ഹൃദയരാഗം 29 [Achu Siva] 1151

” അതെന്താ വാസു എന്ന് വിളിക്കുന്നെ അപ്പച്ചി ? “….

മനസ്സിൽ ഉരുണ്ടു കൂടുന്ന സംശയങ്ങള്‍ക്ക് ഉത്തരം കണ്ടെത്താനുള്ള വ്യഗ്രതയോടെ വാസുകി ചോദിച്ചു…..

തല ചെരിച്ച് അപ്പച്ചി അവളെ ഒന്ന് നോക്കി…. കണ്ണുകളില്‍ നനവ് ഉണ്ടായിരുന്നെങ്കിലും ആ മുഖത്ത് ഒരു വേദന കലര്‍ന്ന ചിരി ഉണ്ടായിരുന്നു….

” നിന്റെ അച്ഛനെ ഏട്ടന്‍ എന്നല്ലാതെ ഞാന്‍ വിളിച്ചിട്ടില്ല…. എന്നാല്‍ ആ പേടിയും, സ്നേഹവും ഒക്കെ ഉണ്ടെങ്കിലും വാസു ഒരേസമയം അമ്മയും, ചേച്ചിയും, കൂട്ടുകാരിയും ഒക്കെ ആയിരുന്നു…. ഏട്ടനോടുള്ള സ്നേഹക്കൂടുതൽ കണ്ടുള്ള കുശുമ്പും, വഴക്കും ഒക്കെയായിരുന്നു ഞങ്ങൾ എപ്പോഴും…. അതോണ്ട് ഏച്ചീന്നും, വാസൂന്നും, അവളെന്നും, നീ എന്നും ഒക്കെ വിളിക്കുമായിരുന്നു…. അച്ഛന്‍ അതിനു എന്നെ എപ്പോഴും വഴക്ക് പറയുമായിരുന്നു “….

ആ പഴയ ഓര്‍മ്മകളിലേക്ക് അപ്പച്ചി മുഴുകുന്നത് അവള്‍ കണ്ടു….

” അവരുടെ….. അല്ല…. വല്യപ്പച്ചിയുടെ പേര് അപ്പൊ എന്തായിരുന്നു ? “…..

അപ്പച്ചിയുടെ നോട്ടം കണ്ട് അവള്‍ പറയാന്‍ വന്നത് വിഴുങ്ങിയിട്ട് ചോദിച്ചു….

” അവളുടെ പേരിട്ടത് മുത്തച്ഛന്‍ ആയിരുന്നു…. ഞങ്ങൾ രണ്ട് പേര്‍ക്കും അച്ഛനും…. രാമചന്ദ്രനും, രുക്‌മിണിയും…. മുത്തശ്ശിയുടെ പേരായിരുന്നു അവൾക്ക് …. വസുന്ധര…. “….

മുഖത്തുനിന്ന് ആ ചിരി മായാതെ അവർ പറഞ്ഞു….

ഒരു ഞെട്ടലോടെയാണ് വാസുകി ആ പേര് കേട്ടത്…. അപ്പച്ചി പറഞ്ഞത് വിശ്വസിക്കാനാവാതെ അവള്‍ കണ്ണ് മിഴിച്ച് അവരെ നോക്കി….

ആ പേര് അവള്‍ മനസ്സില്‍ ഉരുവിട്ടുകൊണ്ടേയിരുന്നു….

മനസ്സിലെ സംശയങ്ങള്‍ ഒക്കെ സത്യമാകുവാണോ എന്നോർത്ത് അവള്‍ ഇരുന്ന് ഉരുകി…. മനസ്സില്‍ ഉരുണ്ട് കൂടുന്ന സംഘർഷങ്ങളാൽ അവള്‍ ബാന്‍ഡേജിടാത്ത കൈ കൊണ്ട്‌ ബെഡ് ഷീറ്റ്‌ തെരുപ്പിടിച്ചുകൊണ്ടിരുന്നു….

മറ്റെവിടെയോ ദൃഷ്ടി പതിപ്പിച്ച് ചിന്തകള്‍ മുഴുകിയിരുന്ന അപ്പച്ചി അവളുടെ മുഖത്തെ ഭാവമാറ്റം ഒന്നും കണ്ടില്ല….