാഖ ] 831

ആദി അത്രയും പറഞ്ഞു കൊണ്ട് ജബ്ബാറിന്റെ തല പുറകിലേക്ക് പിടിച്ച് അവന്റെ കഴുത്തിൽ കറ്റാന വച്ചു …. അയാളാകട്ടെ ഒന്നും ചെയ്യാൻ കഴിയാതെ ദീർഘമായി ശ്വാസമെടുത്തു കൊണ്ട് ഭയത്തോടെ കണ്ണുകൾ മുറുക്കി അടച്ചു , തന്റെ മരണത്തെ ഏറ്റുവാങ്ങനായി ….

                      ********************

” ശ്ശെ ….. ഇവന്മാര് ഇതെവിടെപ്പോയി കിടക്കുവാ ….. നേരത്തെ വിളിച്ച് ആ ആന്റണിയെപ്പൊക്കി എന്നു പറഞ്ഞു …..
ഇപ്പൊ വിളിച്ചപ്പൊ ഫോൺ സ്വിച്ച് ഓഫും …. ഈ മൂന്നെണ്ണവും കൂടി ഫോൺ ഓഫ് ചെയ്ത് വച്ചിട്ട് ഇതെന്തെടുക്കുവാ …. ?അവനെപ്പറ്റി എന്തെങ്കിലും അയാൾ പറഞ്ഞോ എന്നറിയാതെ ഒരു സമാധാനവും കിട്ടില്ല ….. ”

തന്റെ ഫോൺ സെറ്റിയിലേക്ക് വലിച്ചെറിഞ്ഞ ശേഷം അവിനാഷ് ടെൻഷനോടെ അങ്ങോട്ടുമിങ്ങോട്ടും നടന്നു ….

” അയാളെ എവിടേക്ക് മാറ്റിയെന്നാ ജബ്ബാറ് പറഞ്ഞത് ? ”

ജെറി അവനോട് ചോദിച്ചു …

” അവന്മാരുടെ കോളനിക്ക് പുറകിൽ ഒരു ഒഴിഞ്ഞ കെട്ടിടമില്ലേ അവിടേയ്ക്ക് …. അവിടെയാകുമ്പോൾ അവരെ പേടിച്ച് ആരും അങ്ങോട്ട് അടുക്കില്ല , സെയിഫാ ….. ”

അവിനാഷ് മറുപടി പറഞ്ഞതും ജെറി ഒരു നിമിഷം ഒന്ന് ആലോചിച്ചിരുന്നു ….

” നീ ആരെയെങ്കിലും വിളിച്ച് അവിടെപ്പോയി ഒന്ന് നോക്കാൻ പറ ….. ”

ജെറി ഉടനെ പറഞ്ഞു .

” എന്താടാ ? എന്താ കാര്യം ? ”