✮കൽക്കി࿐ (ഭാഗം – 31) വിച്ചു [ചെകുത്താനെ സ്നേഹിച്ച മാലാഖ ] 319

” അല്ല ഈ കാടിനെ കുറിച്ച് പറഞ്ഞിട്ടുള്ള ആരും അങ്ങനെയൊരു കാട്ട് മനുഷ്യരെ കുറിച്ച് പറഞ്ഞിട്ടില്ലല്ലോ ? മാത്രമല്ല നാഗവംശജർ ഒരു ഗണമായി ഒറ്റയ്ക്ക് വസിക്കുന്ന വനത്തിൽ മറ്റൊരു മനുഷ്യവർഗം വസിക്കുക അത് അസാദ്ധ്യമല്ലേ .. ശ്ശേ …. അത് ഞാൻ ഓർത്തതുമില്ല …. അപ്പോൾ അവൾ പറഞ്ഞത് നുണയാണോ …? എന്താണ് സത്യം ? കണ്ട് പിടിക്കണം എല്ലാം കണ്ടുപിടിക്കണം , അതിന് ഈ രാത്രി തന്നെയാ നല്ലത് ….. ”

അവൻ മനസ്സിൽ തീരുമാനിച്ചുറപ്പിച്ചു കൊണ്ട് പതിയെ ആ മരത്തിൽ നിന്നും താഴേയ്ക്കിറങ്ങി , നിലാ വെളിച്ചത്തിൽ കിഴക്ക് ഭാഗത്തേയ്ക്ക് നീങ്ങി ….

കാടിന്റെ വന്യതയെ വെളിപ്പെടുത്തുന്ന തരത്തിൽ പക്ഷികളുടെയും മൃഗങ്ങളുടെയും ഭീതിയുണർത്തുന്ന ശബ്ദം പല ദിശകളിൽ നിന്നും മുഴങ്ങുണ്ടായിരുന്നു . ആ കൊടും വനത്തിലൂടെ അവൻ കുറച്ചധികം ദൂരം സഞ്ചരിച്ചതും …..

കുറച്ചകലെയായി കത്തിജ്വലിക്കുന്ന തീനാളം കണ്ട് ആത്രേയൻ ഒന്ന് നിന്നു , അവിടെ ആരുടെയോ ഒക്കെ സാന്നിദ്ധ്യം ഉള്ളതു പോലെ തോന്നിയതും അവൻ ശബ്ദമുണ്ടാക്കാതെ മരങ്ങളുടെ മറവ് പറ്റി പതിയെ മുന്നോട്ട് നീങ്ങി ….

അൽപ്പം കൂടി മുന്നോട്ട് നീങ്ങിയ അവൻ ഒരു മരത്തിന്റെ മറവിൽ നിന്നുകൊണ്ട് മുന്നോട്ട് നോക്കി , അവിടെ അൽപ്പം അകലെ മുന്നിലായി ഒരു വലിയ കൂറ്റൻ മരത്തിന് കീഴെ കുറേ മനുഷ്യ രൂപങ്ങൾ അവൻ കണ്ടു പക്ഷെ ചെടികളുടെ ചോലയും മറ്റും കാരണം ഒന്നും വ്യക്തമല്ല .

” ഇനിയും മുന്നോട്ട് പോകുന്നത് അപകടമാണ് . ”

അവൻ സ്വയം മനസ്സിൽ പറഞ്ഞു കൊണ്ട് ചുറ്റിലും നോക്കി ഒരു മാർഗത്തിനായി … അപ്പോഴാണ് തന്റെ മുന്നിലായി നിൽക്കുന്ന ഉയരം കൂടിയ മരം അവന്റെ ശ്രദ്ധയിൽ പെട്ടത് . ഒരുപാട് ശിഖരങ്ങൾ ഉള്ള മരം , ശബ്ദം ഉണ്ടാക്കാതെ അവയിൽ ചവിട്ടി മുകളിലേക്ക് കയറിയാൽ താഴെ നടക്കുന്നത് വ്യക്തമായി കാണാം എന്ന് മനസ്സിലായതും അവൻ ഒട്ടും സമയം പാഴാക്കാതെ അതിന്റെ മുകളിലേക്ക് കയറാൻ തുടങ്ങി ….

ആ മരത്തിന്റെ പകുതിയിലധികം കയറിക്കഴിഞ്ഞതും അവൻ ഒരു മരക്കൊമ്പിൽ സ്ഥാനം ഉറപ്പിച്ച ശേഷം താഴേക്ക് നോക്കി ..

