ഹൃദയരാഗം 29 [Achu Siva] 1155

അപ്പോഴാണ് രാവിലെ വിനയ് കൊടുത്ത സ്വീറ്റ് ബോക്സ്‌ ടേബിളിൽ ഇരിക്കുന്നത് അവൾ കണ്ടത്….

അവൾ അത് അത്യധികം വെറുപ്പോടെയും അവജ്ഞയോടെയും കൈയിൽ എടുത്തു….

ഓഹ്…. അങ്ങേരുടെ ഒരു സ്നേഹ പ്രകടനം…. ഛേ…. ഇതും അവൾക്ക് കൊണ്ടു കൊടുക്കാൻ മേലായിരുന്നോ….

അടക്കാനാവാത്ത ദേഷ്യത്തോടെ അവൾ ആ സ്വീറ്റ് ബോക്സ്‌ താഴെക്കു വലിച്ചെറിഞ്ഞു….

എറിഞ്ഞതിന്റെ ശക്തിയിൽ അത് തുറന്നു അതിന്റെ ഉള്ളിൽ നിന്നും കുറെ സ്വീറ്റ്സ് പുറത്തേക്ക് വീണ് തറയിലേക്കും, കട്ടിലിനു അടിയിലേക്കുമൊക്കെയായി ചിതറി തെറിച്ചു….

അവൾ അതിലേക്ക് ഒന്നും കൂടെ നോക്കിയിട്ട് വെറുപ്പോടെ തല വെട്ടിച്ചു മാറ്റി….

ദേഷ്യം നിയന്ത്രിക്കാനാവാതെ അവള്‍ ആ ടേബിളില്‍ ഇരുന്ന മരുന്നുകളും മറ്റ് കവറുകളും ഒക്കെ തട്ടി കളഞ്ഞു….

അവയെല്ലാം ആ സ്വീറ്റ്സിനൊപ്പം തറയില്‍ അങ്ങിങ്ങായി കിടന്നു….

ആകെപ്പാടെ തളർന്ന വാസുകി സങ്കടത്തോടെ ബെഡിലേക്ക് ഇരുന്നു….

ദേഷ്യം ഒന്നടങ്ങിയപ്പോൾ വീണ്ടും മനസ്സിൽ സങ്കടം സ്ഥാനം പിടിച്ചു…. അവൾ തല കുനിച്ചിരുന്നു കരയാൻ തുടങ്ങി….

കുറേ കണ്ണുനീർ ഒഴുകി കഴിഞ്ഞപ്പോൾ മനസ്സിലെ വിങ്ങൽ ചെറുതായൊന്നു കെട്ടടങ്ങിയ പോലെ…. പക്ഷേ അപ്പോൾ അവളുടെ കൈകാലുകളിൽ വേദന അനുഭവപ്പെടാൻ തുടങ്ങി….

മുകളിൽ നിന്നും ഇറങ്ങി വന്നപ്പോഴോ കൈ അനാവശ്യമായി അനക്കിയപ്പോഴോ ഒന്നും അവൾ അത് ശ്രദ്ധിച്ചിരുന്നില്ല…. പക്ഷേ ഇപ്പോൾ സഹിക്കാൻ പറ്റാത്ത പോലെ വേദന….

അവൾക്ക് വല്ലാത്ത ക്ഷീണവും, വേദനയും അനുഭവപ്പെട്ടു…. കിടക്കണമെന്നു തോന്നി…. എന്നിട്ടും അവൾ ആ ബെഡിൽ തന്നെ ഇരുന്നു….

ദേവികയെ ആദ്യമായി കണ്ടത് മുതലുള്ള ഓരോ കാര്യങ്ങളായി അവൾ ഓർത്തെടുക്കാൻ തുടങ്ങി…. തെല്ലൊന്ന് അടങ്ങിയ ദേഷ്യം കൂട്ടുക മാത്രമാണ് അത് ചെയ്തത്….