✮കൽക്കി࿐ (ഭാഗം – 31) വിച്ചു [ചെകുത്താനെ സ്നേഹിച്ച മാലാഖ ] 319

” ജീവൻ എടുക്കുകയല്ലല്ലോ തിരികെ കൊടുക്കുകയല്ലേ ഒരു വൈദ്യന്റെ ജീവിത ധർമ്മം . പിന്നെ ആ പാവം അതിനെ ഞാൻ ആക്രമിക്കും എന്ന് കരുതി സ്വയരക്ഷയ്ക്ക് എന്നെ ആക്രമിച്ചതല്ലേ . ജീവൻ എടുക്കാൻ എളുപ്പമാ പക്ഷെ അത് തിരിച്ച് കൊടുക്കാൻ ആർക്കും കഴിയില്ല …. ”

അവനത് പറഞ്ഞതും എല്ലാം കേട്ടിരുന്ന അവൾ ഒരുതരം മരവിപ്പോടെ മുന്നോട്ട് നോക്കിയിരുന്നു …

” ഏയ് എന്താ പകൽ സ്വപ്നം കാണുവാണോ ? ”

അവനത് ചോദിച്ചപ്പോഴാണ് അവൾ ചിന്തയിൽ നിന്ന് ഉണർന്നത് … വേഗം അവൾ ആ പച്ചിലകൾ മുറിവിൽ വച്ച ശേഷം തുണി കൊണ്ട് ആ മുറിവ് ചുറ്റിക്കെട്ടാൻ തുടങ്ങി .

“മുറിവിലൂടെയുള്ള രക്തത്തിന്റെ ഒഴുക്ക് നിന്നിട്ടുണ്ട് , നാളെ സൂര്യോദയത്തിനു ശേഷം ഈ കെട്ട് അഴിച്ചാൽ മതി ….

അല്ല എന്തോ പച്ചില മരുന്ന് തേടി വന്നു എന്നല്ലേ പറഞ്ഞത് . അത് ഏതാണെന്ന് പറഞ്ഞാൽ ഞാനും കണ്ടെത്താൻ സഹായിക്കാം ”

അവൾ ഒരു പുഞ്ചിരിയോടെ പറഞ്ഞു .

” ഏയ് അത് പറ്റില്ല . ആ മരുന്ന് കൈമാറ്റപ്പെടാൻ കഴിയില്ല , മാത്രമല്ല മരുന്ന് പാകപ്പെടുത്തുന്ന വൈദ്യൻ മാത്രമേ ആ മരുന്ന് ഒരേ സമയം കാണാനും സ്പർശിക്കാനും പാടുള്ളൂ അല്ലെങ്കിൽ ഫലിക്കില്ല …. ”

ആത്രേയൻ അവളിൽ നിന്നു രക്ഷപ്പെടാനായി മനസ്സിൽ തോന്നിയ ഒരു നുണ പറഞ്ഞു …

” മ് ശരി .. ആഹ് സമയം ഒത്തിരി വൈകി എനിക്ക് പോണം … കിഴക്ക് ഭാഗത്തേയ്ക്ക് വരണ്ടാ ട്ടോ മറ്റുള്ളവർ കാണും അവർ ചിലപ്പോ ഇതൊന്നും വിശ്വസിച്ചെന്ന് വരില്ല , അവർ എന്ത് ചെയ്യാനും മടിക്കില്ല . അതുകൊണ്ട് എത്രയും വേഗം മരുന്ന് കണ്ടുപിടിച്ച് അതുമായി മടങ്ങിക്കോളൂ …. ഇവിടെ നിൽക്കുന്നത് അപകടമാ … പൊയ്ക്കോളു …”

ശേഷവേണി അത്രയും പറഞ്ഞ് തിരികെ നടക്കാൻ ഒരുങ്ങിയതും ….

” അപ്പോൾ നമ്മളിനി കാണില്ലേ ….? ”

പാറയുടെ പുറത്ത് നിന്നെണീറ്റു കൊണ്ട് ആത്രേയൻ ചോദിച്ചതും അവൾ പെട്ടെന്ന് ഒന്ന് നിന്നു ….

” നമ്മൾ …. കാണില്ല .. അല്ല എന്തിനാ കാണുന്നേ ? കാണാതിരിക്കുന്നതാ നല്ലത് .. ”

തിരിഞ്ഞ് കൂടി നോക്കാതെ അത്രയും പറഞ്ഞ ശേഷം അവൾ മുന്നോട്ട് ഓടി മറഞ്ഞു ….

………..

സമയം കടന്ന് പോയി …..

സൂര്യൻ ആഴിയിൽ മറഞ്ഞ് ആകാശത്ത് നക്ഷത്രങ്ങൾ പ്രകാശിച്ച് തുടങ്ങി , രാത്രിയായിട്ടു കൂടി ആ പൗർണമി നാളിൽ ചന്ദ്രന്റെ നിലാവെളിച്ചം പകൽ പോലെ പരന്നിരുന്നു .

വന്യജീവികളുടെ കയ്യിൽ അകപ്പെടാതിരിക്കാനായി അവൻ നേരത്തെ തന്നെ ഒരു മരത്തിന്റെ മുകളിൽ സ്ഥാനം പിടിച്ചിരുന്നു .

” എന്നാലും അവളെ കാണാൻ എന്ത് ഭംഗിയാ …. ആ മുഖം മനസ്സിൽ നിന്ന് പോകുന്നുമില്ല … പേര് പോലും ചോദിക്കാൻ മറന്നു ശ്ശേ ….. ”

മാനത്ത് നോക്കിയിരുന്ന ആത്രേയൻ ചുണ്ടിൽ വിരിഞ്ഞ നാണം കലർന്ന പുഞ്ചിരിയോടെ സ്വയം പറഞ്ഞു .

” അവളെ കുറിച്ച് ചിന്തിച്ച് ചിന്തിച്ച് വന്ന കാര്യം കൂടി ഓർക്കാതെയായി …

വടക്കും തെക്കും അന്വേഷിച്ചു പക്ഷെ ഒന്നും കണ്ടെത്താനായില്ല , ഇനി അന്വേഷിക്കാൻ കിഴക്ക് ദിക്ക് മാത്രം ബാക്കി . പക്ഷെ അവിടെ കാട്ടുമനുഷ്യർ വസിക്കുന്നു എന്നല്ലേ ആ പെണ്ണ് , കാട്ട് മൂപ്പന്റെ മകൾ പറഞ്ഞത് . ”

അവനങ്ങനെ ഓരോന്ന് ചിന്തിച്ചിരുന്നു ,