അപ്പോഴാണവൻ ഒരു ഞെട്ടലോടെ അത് മനസ്സിലാക്കിയത് , ദൂരത്ത് നിന്ന് താൻ കണ്ടത് കത്തി ജ്വലിക്കുന്ന തീ നാളമായിരുന്നില്ല മറിച്ച് അതൊരു ചെറിയ കല്ലാണ് , സൂര്യനെപ്പോലെ ഇളം മഞ്ഞ കലർന്ന ചുവപ്പ് നിറത്തിൽ പ്രകാശിക്കാൻ കഴിവുള്ള ഒരു കല്ല് . അതിന് മുന്നിലായി സ്ത്രീകളും പുരുഷന്മാരും കുട്ടികളും കൂട്ടം കൂടി നിൽക്കുന്നു ….

ഒന്ന് കൂടി സൂക്ഷിച്ച് നോക്കിയ അവൻ വീണ്ടും ഞെട്ടി , താഴെ നിൽക്കുന്ന ആ മൻഷ്യർക്ക് കാലുകളില്ല മറിച്ച് അരയ്ക്ക് താഴേക്ക് നാഗത്തിന്റെ രൂപമാണ് . പകുതി മനുഷ്യൻ പകുതി നാഗം ….

മുന്നിലെ കാഴ്ചകൾ കണ്ട് ഒരു തരം മരവിപ്പോടെ അവൻ മരത്തിന് മുകളിൽ നോക്കി നിന്ന സമയം …

ആ ആളുകൾക്കിടയിൽ നിന്ന് ഒരു നാഗ പെണ്ണ് ആ പ്രകാശം കത്തിജ്വലിക്കുന്ന കല്ലിന്റെ അടുത്തേയ്ക്ക് ഇഴഞ്ഞ് നീങ്ങുന്നത് അവൻ കണ്ടു , ആ സമയം അവന് അവളുടെ പുറക് വശം മാത്രമേ കാണാൻ കഴിഞ്ഞുള്ളൂ .. അതിന് മുന്നിലെത്തിയ അവൾ ആ കല്ല് തൊട്ട് തൊഴുത ശേഷം അത് തന്റെ കയ്യിലെടുത്ത് കൊണ്ട് എല്ലാവർക്കും നേരെ തിരിഞ്ഞു ….

ആ സമയം ആ പെണ്ണിന്റെ മുഖം കണ്ട് അവന്റെ ശരീരം നിശ്ചലമായി , ഹൃദയം പെരുമ്പറ കണക്കെ മുഴങ്ങാൻ തുടങ്ങി , നാവ് വറ്റി വരണ്ടതു പോലെ , ശരീരം തളർന്ന് വിറച്ചത് പോലെ ….

” ഇത് ….. അവൾ അവളല്ലേ …. എന്നെ പിന്തുടർന്നവൾ …. അപ്പൊ ഇവൾ നാഗവംശം …. അതെ നാഗവംശജ അവളുടെ കയ്യിലുള്ളത് നാഗമാണിക്യം ….. ”

മനസ്സിലതൊക്കെ ചിന്തിക്കുമ്പോൾ അവന്റെ ശരീരം അവൻ പോലുമറിയാതെ വിറയ്ക്കുന്നുണ്ടായിരുന്നു . എന്തോ സങ്കടം കൊണ്ട് തളർന്നതു പോലെ അവനാ മരക്കൊമ്പിൽ നിന്ന് പതിയെ താഴേയ്ക്കിറങ്ങിയ ശേഷം തിരികെ നടന്നു …. അവൻ പോലുമറിയാതെ അവന്റെ കണ്ണുകൾ നിറഞ്ഞിരുന്നു , എന്താണ് കാരണമെന്ന് പോലുമറിയാതെ …..

…………

വനത്തിന്റെ കിഴക്ക് ഭാഗത്ത് …. അർദ്ധരാത്രി സമയം …..

നദിയുടെ മുകളിൽ ഒരു പാറയുടെ പുറത്തായി പൂർണ ചന്ദ്രനെ ഇമവെട്ടാതെ നോക്കിയിരിക്കുകയായിരുന്നു അവൾ ശേഷവേണി ഒപ്പം അവളുടെ ഒരു കൂട്ടുകാരിയും …..

