✮കൽക്കി࿐ (ഭാഗം – 30) അദ്ധ്യായം 3 – ആരംഭം , വിച്ചു [ചെകുത്താനെ സ്നേഹിച്ച മാലാഖ ] 399

” നികേദ് ….. ഉള്ളിൽ ഒരു വിഷ സർപ്പം ഉണ്ടെന്നാണ് അയാൾ പറഞ്ഞത് , സോ ഇറ്റ്സ് ഡെയ്ൻജറസ് . ”

നിഷാന്ത് പറഞ്ഞത് കേട്ടതും അവൻ തന്റെ അരയിലിരുന്ന റിവോൾവർ കയ്യിലെടുത്തു ….

” അതിനും ജീവനുണ്ടല്ലോ ബ്രോ ….. ”

ഒരു പുഞ്ചിരിയോടെ അവനതും പറഞ്ഞ് ആ ഗർത്തത്തിലേക്ക് പെട്ടെന്ന് എടുത്ത് ചാടി ….

കുറച്ച് താഴേയ്ക്ക് എത്തിയതും ബെൽറ്റിൽ റോപ്പ് കറങ്ങി നീങ്ങുന്നതിന്റെ വേഗത കുറയ്ച്ചു കൊണ്ട് അവൻ താഴേയ്ക്ക് ടോർച്ച് ലൈറ്റ് അടിച്ച് നോക്കി , അപ്പോൾ താഴെയായി ഗർത്തത്തിനുള്ളിൽ വെള്ളം നിറഞ്ഞ് കിടക്കുന്നതാണവൻ കണ്ടത് . റോപ്പ് കറങ്ങി താഴെ വെള്ളത്തിനടുത്ത് എത്തിയതും ബെൽറ്റിൽ നിന്ന് അവൻ ആ റോപ്പ് ഇളക്കി മാറ്റിയ ശേഷം വെള്ളത്തിലേക്ക് എടുത്ത് ചാടി ….

ആ വെള്ളക്കെട്ട് നീന്തി കരഭാഗത്ത് കയറിയ ശേഷം അവൻ ടോർച്ച് ലൈറ്റ് ചുറ്റിലും അടിച്ച് നോക്കി …. അവിടെ മുന്നിലായി ഗർത്തത്തിന് നടുക്ക് ഒരാൾപ്പൊക്കമുള്ള കൽത്തൂൺ നിൽക്കുന്നു , അതിന് മുകളിലായി ഒരു ചെറിയ ലോഹപ്പെട്ടിയും … അത് കണ്ടതും അവന്റെ ചുണ്ടുകളിൽ ചെറിയ ഒരു പുഞ്ചിരി വിടർന്നു …

” ശ് …. ശ് …….. ശ് …….. ”

എവിടെ നിന്നോ ഒരു നാഗത്തിന്റെ സീൽക്കാര ശബ്ദം കേട്ടതും അവനാ ടോർച്ച് ലൈറ്റിന്റെ പിന്നിലെ സ്വീച്ച് അമർത്തിയ ശേഷം അത് നിലത്ത് കുത്തനെ വച്ചു ആ സമയം അതിൽ നിന്ന് ഗർത്തം മുഴുവൻ പ്രകാശം വ്യാപിച്ചു ….

അവൻ ആ കൽത്തൂണിലേയ്ക്ക് നോക്കി അതിനടുത്ത് നിന്നായിരുന്നു ആ ശബ്ദം …

” …. ശ്ശ് …. ശ് ….. ശൂ …. ശ് …”

പെട്ടെന്ന് ആ കൽത്തൂണിന്റെ അടിവശത്തെ പാറപ്പിളർപ്പുകൾക്കിടയിൽ നിന്ന് ഒരു കൂറ്റൻ സർപ്പം പുറത്തേയ്ക്ക് വന്നു , അസാമാന്യ വലിപ്പവും ശൗര്യവും നിറഞ്ഞ ഒരു നാഗം …

അത് ആ തൂണിനെ ചുറ്റിവരിഞ്ഞ് മുകളിലേക്ക് കയറിയ ശേഷം ഫണം വിടർത്തി നിന്നു . ആ ലോഹപ്പെട്ടിക്ക് തണലായി , കാവലായി …..

പക്ഷെ അത് കണ്ടിട്ടും നികേദിന്റെ മുഖത്ത് ഒരൽപ്പം പോലും ഭയം തോന്നിയില്ല , ഒരു ചെറു ചിരിയോടെ അവനത് നോക്കി നിന്നു , കേട്ടറിഞ്ഞത് സത്യമാണല്ലോ എന്ന ഭാവത്തിൽ …. അരയിലെ റിവോൾവർ ഒന്ന് തൊട്ട ശേഷം അത് വേണ്ട എന്ന തീരുമാനത്തിൽ അവൻ കൈ പിൻവലിച്ചു , ശേഷം ബാഗ് തുറന്ന് ഒരു ഫെയിസ് മാസ്ക് എടുത്ത് മുഖത്ത് വെച്ചു , മുഖം മുഴുവൻ മറയ്ക്കുന്ന തരത്തിലുള്ള ഒരു തരം കെമിക്കൽ മാസ്ക് . ശേഷം പെട്ടെന്ന് ബാഗിൽ നിന്ന് രണ്ട് മൂന്ന് ചെറിയ കുപ്പികൾ അവൻ മുന്നിലേക്ക് വലിച്ചെറിഞ്ഞു … ഉടനെ അവിടെ മുഴുവൻ പുക കൊണ്ട് നിറഞ്ഞു , കുറച്ച് മിനിട്ടുകൾ ചുറ്റുമുള്ള ഒന്നും കാണാൻ കഴിയാത്ത വിധം അവിടെ അത് മൂടപ്പെട്ടു ….. ആ സമയം മുഴുവൻ അവൻ അവിടെത്തന്നെ നിന്നു . വാച്ചിലെ ടൈമറിൽ നിന്ന് അലാറം മുഴങ്ങിയതും നികേദ് മുന്നോട്ട് നടന്നു , ആ കൽത്തൂണിന്റെ അടുത്ത് എത്തിയ അവൻ താഴേയ്ക്ക് നോക്കി . ജീവഛവമായി കിടക്കുന്ന കാളീയനെ ഷൂ ധരിച്ച കാലുകൊണ്ട് അവൻ തട്ടി നോക്കിയ ശേഷം ഒന്ന് ചിരിച്ചു . എന്നിട്ടവൻ ആ ലോഹപ്പെട്ടി പതിയെ തുറന്ന് നോക്കി , ഉള്ളിലെ കാഴ്ച കണ്ട് അവന്റെ കണ്ണുകൾ വിടർന്നു ഒപ്പം അവിടെ മുഴുവൻ ഒരു തരം ചുവപ്പ് കലർന്ന മഞ്ഞ പ്രകാശവും വ്യാപിച്ചു ………..