✮കൽക്കി࿐ (ഭാഗം – 31) വിച്ചു [ചെകുത്താനെ സ്നേഹിച്ച മാലാഖ ] 319

” വേണീ എന്തിനാ നീ വിഷമിക്കുന്നേ …. നീ ഒറ്റയ്ക്കല്ലേ അന്നും ഇന്നും ഇനി എന്നും … നീ ഒരു നാഗകന്യകയാ , നാഗമാണിക്യം സംരക്ഷിക്കേണ്ടവൾ . ശ്ശേ അതിന് മുൻപ് കണ്ണും നിറഞ്ഞ് . ”

ഒരു ചിരിയോടെ സ്വയം പറഞ്ഞു കൊണ്ട് അവൾ തന്റെ കണ്ണുകൾ തുടയ്ച്ചു .

” എന്നാലും വേദ പറഞ്ഞതിൽ എന്തെങ്കിലും കാര്യമുണ്ടാവുമോ ? ഈ ദിവസം ഇഷ്ട പുരുഷനെ മനസ്സിലോർത്ത് ചന്ദ്രനെ നോക്കിയിരുന്നാൽ അയാളുമൊത്ത് ജീവിക്കാൻ കഴിയും എന്നത് സത്യമാ … പക്ഷെ എന്റെ കാര്യത്തിൽ അതൊരിക്കലും നടക്കില്ല , അങ്ങനെ ഒരാൾ ഇല്ല എന്നത് മറ്റൊരു സത്യം … എന്നാലും വെറുതെ ഒന്ന് ശ്രമിച്ച് നോക്കിയാലോ , സ്വപ്നം കാണുന്നതിൽ തെറ്റില്ലല്ലോ .. ”

അവൾ ചെറു ചിരിയോടെ അതും മനസ്സിൽ ചിന്തിച്ചു കൊണ്ട് വെറുതെ കണ്ണുകൾ മുറുക്കെയടച്ചു അരുടെയെങ്കിലും മുഖം തെളിഞ്ഞു വരുമോ എന്നറിയാനായി …..

” പെട്ടെന്ന് അവളുടെ കണ്ണുകളിൽ തെളിഞ്ഞത് ആ രൂപമായിരുന്നു , തന്നെ ആക്രമിക്കാൻ വന്ന ചെന്നായയെ സ്വയം നേരിട്ട ആ യുവാവിന്റെ രൂപം , അവന്റെ പരിക്കേറ്റ ആ കൈയ്യിലൂടെ ഒഴുകിയിറങ്ങിയ രക്തത്തിന്റെ ദൃശ്യം …. ”

ഒരു ഞെട്ടലോടെ ഭയത്തോടെ അവൾ പെട്ടെന്ന് കണ്ണുകൾ തുറന്നു , മുന്നിൽ കണ്ടതാകട്ടെ ആ പൂർണ്ണ ചന്ദ്രനെയും ….

” അത് …. പാടില്ല . അയാൾ വെറുമൊരു മനുഷ്യനാണ് . ഇല്ല ….. അങ്ങനെ ചിന്തിച്ച് കൂടാ … ഓരോ പൊട്ടത്തരങ്ങൾ കാണിച്ച് തരുന്ന എന്റെ പൊട്ടമനസ്സ് …. ”

അവൾ അതും ചിന്തിച്ച് വെറുതെ വീണ്ടും മുഖമുയർത്തി നോക്കി ആ ചന്ദ്രനെ . പക്ഷെ അവളുടെ മനസ്സിൽ ആ സമയം മുഴുവൻ തെളിഞ്ഞ് വന്നത് അവന്റെ രൂപമായിരുന്നു . വേദന കൊണ്ട് അവൻ നിലവിളിച്ചതും , നീറ്റലുള്ള മരുന്ന് പുരട്ടിയിട്ടും ഒരു പുഞ്ചിരിയോടെ അവൻ തന്നെ നോക്കിയിരുന്നതുമെല്ലാം …

അവൾക്ക് തന്റെ ശ്വാസഗതി വർദ്ധിക്കുന്നത് പോലെ തോന്നി , ഒരു തരം അസ്വസ്ഥത …

” ഇനിയും ഇവിടെയിരുന്നാൽ ശരിയാവില്ല … ഞാൻ ഒരു നാഗകന്യകയാ , നാഗമാണിക്യം സംരക്ഷിക്കാൻ പിറന്നവൾ , എന്റെ മനസ്സിൽ ഒരു പുരുഷനും സ്ഥാനമില്ല … പക്ഷെ അയാളെ കണ്ടത് മുതൽ ഇത് വരെ ഇല്ലാതെ എന്റെ മനസ്സ് പിടിവിട്ട് പോകാൻ എന്താ കാരണം ? അറിയില്ല . അയാളെ കുറിച്ച് ഓർത്തു കൂടാ …. ”

അവൾ ഒരു തരം ഭ്രാന്തതയോടെ സ്വയം പറഞ്ഞു കൊണ്ട് അവിടെ നിന്നെണീറ്റ് നടന്നു …..

