✮കൽക്കി࿐ (ഭാഗം – 25) വിച്ചു [ചെകുത്താനെ സ്നേഹിച്ച മാലാഖ ] 915

ഒപ്പം അതേ സമയം തന്നെ ആദി ഒന്ന് ചുറ്റിക്കറങ്ങി തന്റെ ഇടത് കയ്യിലിരുന്ന ആ ചെറിയ കത്തി ഉപയോഗിച്ച് അവന്റെ കഴുത്തിൽ താഴ്ത്തി വലിച്ചു ….

ചോര വാർന്ന് അവൻ വീണ സമയം പെട്ടെന്ന് പുറകിലൂടെ വന്ന മറ്റൊരുവൻ ആദിയുടെ മുതുകിലേക്ക് ആഞ്ഞ് ചവിട്ടി , നിലത്തേയ്ക്ക് വീഴാനായി പോയ അവനൊന്ന് ബാലൻസ് ചെയ്ത് നിന്നതും വേറൊരുവൻ വാൾ ആദിയുടെ കഴുത്തിന് നേരെ വീശിയതും ഒരുമിച്ചായിരുന്നു … തന്റെ കഴുത്തിന് നേരെ വരുന്ന കൂർത്ത മൂർച്ചയേറിയ ആ വാളിന്റെ തിളക്കം കണ്ണിൽ തട്ടിയ സമയം , ഒരു നൂലിട വ്യത്യാസത്തിൽ ആ വാൾ അവന്റെ കഴുത്തിൽ തൊടാതെ വഴുതി മാറി …

ആ സമയം തന്നെ ആദി തന്റെ കാലിൽ ചുറ്റി വച്ചിരുന്ന ബ്ലഡ് റീപ്പർ ചുഴറ്റി മുന്നിലേക്കെറിഞ്ഞു , അത് തന്നെ ചവിട്ടിയവന്റെ കഴുത്ത് ചുറ്റി മുറുകിയ സമയം വളരെ വേഗത്തിൽ തന്നെ അവനാ ബ്ലഡ് റീപ്പർ തിരികെ ശക്തിയിൽ പുറകിലേക്ക് വലിച്ചു …. കഴുത്തിൽ ചുറ്റിയ ബ്ലഡ് റീപ്പർ മുറുകിയ സമയം അതിന്റെ അഗ്രഭാഗത്തെ ബ്ലൈഡ് അവന്റെ കഴുത്ത് കീറി മുറിച്ചു കൊണ്ട് അയഞ്ഞു മാറി . അവനും കഴുത്തിലെ മുറിവിൽ നിന്നും രക്തം ചീറ്റിച്ചു കൊണ്ട് നിലത്തേയ്ക്ക് പിടഞ്ഞ് വീണു ….

അവസാനം ഒരുവൻമാത്രം , മുന്നിൽ നടന്ന എല്ലാം കണ്ട് നിന്ന അവന്റെ ശരീരവും മനസ്സും ഒരുപോലെ ഭയന്ന് വിറയ്ക്കുന്നുണ്ടായിരുന്നു . ചുറ്റിലും നടന്ന സംഭവങ്ങൾ അവനിൽ യാഥാർത്ഥ്യം എന്തെന്ന് കാട്ടിക്കൊടുത്തതു പോലെ . എതിർത്താൽ തന്റെ മരണവും ഉറപ്പാണെന്ന് അവൻ തിരിച്ചറിഞ്ഞു കഴിഞ്ഞിരുന്നു .

ഇതേ സമയം അവർക്കടുത്തായി നിൽക്കുന്ന ഒരു ഉയരം കൂടിയ ഉണങ്ങിയ മരത്തിന്റെ ചില്ലയിൽ ഇതെല്ലാം നോക്കി ഒരാളിരിപ്പുണ്ടായിരുന്നു ,