ശ്രാവണി 3 [Shana] 185

അർജുന്റെ മുഖം കൂടുതൽ തെളിമയോടെ മുന്നിൽ വന്നതും അവൾ കണ്ണുകൾ ഇറുക്കിയടച്ചു ശ്വാസം വലിച്ചുവിട്ടു… വേണ്ട വേണ്ടാത്ത ചിന്തകളൊന്നും മനസ്സിൽ കുടിയിരുത്തണ്ട… വെറുതെ ഇരുന്നാൽ മതിയായിരുന്നു അവരുടെ വാക്ക് കേട്ട് ഇറങ്ങിത്തിരിച്ച എന്നെ പറഞ്ഞാൽ മതിയല്ലോ… അവൾ സ്വയം ശാസിച്ചു..മുറിയിൽ ഒറ്റക്കിരുന്നു മടുത്തപ്പോൾ ശ്രാവണി താഴേക്കിറങ്ങി വന്നു… അമ്മയും അമ്മായിയുമൊക്കെ അടുക്കളയിൽ ഓരോ പണികളിൽ ഏർപ്പെട്ടിരിക്കുന്നുണ്ട്…

അമ്മേ ചെറിയമ്മാവൻ എവിടെപ്പോയി  ശ്രാവണി സുനന്ദയുടെ തോളിൽ ചാഞ്ഞുകൊണ്ട് ചോദിച്ചു

ദേവും വല്യമ്മാവനും കൂടെ കാവിലെ തുള്ളലിനുള്ള ഏർപ്പാടുകൾ ചെയ്യാൻ പോയി ഇനി ഊണിനു നോക്കിയാൽ മതി

സുനന്ദയുടെ മറുപടി കേട്ടതും ശ്രാവണിക്ക് ഉള്ളിലെ വീർപ്പുമുട്ടൽ ഒഴിഞ്ഞുപോയതുപോലെ തോന്നി. വല്യമ്മാവനുള്ളപ്പോൾ ശ്വാസം എടുക്കണമെങ്കിൽ പോലും ഭയക്കണം, ചെറിയമ്മാവൻ അങ്ങനെ അല്ല എങ്കിലും മിണ്ടാൻ പേടിയാണ്.. ഇനി കുറച്ചു നേരത്തെക്ക് സമാധാനത്തിൽ നടക്കാം. അവൾ സന്തോഷത്തോടെ പുറത്തേക്കിറങ്ങി.

മോളെ എങ്ങോട്ടേക്കാ പോകുന്നെ  ശ്രാവണി പുറത്തേക്കിറങ്ങിയത്  കണ്ടു മുത്തശ്ശി ചോദിച്ചു…

വെറുതെ ഇവിടൊക്കെ നടന്നുകാണാൻ

അധികം വെയിൽ കൊള്ളാൻ നിൽക്കണ്ട കുട്ടി… കല്യാണം ഒക്കെ നോക്കാനുള്ളതാ….. സൂക്ഷിച്ചു നടക്കണേ.. പുറത്തേക്കിറങ്ങുന്ന അവളുടെ കവിളിണകളെ തഴുകികൊണ്ടുമുത്തശ്ശി പറഞ്ഞു..

ശ്രാവണി നടന്ന് പുറകുവശത്തെ ഇലഞ്ഞി ചുവിട്ടിൽ എത്തി ഇലഞ്ഞിപ്പൂക്കളുടെ മാധക ഗന്ധം അവളെ അങ്ങോട്ടേക്ക് ആനയിച്ചു എന്നുപറയുന്നതാകും ശെരി.. ഇലഞ്ഞിപ്പൂക്കൾ കൈ നിറയെ പെറുക്കികൂട്ടി …

മോളെ ശ്രാവണി  എന്തെടുക്കുവാ …

ഹായ്.. ദേവമ്മ… അവളറിയാതെ കൈ വീശി കാണിച്ചു.. പെറുക്കി കൂട്ടിയ പൂവുകളെല്ലാം താഴെ വീണു…

ദേവമ്മ വാത്സല്യത്തോടെ ഒന്ന് ചിരിച്ചു…മോൾക്കെന്തിനാ ഇലഞ്ഞി പൂവ്…