✮കൽക്കി࿐ (ഭാഗം – 30) അദ്ധ്യായം 3 – ആരംഭം , വിച്ചു [ചെകുത്താനെ സ്നേഹിച്ച മാലാഖ ] 399

✮കൽക്കി࿐
(ഭാഗം – 30)
അദ്ധ്യായം 3 – ആരംഭം

വിച്ചു [ചെകുത്താനെ സ്നേഹിച്ച മാലാഖ]

 

2017 ഡിസംബർ

വൈകുണ്ഡ പുരിയുടെ കിഴക്കേ അതിർത്തിയിലെ ആ മലനിര ……

പണ്ടേതോ കാലത്ത് ഉപയോഗിച്ചിരുന്നതും പക്ഷെ ഇപ്പോൾ പൂർണ്ണമായും നശിച്ചതുമായ ഒരു വന പാത . ഉരുളൻ കല്ലുകളും കുഴികളും കയറ്റിറക്കങ്ങളും നിറഞ്ഞ ആ പാതയുടെ ഇരുവശത്തും കൊടും കാടാണ് ….

ആ പാതയിലൂടെ ഒരു പഴയ മോഡൽ കറുത്ത ജിപ്സി മുന്നോട്ട് നീങ്ങുകയാണ് . റോഡിന്റെ ശോചനീയ അവസ്ഥയെ തെല്ലും കാര്യമാക്കാതെ ആ വണ്ടി മുന്നോട്ട് കുതിച്ചു കൊണ്ടേയിരുന്നു . ആ മലയെ ചുറ്റിവരിഞ്ഞുള്ള പാതയിലൂടെ വണ്ടി കുറേയധികം ദൂരം മുന്നോട്ട് നീങ്ങി , ഒടുവിൽ വഴിയുടെ അവസാനം എത്തിയതും ആ ജിപ്സി അവിടെ നിന്നു ….

” വണ്ടി ഇനി മുന്നോട്ട് പോകില്ല എന്ന് തോന്നുന്നു , നടക്കണം . ”

ജിപ്സിയുടെ ഇടത് വശത്തിരുന്നവൻ വണ്ടി ഓടിച്ചിരുന്നവനോട് പറഞ്ഞ ശേഷം പുറത്തേയ്ക്കിറങ്ങി , ജിപ്സിയുടെ പുറകിലെ തുറന്ന ഭാഗത്ത് നിന്ന് ഒരു ബാഗെടുത്ത് അവൻ തോളിലിട്ടു . ഒപ്പം മറ്റൊരു ബാഗെടുത്ത് അവൻ മുന്നോട്ടെറിഞ്ഞതും ഡ്രൈവിംഗ് സീറ്റിൽ നിന്ന് ഇറങ്ങിയവൻ അത് പിടിച്ചെടുത്ത് തന്റെ തോളിലേക്കിട്ടു …..

ഒരു പോലത്തെ കറുത്ത ജാക്കറ്റും ജീൻസ് പാന്റും ഷൂവുമൊക്കെ ധരിച്ച രണ്ട് ചെറുപ്പക്കാർ . ഒരേ ഉയരം ഒരേ വണ്ണം ഒരേ ശരീര പ്രകൃതി മുഖ രൂപവും അങ്ങനെ തന്നെ , ഒറ്റനോട്ടത്തിൽ ആർക്കും തിരിച്ചറിയാൻ കഴിയാത്ത ഒരു പോലത്തെ രണ്ടു പേർ …..

” ഈസ്റ്റ് ഡയറക്ഷൻ ……. ”

അതിലൊരുവൻ പറഞ്ഞു കൊണ്ട് മുന്നോട്ട് നടന്നു പുറകെ രണ്ടാമനും … ആ ഘോരവനത്തിലൂടെ അവർ മുന്നോട്ട് നടന്നു തെല്ലും ഭയമില്ലാതെ …. അടുത്ത മലയുടെ താഴ്വാരത്തെത്തി പാറകൾ ചാടി കടന്ന് അവിടുത്തെ നദിയും താണ്ടി അവർ മറുകരയിലെത്തി …

” പറഞ്ഞ ലൊക്കേഷൻ അനുസരിച്ച് അത് ദാ അവിടെ ഉണ്ടാകും …. ”

മുന്നിലെ കൂറ്റൻ മലനിര ചൂണ്ടിക്കാണിച്ചു കൊണ്ട് ഒരുവൻ പറഞ്ഞു , ശേഷം അവർ മുന്നോട്ട് നീങ്ങി …

ആ മലയുടെ പകുതിയിലതികം കയറിയതും മുന്നിലായി അവർ ഒരു പാറക്കെട്ടുകൾ നിറഞ്ഞ ഗുഹ കണ്ടു , ഉള്ളിൽ മുഴുവൻ കൂരിരുൾ നിറഞ്ഞ ഒരു ഗുഹ . അപ്പോഴേയ്ക്കും ഒരുവൻ തന്റെ ബാഗ് തുറന്ന് ടോർച്ച് ലൈറ്റ് എടുത്ത് ഉള്ളിലേക്ക് അടിച്ച് നോക്കി … ആ ഇരുളിലേക്ക് പെട്ടെന്ന് വെട്ടം കടന്ന് ചെന്നതും ഉള്ളിൽ തലകീഴായി തൂങ്ങിക്കിടന്ന നരിച്ചീറുകൾ ഭയന്ന് പുറത്തേയ്ക്ക് പറന്ന് പോയി …

” യെസ് ഇത് തന്നെ …. ”

ഒരുവൻ അതും പറഞ്ഞ് മുന്നോട്ട് നീങ്ങി ടോർച്ച് ലൈറ്റുമായി , പുറകെ രണ്ടാമനും …

ആ ഗുഹാവഴിയിലൂടെ കുറച്ച് ദൂരം മുന്നോട്ട് പോയതും മുന്നിലായി ഒരു വലിയ ഗർത്തം അവർ കണ്ടു , അത് കണ്ടതും അവർ മുഖാമുഖം നോക്കി ഒന്ന് പുഞ്ചിരിച്ചു .

ഉടനെ രണ്ടാമൻ തന്റെ പാൻസിന്റെ പോക്കറ്റിൽ നിന്ന് ഒരു രൂപാ നാണയം കയ്യിലെടുത്തു .

” ഹെഡ് ഓർ ടെയിൽ …. ”

” ഹെഡ് …. ”

ഉടനെ തന്നെ അവൻ ആ നാണയം മുകളിലേക്ക് ടോസ് ചെയ്ത ശേഷം കയ്യിൽ പിടിച്ചെടുത്തു ….

” ടെയിൽ ”

രണ്ടാമൻ കൈ വിടർത്തിയതും നാണയത്തിന്റെ വശം കണ്ട് ഒന്നാമൻ പറഞ്ഞു .

” ആർ യു റെഡി …. ”

” യെസ് …. ”

ഉടനെ തന്നെ ഒന്നാമൻ തന്റെ ബാഗ് തുറന്ന് അതിൽ നിന്ന് ക്ലൈമ്പിങിനുപയോഗിക്കുന്ന റോപ്പും ബെൽറ്റും പുറത്തെടുത്തു . ആ റോപ്പിന്റെ ഒരു വശം പാറയിൽ ലോക്ക് ചെയ്ത ശേഷം മറുവശം രണ്ടാമന്റെ ശരീരത്തിലെ ബെൽറ്റിൽ ഫിക്സ് ചെയ്തു ….