………..

രാത്രിയുടെ ഏതോ യാമത്തിൽ ….

മയക്കത്തിലായിരുന്ന ശേഷവേണിയുടെ കണ്ണുകളിലേക്ക് എത്തിയത് ഭയപ്പെടുത്തുന്ന ഒരു സ്വപ്നമായിരുന്നു …..

‘ താൻ രാവിലെ കണ്ട ആ മുഖം . പക്ഷെ ശാന്തനായ പുഞ്ചിരി നിറഞ്ഞ ആ മുഖത്തിപ്പോൾ ആരെയും ഭയപ്പെടുത്തുന്ന കലിയുടെ ഉഗ്രരൂപം പൂണ്ടത് പോലെ …. മുഖത്തിലൂടെ അലങ്കോലമായ ചിതറിക്കിടക്കുന്ന അവന്റെ മുടിയിഴകളിലും മുഖത്തും രക്തത്തുള്ളികൾ പറ്റിപ്പിടിച്ചിരിക്കുകയാണ് . അതിനൊപ്പം അവന്റെ കണ്ണുകളിലൂടെ ഒഴുകിയിറങ്ങുന്ന ചുട് കണ്ണുനീരും , മുഖത്തെ രക്തക്കറ ആ കണ്ണുനീരിന് പോലും രക്തവർണ്ണം നൽകിയിരിക്കുന്നു . വാവിട്ട് കരയുന്ന അവന്റെ മടിയിൽ ആരോ ചലനമറ്റ് കിടക്കുന്നുണ്ട് , പതിയെ ആ മുഖം സ്വപ്നത്തിൽ അവൾക്ക് വ്യക്തമായി . അതെ അത് താൻ തന്നെയാണ് ….. ‘

പെട്ടെന്ന് ഒരു ഞെട്ടലോടെ ശേഷവേണി സ്വപ്നത്തിൽ നിന്നുണർന്നു , അവൾ വല്ലാതെ കിതയ്ക്കുന്നുണ്ടായിരുന്നു ആ സമയം . ഒപ്പം ശരീരമാസകലം വിയർത്ത് കുളിച്ച അവസ്ഥയും ….

” വേണി … എന്താ ….. എന്താ പറ്റിയേ …. ”

തൊട്ടടുത്ത് കിടന്ന വേദ ഞരക്കം കേട്ട് ഞെട്ടിയുണർന്ന് നോക്കിയതും പേടിച്ച് സ്തംഭിച്ചിരിക്കുന്ന വേണിയെയാണ് കണ്ടത് …..

” വേണി … എന്താടി പ്രശ്നം ..? ”

അവളെ കുലുക്കി വിളിച്ചു കൊണ്ട് വേദ വീണ്ടും ചോദിച്ചു .

” ടീ …. ഞാൻ …. ഞാനൊരു സ്വപ്നം കണ്ടു …. ! ”

” എന്ത് സ്വപ്നം ….. ? ”

വേദയുടെ ആ ചോദ്യത്തിന് വേണി എല്ലാം അവളോട് തുറന്ന് പറഞ്ഞു . രാവിലെ നടന്നതും രാത്രി ചന്ദ്രനെ നോക്കിയപ്പോൾ സംഭവിച്ചതും പിന്നെ ഇപ്പൊ കണ്ട സ്പനവുമെല്ലാം .

” വേണീ .. നീ പറയുന്നത് ….. ”

വേദ അത്രയും പറഞ്ഞ ശേഷം ഒരു ഞെട്ടലോടെ അവളെ നോക്കി ….

