✮കൽക്കി࿐ (ഭാഗം – 30) അദ്ധ്യായം 3 – ആരംഭം , വിച്ചു [ചെകുത്താനെ സ്നേഹിച്ച മാലാഖ ] 399

*************************

ആയിരം വർഷങ്ങൾക്ക് മുൻപ്

പല പല പണ്ഡിതന്മാരിൽ നിന്നും മറ്റും ശേഖരിച്ച വിവരങ്ങൾ വെച്ച് പാതിമനസ്സോടെ ആത്രേയൻ ആ വനത്തിനുള്ളിലേക്ക് യാത്ര തിരിച്ചു , തുടക്കമറിയാമെങ്കിലും ഒടുക്കമെവിടയാണെന്ന് ആർക്കും അറിയാത്ത ആ കൊടും വനത്തിലേക്ക് .
എല്ലാ കഥകളുടെയും ആരംഭത്തിലേക്ക് .

കുന്നുകളും താഴ്വരകളും പുഴകളും കടന്ന് അവൻ കിഴക്ക് ദിശ നോക്കി മുന്നോട്ട് പോയി , അതിനൊപ്പം ചില രാപ്പകലുകളും കടന്ന് പോയി.
അങ്ങനെ ആ യാത്രയ്ക്കിടയിൽ ആ കൊടും കാട്ടിൽ വച്ച് .

യാത്ര ചെയ്ത് ക്ഷീണിതനായ ആത്രേയൻ ഒരു മരച്ചുവട്ടിൽ വിശ്രമിക്കാനായിരുന്നു . ആ സമയം കുറച്ച് മറി അവനെത്തന്നെ നോക്കി ഒരാൾ ഒളിഞ്ഞ് നിൽപ്പുണ്ടായിരുന്നു . കുറച്ച് ദൂരമായി അവനെത്തന്നെ പിന്തുടർന്ന് വന്ന ഒരാൾ , അവൾ ശേഷവേണി …..

അതൊരു സാധാരണ മനുഷ്യനാണെന്ന് അവൾ ആദ്യം കണ്ടപ്പോൾ തന്നെ മനസ്സിലാക്കി …. പുറത്ത് നിന്ന് ഒരാൾ ഈ ഉൾവനത്തിലേക്ക് ഇത്രയും ദൂരം സഞ്ചരിച്ച് വന്നെങ്കിൽ അത് നാഗമാണിക്യത്തിന് വേണ്ടിയാണെന്ന് അവൾക്കുറപ്പുണ്ടായിരുന്നു . പക്ഷെ അയാൾ ഒറ്റയ്ക്കായതിനാൽ അവളിൽ പല സംശയങ്ങളും ജനിപ്പിച്ചു , അതുകൊണ്ട് അവൾ കാത്തിരുന്നു അയാൾ എന്ത് ചെയ്യാനാണ് വന്നതെന്നറിയാനായി …

ആ സമയത്ത്

പുറകിൽ എന്തോ ഇല അനങ്ങുന്ന ശബ്ദം കേട്ട അവൾ ഒരു ഞെട്ടലോടെ തിരിഞ്ഞ് നോക്കി . നോക്കുമ്പോൾ ചുവന്ന കണ്ണുകളുള്ള ഒരു ഭീമാകാരനായ കാട്ട് ചെന്നായ, അത് തന്നെത്തന്നെ ഉറ്റ് നോക്കി നിൽക്കുന്നു , ഇരയെ കണ്ട വേട്ടക്കാരന്റെ സന്തോഷത്തോടെ …
അതിന്റെ മുഖത്താകെ രക്തക്കറ പറ്റിപ്പിടിച്ച പാടുകൾ ഒപ്പം ഒരു തരം ക്രൂരഭാവവും

അത് ഉറപ്പായും തന്നെ ആക്രമിക്കുമെന്ന് അവൾക്കറിയാമായിരുന്നു കാരണം താൻ ഇപ്പോൾ മനുഷ്യ രൂപത്തിലാണ് . പക്ഷെ അവൾ ഭയന്നില്ല , കാരണം ഞൊടിയിടയിൽ അവൾക്ക് രൂപം മാറാൻ സാധിക്കും , ആക്രമിക്കാൻ വരുന്ന ആ കാട്ടുമൃഗത്തിനെ തന്റെ വിഷപ്പല്ല് കൊണ്ട് കൊല്ലാനും …

വിശപ്പടക്കാൻ ഒരു ഇരയെ കിട്ടിയ സന്തോഷത്തിൽ ആ ചെന്നായ ഓരോ കാലടികളായി പതിയെ മുന്നോട്ട് വെച്ചു ഒരു തരം ക്രൂര ഭാവത്തോടെ , ആ സമയത്ത് ശേഷവേണി അപകടം മനസ്സിലാക്കി തന്റെ നാഗ സ്വരൂപം സ്വികരിക്കാൻ ഒരുങ്ങിയതും ….

പെട്ടെന്ന് …… ,

വായുവിലൂടെ പറന്ന് വന്ന ഒരു വാൾ ആ ചെന്നായയ്ക്കും ശേഷവേണിക്കും നടുവിലായി മണ്ണിൽ കുത്തി നിന്നു …. പെട്ടെന്നങ്ങനെ സംഭവിച്ചപ്പോൾ ആ ചെന്നായയും ശേഷവേണിയും ഒരു പോലെ ഒന്ന് ഞെട്ടി ചില ചുവടുകൾ പിന്നോട്ട് വച്ചു പോയി .

