✮കൽക്കി࿐ (ഭാഗം – 25) വിച്ചു [ചെകുത്താനെ സ്നേഹിച്ച മാലാഖ ] 915

അസാമാന്യ ശരീര വലിപ്പവും കൂർത്ത് വളഞ്ഞ ചുണ്ടുകളും നീണ്ട് വളഞ്ഞ നഖങ്ങളും തിളങ്ങുന്ന കണ്ണുകളുമുള്ള അപൂർവ്വ ഇനത്തിൽപ്പെട്ട ഒരുതരം കാട്ട് മൂങ്ങ .

അതിന്റെ കണ്ണുകളും കാഴ്ചയും അവരെത്തന്നെ കേന്ദ്രീകരിച്ച് നിന്ന സമയം ….

ഇതേ സമയം വനത്തിനുള്ളിൽ ആ പാറക്കെട്ടുകൾ നിറഞ്ഞ ഗുഹയ്ക്കകത്ത് അഗ്നികുണ്ഡത്തിന് മുന്നിലായി ഇരിക്കുന്ന ആത്രേയൻ മുന്നിലെ മരഉരുളിയിൽ നിറച്ച് വച്ചിരിക്കുന്ന മനുഷ്യ രക്തത്തിലേക്ക് തന്നെ നോക്കിയിരിക്കുകയാണ് , തന്റെ മാന്ത്രിക ശക്തിയിലൂടെ അവിടെ നടക്കുന്ന സംഭവങ്ങളെല്ലാം ആ മൂങ്ങയുടെ കണ്ണുകളിലൂടെ മര ഉരുളിയിലെ രക്തത്തിൽ അയാൾക്ക് ദൃശ്യമാവുന്നുണ്ടായിരുന്നു ആ സമയം ….

” അവശേഷിക്കുന്നവനും ചാവട്ടെ ….. ശേഷം നീ മിഴി ചിമ്മാതെ അവനെ പിന്തുടരണം . എനിക്കറിയണം അവനെവിടെ വസിക്കുന്നു എന്ത് ചെയ്യുന്നു അങ്ങനെ എല്ലാം … ”

ആത്രേയൻ ആ കാട്ടുമൂങ്ങയോടായി പറഞ്ഞു .

ആ ഉയരം കൂടിയ ഉണങ്ങിയ മരത്തിന്റെ ചില്ലയിൽ ആദിയെത്തന്നെ ഉറ്റു നോക്കിയിരുന്ന ആ കാട്ടുമൂങ്ങ മറ്റൊന്നും ശ്രദ്ധിച്ചിരുന്നില്ല ….

പെട്ടെന്ന് …..

നിലത്ത് നിന്ന് ആ ഉണങ്ങിയ മരത്തിന്റെ മുകളിലേക്ക് ചുറ്റി ഇഴഞ്ഞ് കയറിയ ഒരു വലിയ സർപ്പം പെട്ടെന്ന് തന്നെ ആ കാട്ട് മൂങ്ങയുടെ ശരീരത്തിൽ ചുറ്റിപ്പടർന്ന് കയറി ….

ഭയന്ന് രക്ഷപ്പെടാൻ ശ്രമിച്ചെങ്കിലും ആ മൂങ്ങയ്ക്ക് അതിന് കഴിയുമായിരുന്നില്ല കാരണം അപ്പോഴേയ്ക്കും അതിന് തന്റെ ചിറകുകൾ ഒന്ന് വിടർത്താൻ പോലും കഴിയാത്ത രീതിയിൽ ആ സർപ്പം ആ മൂങ്ങയെ ചുറ്റി വരിഞ്ഞ് കഴിഞ്ഞിരുന്നു …