” വേണീ ….. ഇന്ന് ആയില്യം നാളിലെ പൂർണ പൗർണമി ദിവസമല്ലേ , നൂറ്റാണ്ടുകൾക്കൊരിക്കൽ മാത്രം സംഭവിക്കുന്ന അപൂർവ്വ ഭാഗ്യ ദിവസം …. ഇന്ന് ഒരു നാഗപ്പെണ്ണ് ഇഷ്ടപ്പെട്ട പുരുഷനെ മനസ്സിലോർത്ത് ഉറങ്ങാതെ ഈ പൂർണ്ണ ചന്ദ്രനെ നോക്കിയിരുന്നാൽ അവനെ സ്വന്തമാക്കാൻ കഴിയുമെന്നാ വിശ്വാസം ….. ”

അവളുടെ കൂട്ടുകാരി ഒരു പുഞ്ചിരിയോടെ പറഞ്ഞു ….

” മ് …. വെറും വിശ്വാസമല്ലല്ലോ പല തവണ പലർക്കും ഫലിച്ച സത്യമല്ലേ …. ”

” മ് …. അതെ …. അല്ല നീ ആ ചന്ദ്രനെത്തന്നെ നോക്കിയിരിക്കുന്നത് കൊണ്ട് പറഞ്ഞതാ …. ”

അവൾ ഒരു ചിരിയോടെ പറഞ്ഞു.

” ഹ് …. അതിന് ഞാൻ എത്ര നോക്കിയിരുന്നിട്ടും കാര്യമില്ലല്ലോ വേദേ…. ആയില്യം നാളിൽ പിറന്ന വിശേഷ ജന്മം , നാഗമാണിക്യം സംരക്ഷിക്കാൻ കാലം നിയോഗിച്ച എനിക്ക് എവിടുന്നാ ഇഷ്ടപ്പെടാൻ ഒരാൾ . ജീവിതകാലം മുഴുവൻ ഒറ്റയ്ക്ക് ഒറ്റത്തടിയായി ജീവിക്കേണ്ട ഞാൻ അങ്ങനെ ചിന്തിക്കാൻ കൂടി പാടില്ല …. ”

സങ്കടം ഒളിപ്പിച്ച പുഞ്ചിരിയോടെ ശേഷവേണി പറഞ്ഞു ….

” വേണീ … ഞാനതോർത്തില്ലെടി .. നമ്മുടെ ഇടയിൽ മാത്രമെന്താ ഇങ്ങനെ ഒരോരോ ആചാരങ്ങൾ . ഇതൊക്കെ എന്നാ അവസാനിക്കുക ….

എടി ഞാൻ ഒരു രഹസ്യം പറയാം … മനസ്സിൽ നിനക്ക് ആരോടെങ്കിലും ഇഷ്ടമുണ്ടെങ്കിൽ ഒന്ന് വെറുതെ ചന്ദ്രനെ നോക്ക് , അവസരം കിട്ടിയാൽ നീ അയാളോടൊപ്പം എവിടേയ്ക്കെങ്കിലും ഓടിപ്പോ … വെറുതെ നീ എന്തിനാ ഈ ആചാരത്തിന്റെ പേരിൽ സ്വന്തം ജീവിതം നശിപ്പിക്കുന്നേ … പിന്നെ എന്റെ മംഗലം കഴിഞ്ഞാൽ പിന്നെ നിന്റെ കൂടെ ഇങ്ങനെ വന്നിരിക്കാൻ എന്നെ കിട്ടില്ല ട്ടോ …. അതോർത്തോ …. ”

” എടീ …. വേദേ …. നിന്നെ ”

അത് കേട്ട് ശേഷവേണി ഒരു പുഞ്ചിരിയോടെ അവളെ വെറുതെ തല്ലാനായി കൈ ഓങ്ങിയതും അവൾ ഒരു ചിരിയോടെ ചാടിയെണീറ്റു …..

” ഹ ….. അതേടീ , ഞാൻ കളിയാക്കാൻ പറഞ്ഞതല്ല കാര്യമായിട്ടാ .. നീ ഒന്ന് ചിന്തിച്ച് നോക്ക് , ഞാൻ പോകുവാ …. ”

അതും പറഞ്ഞ് അവൾ അവിടുന്ന് പോയി …. പക്ഷെ അപ്പോഴേയ്ക്കും
ചിരിച്ച മുഖവുമായി ഇരുന്ന വേണിയുടെ കണ്ണുകൾ നിറഞ്ഞിരുന്നു .