ഹൃദയരാഗം 29 [Achu Siva] 1155

അവര്‍ മൂന്നുപേരും ഓരോന്നും പറഞ്ഞ് ചിരിച്ചുകൊണ്ട് റൂമിന് വെളിയിലേക്ക് വന്നു….

ഭക്ഷണം കഴിഞ്ഞ് അല്‍പ്പനേരം കൂടി കഴിഞ്ഞാണ് അപ്പച്ചി പോയത്…. ശാരദാമ്മയും, വാസുകിയും കൂടെ അവരെ യാത്രയാക്കി….

അപ്പച്ചി പോകുന്നതിന് മുന്‍പായി, ശാരദാമ്മ കാണാതെ അവള്‍ അവരോട് വല്യപ്പച്ചിയുടെ കാര്യം തല്‍ക്കാലം മഹിയേട്ടനോ, ഇന്ദുവേച്ചിയോ, മാളുവോ അറിയണ്ട എന്ന് പറഞ്ഞു….

ആദ്യം അതിനെന്താ, അവരും എന്നെങ്കിലും അറിയേണ്ടതല്ലേ എന്നൊക്കെ അപ്പച്ചി പറഞ്ഞെങ്കിലും, അവരൊക്കെ ഇത് എങ്ങനെയെടുക്കുമെന്നറിയില്ലെന്നും, പ്രത്യേകിച്ച് ഇന്ദുവേച്ചി, പിന്നെ സാവധാനം എല്ലാവരോടും പറഞ്ഞാല്‍ മതിയെന്നുമൊക്കെ അവള്‍ പറഞ്ഞപ്പോള്‍, അതാവും നല്ലതെന്ന് പറഞ്ഞ് അപ്പച്ചി സമ്മതിച്ചു….

പോകുമ്പോ വിനയ് വരുമ്പോള്‍ പ്രത്യേകം പറയണമെന്നും, വാസുകിക്ക് ഭേദമാകുമ്പോൾ രണ്ടുപേരും കൂടെ ഒരു ദിവസമെങ്കിലും താമസിക്കാന്‍ പറ്റുന്ന രീതിയില്‍ വരണമെന്നും പറഞ്ഞാണ് അപ്പച്ചി പോയത്….

അപ്പച്ചി പോകുമ്പോള്‍ അവൾക്ക് വല്ലാത്തൊരു സങ്കടം തോന്നി…. ചിറ്റപ്പനെ കണ്ടിട്ട് ഒരുപാട് നാളായി എന്ന് അവള്‍ പറഞ്ഞപ്പോള്‍ ചിറ്റപ്പനോട് ഒരുദിവസം വരാന്‍ എന്തായാലും പറയാമെന്ന് അപ്പച്ചി പറഞ്ഞു….

അവളുടെ മനസ്സില്‍ ചിറ്റപ്പനോട് വിനയ് യെ കുറിച്ചും, ആ കല്യാണാലോചന വന്നതിനെ കുറിച്ചും സംസാരിക്കണമെന്നും കൂടെ ഉണ്ടായിരുന്നു അങ്ങനെ പറയുമ്പോള്‍…. കൂടാതെ മാളു അടക്കം അവർ എല്ലാവരും കൂടി ഒരു ദിവസം ഇങ്ങോട്ട് വരാമെന്ന് അപ്പച്ചിയെ സമ്മതിപ്പിച്ച ശേഷമാണ് അവള്‍ അവരെ യാത്രയാക്കിയത്….

======== ======== ======== ======== ========

അപ്പച്ചി പോയപ്പോൾ റൂമിൽ കയറി ഇരിക്കാൻ തുടങ്ങിയതാണ് വാസുകി….

അവരുടെ ഓരോ വാക്കുകളും അവൾ വീണ്ടും വീണ്ടും ഓർത്തെടുത്തു…. അവൾക്ക് തല പൊട്ടുന്നത് പോലെ തോന്നി…. താൻ ഇത്രയും നാളും അന്വേഷിച്ചു നടന്ന സത്യം അതിന്റെ പടി വാതിൽക്കൽ വരെ എത്തിയിരിക്കുന്നു….

എങ്കിലും കാര്യങ്ങൾ എല്ലാം കൂടി കൂട്ടി വായിക്കുമ്പോൾ എവിടെയോ എന്തൊക്കെയോ പൊരുത്തക്കേടുകൾ…. ആകെപ്പാടെ സംശയങ്ങൾ കൂടി കൂടി വരുന്നു….