✮കൽക്കി࿐ (ഭാഗം – 25) വിച്ചു [ചെകുത്താനെ സ്നേഹിച്ച മാലാഖ ] 917

ആ പാത്രം നിലത്ത് വച്ച ശേഷം അവനൊന്ന് കണ്ണ് ചിമ്മി തുറന്നപ്പോഴേയ്ക്കും എന്തൊക്കെയോ മാറ്റങ്ങൾ അവന് സംഭവിച്ചത് പോലെ .
ഭയം നിഴലിച്ച് നിന്നിരുന്ന അവന്റെ മുഖത്ത് ഒരു തരം രൗദ്രഭാവം ഒപ്പം രക്തവർണ്ണമാർന്ന കണ്ണുകളും ….

” ഹ ….. ഹ ….. ”

അത് കണ്ടതും ആത്രേയൻ ആർത്ത് ചിരിച്ചു …

” എന്റെ വലയ്ക്കുള്ളിൽ ആയിക്കഴിഞ്ഞാൽ ആർക്കും രക്ഷയില്ല … നീ ഇപ്പൊ രണദേവാണ് എന്റെ ഉത്തമനായ ശിഷ്യൻ . ഞാനിപ്പൊ എന്ത് പറഞ്ഞാലും നീ ചെയ്യും , കൊല്ലാൻ പറഞ്ഞാൽ കൊല്ലും ചാകാൻ പറഞ്ഞാൽ ചാകും . ഏത് ശക്തി നിന്നെ യഥാസ്ഥിതിയിലേക്ക് മടക്കിക്കൊണ്ട് പോകാൻ ശ്രമിച്ചാലും ഞാനതിന് സമ്മതിക്കില്ല , കാരണം നിന്നെ എനിക്ക് വേണം മുന്നിൽ നിന്ന് പോരാടുന്ന ഒരായുധമായി …. ”

ആത്രേയൻ അഹങ്കാരത്തോടെ തന്റെ ശബ്ദം മുഴക്കി .

                    ……………………..

പ്രധാന റോഡിൽ നിന്നും നന്ദാവനം മനയിലേക്ക് പോകുന്ന ആ മൺപാത …

ജീപ്പിന്റെ ബോണറ്റിന്റെ പുറത്തേയ്ക്ക് ചാടിക്കയറിയ ആദി അവശേഷിക്കുന്ന അവരെത്തന്നെ നോക്കി അങ്ങനെ നിന്ന സമയം …

അതിലൊരുവൻ പെട്ടെന്ന് അരയിലിരുന്ന ഒരു കത്തിയെടുത്ത് ആദിക്ക് നേരെ വീശി എറിഞ്ഞതും , തന്റെ നേർക്ക് വന്ന ആ കത്തി പിടിച്ചെടുത്തു കൊണ്ട് അവൻ നിലത്തേയ്ക്ക് ചാടിയിറങ്ങി ഒപ്പം ബാക്കിയുള്ളവരും അവന്റെ നേർക്ക് നീങ്ങി …

ഒരുവൻ അവന് നേരെ വാൾ വീശിയതും ആദി തന്റെ വാൾ കൊണ്ട് ശക്തമായി അതിലേക്ക് വെട്ടി … ശക്തമായ ആ പ്രഹരത്തിൽ അവന്റെ വാൾ കയ്യിൽ നിന്നും ദൂരേയ്ക്ക് തെറിച്ചു പോയി ,