✮കൽക്കി࿐ (ഭാഗം – 25) വിച്ചു [ചെകുത്താനെ സ്നേഹിച്ച മാലാഖ ] 917

ഒടുവിൽ എന്റെ വഴിയിൽ കാലങ്ങളായി വിലങ്ങ് തടിയായ അയാളെ അന്ന് രാത്രി ഞാൻ കീഴ്പ്പെടുത്തി ഈ തടവറയ്ക്കുള്ളിലാക്കി ബന്ധിച്ചു ഒരു അടിമയെപ്പോലെ …..

ചില ദിവസങ്ങൾക്ക് ശേഷം നവദുർഗയും നാടുകടത്തപ്പെട്ടു … ഞാൻ തിരഞ്ഞു പോയില്ല , കാരണം സമയമാവുമ്പോൾ അവൾ ഈ നാട്ടിലേക്ക് തന്നെ തിരികെയെത്തുമെന്നെനിക്കുറപ്പായിരുന്നു .

പക്ഷെ എന്റെ കണക്ക് കൂട്ടലുകൾ തെറ്റിച്ചു കൊണ്ട് അവൾ മടങ്ങിവന്നത് ഒറ്റയ്ക്കായിരുന്നില്ല . പകരം ഞാൻ എന്നോ അവസാനിച്ചു എന്ന് വിശ്വസിച്ച ആ ശത്രുവിനെയും കൊണ്ടാണവൾ വന്നത് …

അവൻ എങ്ങനെ രക്ഷപ്പെട്ടു എന്നെനിക്കറിയില്ല പക്ഷെ അന്നും ഇന്നും അവനെ എന്റെ ഉൾക്കാഴ്ചയിൽ നിന്ന് മറച്ച് പിടിച്ചത് ആ രുദ്രാക്ഷമാലയാണ് , ഇന്ദ്രജാലക്കല്ല് ജീവനായി അലിഞ്ഞ് ചേർന്ന നവദുർഗയുടെ രക്തം പുരണ്ട ആ രുദ്രാക്ഷമാല .

അവനിന്നും എനിക്ക് കാണാമറയത്താണ് … അവനെ കണ്ടെത്താം എന്ന് പറഞ്ഞ നിനക്ക് നാളുകൾ കഴിഞ്ഞിട്ടും അതിന് സാധിച്ചിട്ടില്ല . പക്ഷെ ഇന്ന് ഞാനവന്റെ വാസസ്ഥലം കണ്ട് പിടിക്കും അവന്റെ അന്ത്യം കുറിക്കാനായി അതിനു വേണ്ടിയാണീ എടുത്ത് ചാട്ടം … കളിയും കഥയും അവസാനിക്കാൻ പോകുകയാണ് ഇനി അധിക സമയമില്ല …. ”

ആത്രേയൻ വാശിയോടെ പറഞ്ഞു കൊണ്ട് ആ ഹോമകുണ്ഡത്തിനടുത്തിരുന്ന ഒരു ചെറിയ ചെമ്പ് പാത്രമെടുത്ത് അവന് നേരെ നീട്ടി …

” മ് …… കുടിക്ക് . ”

ഉറച്ച സ്വരത്തോടെ അയാളത് പറഞ്ഞതും രണദേവ് ചെറിയ ഭയത്തോടെ ആ പാത്രം കൈകളിൽ വാങ്ങിയ ശേഷം അതിലുണ്ടായിരുന്നത് കുടിച്ചിറക്കി …