” വേണീ … ഇത് ഒരു കാരണവശാലം നിന്റെ ഏട്ടൻ അറിയരുത് …. നിങ്ങൾ രണ്ട് അമ്മമാരുടെ മക്കളാണെങ്കിലും നിന്റെ ചേട്ടൻ ഒരു അനുജത്തിക്ക് കൊടുക്കുതിനേക്കാൾ ഉപരി സ്നേഹവും വാത്സല്യവും തന്നാ നിന്നെ നോക്കുന്നത് . അയാൾ ഇതറിഞ്ഞാൽ ……

നിനക്ക് ഓർമ്മയില്ലേ അയാളുടെ കാര്യങ്ങൾ . വഴി തെറ്റി വനത്തിൽ അകപ്പെട്ട ആ പെൺകുട്ടിയെ അപകടത്തിൽ നിന്ന് രക്ഷിച്ചതും ഒടുവിൽ അവളെ വനത്തിന് പുറത്തെത്തിച്ച് സുരക്ഷിതമായി തിരിച്ചയച്ചതും . ഇന്നും നിന്റെ ചേട്ടൻ ആ പെൺകുട്ടിയെ നെഞ്ചിലേറ്റിയാ നടക്കുന്നേ , അത് നിന്നോട് മാത്രമായി നിന്റെ ഏട്ടൻ പറഞ്ഞിട്ടുള്ളതുമല്ലേ , പലവട്ടം . ആ പെൺകുട്ടി ഒരു നാഗവംശജയല്ല മറിച്ച് പുറം ലോകത്തെ രാജവംശമാണെന്ന ഒറ്റക്കാരണത്താലല്ലേ ആ ഇഷ്ടം അയാൾ ഇന്നും മനസ്സിൽ തന്നെ സൂക്ഷിക്കുന്നത് . ആ ഏട്ടന്റെ കുഞ്ഞ് പെങ്ങൾ ഒരു സാധാരണ മനുഷ്യനെ നെഞ്ചിലേറ്റി എന്നറിഞ്ഞാൽ പിന്നെ എന്താ സംഭവിക്കുക , അതും നാഗ മാണിക്യം സംരക്ഷിക്കുക എന്ന ചുമതല കൂടി നിന്റെ മേലുള്ളപ്പോൾ . എല്ലാവരെയും പോലെ നിന്റെ ചേട്ടനും അചാരവും വിശ്വാസങ്ങളുമാ ഏറ്റുവും വലുത് , അതിന് വേണ്ടി ആരെയും കൊല്ലാനും സ്വയം ചാവാനും അയാൾക്ക് മടിയില്ല . അതുകൊണ്ട് ഈ കാര്യങ്ങൾ മറ്റാരുമറിയരുത് , നിന്റെ ഏട്ടനോട് നീ പറയുകയേ ചെയ്യരുത് … അയാൾ എന്തായാലും മരുന്നുമായി മടങ്ങി പോയിട്ടുണ്ടാകും , പിന്നെ നീ കണ്ട സ്വപ്നം അത് നിന്റെ മനസ്സ് വെറുതെ തോന്നിപ്പിച്ചതാകും … നീ അതോർത്ത് സങ്കടപ്പെടണ്ട , സമാധാനമായി ഉറങ്ങാൻ നോക്ക് . വെറുതെ കളിക്ക് ഒന്ന് നിന്നെ ദേഷ്യം പിടിപ്പിക്കാനായി ഞാനും നേരത്തെ എന്തൊക്കെയോ പറഞ്ഞു , പക്ഷെ അത് നിന്റെ മനസ്സിനെ നോവിച്ചു ല്ലേ , എന്ത് ചെയ്യാനാ എന്റെ നാവ് അങ്ങനെയായിപ്പോയി…. ”

വേദ ഒരു തരം ഭയത്തോടെ പറഞ്ഞു , ഇതൊക്കെ കേട്ട വേണിയുടെ ഉള്ളിലെ ഭയം കൂടിയതേ ഉള്ളൂ ഒപ്പം മനസ്സിൽ ആ സ്വപ്നത്തിന്റെ അർത്ഥം എന്താന്നെന്നുള്ള സംശയവും ഉൽകണ്ഠയും ….

……..

അടുത്ത ദിവസം ….

ആ വനത്തിനുള്ളിലൂടെ ഒറ്റയ്ക്ക് നടക്കുകയായിരുന്നു അവൾ ശേഷവേണി …. ഇന്നലെ ആ ചെറുപ്പക്കാരനെ കണ്ട സ്ഥലത്ത് കൂടിയൊക്കെ അവൾ അലഞ്ഞ് നടന്നു … അവിടെയെങ്ങും അവനെ കാണാതെ വന്നപ്പോൾ അവൾക്ക് ഒരു തരം ആശ്വാസം തോന്നി , പക്ഷെ അതുപോലെ തന്നെ ആ സമയം മനസ്സിൽ ഒരു തരം കാരണമറിയാത്ത സങ്കടവും അവളിൽ വന്ന് നിറഞ്ഞിരുന്നു .