✮കൽക്കി࿐ (ഭാഗം – 31) വിച്ചു [ചെകുത്താനെ സ്നേഹിച്ച മാലാഖ ] 319

” ഹ …. ഹ …. ”

” എന്താ ? ”

അവന്റെ ചിരി കേട്ട് അവൾ ഗൗരവത്തോടെ ചോദിച്ചതും …..

” അല്ല , ദേഷ്യപ്പെടുമ്പോൾ തന്നെ കാണാൻ ഒരു വല്ലാത്ത ചന്തമാ …. ”

അവനൊരു പുഞ്ചിരിയോടെ പറഞ്ഞതും , പെട്ടെന്ന് അവൾ തന്റെ കയ്യിലിരുന്ന ഒരു ചെറിയ മരക്കമ്പ് അവന്റെ കഴുത്തിൽ വച്ചു കൊണ്ട് അവനെ ഒരു മരത്തോട് ചേർത്ത് നിർത്തി ….

” ചിരിക്കാതെ സത്യം പറ .. ഇല്ലെങ്കിൽ നിങ്ങളുടെ മരണം എന്റെ കൈ കൊണ്ടായിരിക്കും …. ”

അവളുടെ കണ്ണുകളിലെ അപ്പോഴത്തെ തിളക്കവും ശൗര്യവും അവനെ വല്ലാതെ ആകർഷിച്ചു , തന്റെ ഒരു കൈ കൊണ്ട് അവളെ നിഷ്പ്രയാസം കീഴടക്കാമെങ്കിലും അവൻ ആ സമയം അവൾക്ക് മുന്നിൽ ഭയന്നതു പോലെയാണ് അഭിനിയിച്ചത് …..

” അയ്യോ … ന്നെ ഒന്നും ചെയ്യല്ലേ …. ഞാൻ …… ഞാൻ പറയാം . ഞാൻ ചോഴനാട്ടുകാരനാ , അവിടുത്തെ ഒരു വൈദ്യനാ … രാജമാതാവ് അസുഖം ബാധിച്ച് കിടപ്പിലാ , അവരുടെ രോഗം ഭേദമാക്കാൻ കഴിവുള്ള ഒരു ഒറ്റ മൂലി ഈ വനത്തിൽ ഉണ്ടെന്ന് ഒരു താളിയോലയിൽ നിന്ന് വായിച്ചറിഞ്ഞു , ഞാൻ ….. അങ്ങനെ … അതന്വേഷിച്ച് വന്നതാ ഇവിടേയ്ക്ക് …. ”

ആത്രേയൻ ഭയന്ന് വിറച്ചത് പോലെ അഭിനിയിച്ചു കൊണ്ട് ഒരു നുണ പറഞ്ഞു . അത് കേട്ടതും അവൾ അവന്റെ കണ്ണുകളിലേക്ക് സൂക്ഷിച്ച് നോക്കി ഒരു തരം രൗദ്രതയോടെ …

” നുണ … നിങ്ങളെ കണ്ടിട്ട് ഒരു വൈദ്യനെന്നു തോന്നുന്നില്ല …. മാത്രമല്ല ആ വാൾ അതിലുള്ളത് രാജമുദ്രയാണ് , പിന്നെ കൃത്യമായി ലക്ഷ്യസ്ഥാനത്തേയ്ക്ക് വാളെറിയാൻ കഴിയുന്ന ഒരു വൈദ്യനോ …. ? ഇല്ല നിങ്ങൾ പറഞ്ഞത് മുഴുവൻ കള്ളമാണ് ….. ”

ദേഷ്യത്തോടെ ശബ്ദമുയർത്തിക്കൊണ്ട് അവൾ അവന്റെ ഇടത് കൈ പെട്ടെന്ന് പിടിച്ച് തിരിച്ചു …

” ആ ….. ആ …… ”

വേദന കൊണ്ട് അവൻ ഉറക്കെ വിളിച്ചപ്പോഴാണ് ചെന്നായ കടിച്ച് പരിക്കേൽപ്പിച്ച ആ കൈയ്യാണ് താൻ പിടിച്ച് തിരിച്ചതെന്ന് അവൾക്ക് മനസ്സിലായത് . അവന്റെ നിലവിളി കേട്ട് അവൾ ഒരു ഞെട്ടലോടെ അവന്റെ കയ്യിലെ പിടിത്തം വിട്ടു . നോക്കുമ്പോൾ തന്റെ കയ്യിലും രക്തമാണ് , മുറിവിൽ ചുറ്റിക്കെട്ടിയ തുണിയിൽക്കൂടി രക്തം അപ്പോഴും തുള്ളികളായി നിലത്തേയ്ക്ക് ഇറ്റ് വീഴുന്നുണ്ടായിരുന്നു ….

” സ് ….. സ് …… ആ ….. സത്യം , ഈ വാൾ രാജാവ് തന്നതാണ് സ്വയരക്ഷയ്ക്കായി …. പിന്നെ … പിന്നെ കുറച്ച് കാലം ഞാൻ ആയുധവിദ്യ അഭ്യസിച്ചിരുന്നു , അല്ലാതെ നിങ്ങൾ കരുതുന്നതു പോലെ ഞാൻ നുണ പറഞ്ഞതല്ല …. ”

വേദന കാരണം ഇടത് കൈ തന്റെ നെഞ്ചോട് ചേർത്ത് പിടിച്ചു കൊണ്ട് അവൻ പറഞ്ഞു .

” അയ്യോ …. ക്ഷമിക്കണം … ഞാൻ …. ഞാൻ കണ്ടില്ല ….. പെട്ടെന്ന് ….. ഓർക്കാതെ … അപ്പോഴത്തെ ദേഷ്യത്തിൽ … എന്നെ രക്ഷിക്കാൻ വേണ്ടിയല്ലേ ഈ മുറിവ് പോലും അതു കൂടി ഓർക്കാതെ ഞാൻ ……. ”

അത്രയും പറഞ്ഞപ്പോഴേക്കും അവളുടെ കണ്ണുകൾ നിറഞ്ഞിരുന്നു …

” ഞാൻ …. ഞാനിപ്പോ മുറിവിനുള്ള മരുന്ന് കൊണ്ട് വരാം ….. ”

അവൾ സങ്കടത്തോടെ പറഞ്ഞതും …..

” ഏയ് അത് സാരമില്ല , മരുന്നൊക്കെ ഞാൻ വയ്ച്ചോളാം . എനിക്കറിയാം മുറിവ് പെട്ടെന്ന് ഉണങ്ങാനുള്ള മരുന്ന് ഏതാണെന്ന് ? ”

ആത്രേയൻ ഉടനെ പറഞ്ഞു …