ആ ഞെട്ടലോടെ തിരിഞ്ഞ് നോക്കിയ അവൾ കണ്ടത് താനിതുവരെ പിന്തുടർന്ന ആ യുവാവ് ചെന്നായയെത്തന്നെ നോക്കി നിൽക്കുന്നതാണ്
അത് അവനെയും .

ഉടനെ തന്നെ ആ ചെന്നായ അവന് നേരെ തിരിഞ്ഞു ആക്രമിക്കാനായി , അതും വേഗത്തിൽ .

തന്റെ നെഞ്ചിലേക്ക് കുതിച്ച് ചാടിയ ചെന്നായയിൽ നിന്ന് വെട്ടിത്തിരിഞ്ഞു കൊണ്ടവൻ തന്റെ കൈ വീശി അതിന്റെ പുറത്താഞ്ഞടിച്ചു … അടികൊണ്ട് നിലത്ത് വീണ ആ ചെന്നായ ഞൊടിയിടയിൽ ദേഷ്യത്തോടെ വീണ്ടുമവനെ ആക്രമിക്കാൻ ഒരുങ്ങി , പക്ഷെ ഇത്തവണ അത് വളരെ വേഗത്തിലായിരുന്നു . നിലത്ത് നിന്ന് ചാടിയെണീറ്റ ആ ചെന്നായ ആത്രേയന്റെ ഇടത് കൈപ്പത്തിക്ക് താഴെ ശക്തിയായി കടിച്ച് കുടഞ്ഞു , അതിന്റെ കൂർത്ത പല്ലുകൾ ആഴ്ന്നിറങ്ങിയതും അവന്റെ കൈ മുറിഞ്ഞ് ആ മുറിവിലൂടെ രക്തം ഒഴുകിയിറങ്ങാൻ തുടങ്ങി .

ആ രംഗം കണ്ട് ശേഷവേണി ഒന്ന് ഭയന്നു , പക്ഷെ ആ സമയത്ത് തന്നെ ആത്രേയൻ ആ ചെന്നായയെ വലിച്ച് നിലത്തേക്കിട്ട ശേഷം തന്റെ വലത് കൈ അതിന്റെ കഴുത്തിൽ അമർത്തി നിലത്തോട് ചേർത്ത് പിടിച്ചു … അവന്റെ പിടിത്തത്തിൽ നിന്ന് രക്ഷപ്പെടാൻ ആ ചെന്നായ കൈകാലുകളിട്ടടിച്ച് ഒരുപാട് തവണ ശ്രമിച്ചെങ്കിലും അതൊക്കെ പരാജയപ്പെട്ടു .

രക്തം വാർന്നൊഴുകുന്ന ഇടത് കൈ പുറകിൽ ചേർത്ത് വച്ച് തന്റെ വലത് കൈ കൊണ്ട് മാത്രം അവൻ ആ ചെന്നായയെ നിലത്തോട് ചേർത്ത് പിടിച്ചു , രക്ഷപ്പെടാനയി കൈകാലുകളിട്ടടിച്ച ആ ചെന്നായ അൽപ്പ സമയം കഴിഞ്ഞതും തളർന്നത് പോലെയായി .

ആ സമയം അത്രേയൻ അതിന്റെ കണ്ണുകളിലേക്ക് തന്നെ ഇമവെട്ടാതെ നോക്കി നിന്നു , ഒരു തരം ഭയത്തോടെ അത് തിരിച്ചും …..

ഒരു നിമിഷം രണ്ടു പേരുടെയും കണ്ണുകൾ തമ്മിൽ എന്തോ പറഞ്ഞത് പോലെ ….. അത്രയും നേരം കോപം കൊണ്ട് ജ്വലിച്ചു നിന്ന ആ ചെന്നായ അവന്റെ കണ്ണുകളിലേക്ക് നോക്കിയ നിമിഷം തന്നെ പെട്ടെന്ന് ശാന്തനായി , ഒപ്പം അതിന്റെ മുഖത്ത് ഒരു തരം ഭയം വന്ന് മൂടിയതുപോലൊരു ഭാവവും …

” മ് …. പോ …. ”

കഴുത്തിലെ പിടി അയച്ചു കൊണ്ട് ആത്രേയൻ പറഞ്ഞതും ആ ചെന്നായ തന്റെ ശരീരം കുടഞ്ഞു കൊണ്ട് ചാടിയെണീറ്റു , ശേഷം അത് അവന്റെ മുഖത്തേയ്ക്കും രക്തം വാർന്നൊഴുകുന്ന ആ കയ്യിലേക്കും പാളി നോക്കി .

” സാരമില്ല . പൊയ്ക്കോ …… ”

അവനത് പറഞ്ഞതും ആ ചെന്നായ വേഗത്തിൽ മുന്നോട്ട് കുതിച്ച് മരങ്ങൾക്കിടയിൽ മറഞ്ഞു ….

ശേഷം നിലത്ത് നിന്ന് എഴുന്നേറ്റ അവൻ അവളെ നോക്കി , ശേഷവേണിയെ …..

തുടരും …..