✮കൽക്കി࿐ (ഭാഗം – 31) വിച്ചു [ചെകുത്താനെ സ്നേഹിച്ച മാലാഖ ] 317

✮കൽക്കി࿐
(ഭാഗം – 31) 

വിച്ചു [ചെകുത്താനെ സ്നേഹിച്ച മാലാഖ]

 

രക്തം വാർന്നൊഴുകുന്ന ഇടത് കൈ പുറകിൽ ചേർത്ത് വച്ച് തന്റെ വലത് കൈ കൊണ്ട് മാത്രം അവൻ ആ ചെന്നായയെ നിലത്തോട് ചേർത്ത് പിടിച്ചു , രക്ഷപ്പെടാനായി കൈകാലുകളിട്ടടിച്ച ആ ചെന്നായ അൽപ്പ സമയം കഴിഞ്ഞതും തളർന്നത് പോലെയായി .

ആ സമയം അത്രേയൻ അതിന്റെ കണ്ണുകളിലേക്ക് തന്നെ ഇമവെട്ടാതെ നോക്കി നിന്നു , ഒരു തരം ഭയത്തോടെ അത് തിരിച്ചും …..

ഒരു നിമിഷം രണ്ടു പേരുടെയും കണ്ണുകൾ തമ്മിൽ എന്തോ പറഞ്ഞത് പോലെ ….. അത്രയും നേരം കോപം കൊണ്ട് ജ്വലിച്ചു നിന്ന ആ ചെന്നായ അവന്റെ കണ്ണുകളിലേക്ക് നോക്കിയ നിമിഷം തന്നെ പെട്ടെന്ന് ശാന്തനായി , ഒപ്പം അതിന്റെ മുഖത്ത് ഒരു തരം ഭയം വന്ന് മൂടിയതുപോലൊരു ഭാവവും …

” മ് …. പോ …. ”

കഴുത്തിലെ പിടി അയച്ചു കൊണ്ട് ആത്രേയൻ പറഞ്ഞതും ആ ചെന്നായ തന്റെ ശരീരം കുടഞ്ഞു കൊണ്ട് ചാടിയെണീറ്റു , ശേഷം അത് അവന്റെ മുഖത്തേയ്ക്കും രക്തം വാർന്നൊഴുകുന്ന ആ കയ്യിലേക്കും പാളി നോക്കി .

” സാരമില്ല . പൊയ്ക്കോ …… ”

അവനത് പറഞ്ഞതും ആ ചെന്നായ വേഗത്തിൽ മുന്നോട്ട് കുതിച്ച് മരങ്ങൾക്കിടയിൽ മറഞ്ഞു ….

ശേഷം നിലത്ത് നിന്ന് എഴുന്നേറ്റ അവൻ അവളെ നോക്കി , ശേഷവേണിയെ …..

അരയിൽ ചുറ്റിക്കെട്ടിയിരുന്ന ഒരു നീളൻ തുണി അഴിച്ചെടുത്ത് തന്റെ ഇടത് കൈയ്യിലെ മുറിവിൽ മുറുക്കെ കെട്ടിക്കൊണ്ട് അവൻ അവളുടെ അടുത്തേയ്ക്ക് നടന്ന് നീങ്ങി …..

” താൻ ആരാ ? എന്തിനാ കുറച്ച് നേരമായി എന്റെ പിന്നാലെ ഒളിച്ചും പാത്തും … മ്ഹ് … ? ”

അത്രേയൻ അവളുടെ മുന്നിൽ ചെന്ന് നിന്ന് അവളുടെ കണ്ണുകളിലേക്ക് നോക്കി ചോദിച്ചു ….

” ഞാ …. ഞാനോ …. ഞാൻ ആരുടെയും പുറകെ വന്നിട്ടില്ല ….. നിങ്ങൾക്ക് തെറ്റിയതാകും .. ”

അവൾ നോട്ടം മാറ്റിക്കൊണ്ട് പറഞ്ഞു ….

” കള്ളം …. സത്യമാണെങ്കിൽ മുഖത്ത് നോക്കി പറയണം …. ഞാൻ കണ്ടു , കുറച്ച് സമയമായി താൻ എന്റെ പുറകെ ….

താൻ ആരാ … എന്താ ഈ കൊടും വനത്തിൽ … ”

” ഹ് …… ഹ … ഹ ……. ”

അത് കേട്ടതും അവൾ ഒന്ന് ചിരിച്ചു …..

” എന്തിനാ ചിരിക്കുന്നേ .. ? ”

” ഏയ് , നിങ്ങളോട് ഞാനാ ആ ചോദ്യം ചോദിക്കേണ്ടത് . നിങ്ങൾ ആരാ ? എന്തിനാ ഈ വനത്തിൽ …. ഇതെന്റെ മണ്ണാ . ഞാൻ പിറന്നതും വളർന്നതും ഇവിടെയാ , ഞാൻ കാട്ട് മുപ്പന്റെ മകളാ … സത്യം പറഞ്ഞില്ലെങ്കിൽ തല കുന്തത്തിലിരിക്കും സൂക്ഷിച്ചോ ….”

അൽപ്പം ദേഷ്യത്തോടെ ശേഷവേണി ചോദിച്ചു …