വൈഷ്ണവം (അവസാന ഭാഗം) മാലാഖയുടെ കാമുകൻ 1452

“വിഷ്ണു..? ഇന്ന് ഇവിടെ ഉണ്ടാകുമോ..?”

എന്തോ ആലോചിച്ചു ഇരുന്ന വിഷ്ണു അത്‌ കേട്ടപ്പോൾ ഒന്ന് തിരിഞ്ഞു നോക്കി..

സ്റ്റോൺ വർക്ക്‌ ചെയ്ത കടും നീല ജോർജറ്റെ സാരിയിൽ വൈഷ്ണവി.. കഴുത്തിൽ ഒരു നെക്‌ളേസ്‌..

ചെവിയിൽ വെട്ടിത്തിളങ്ങുന്ന ഡയമണ്ട്..

“എ.. എന്താ..?”

അവൻ പെട്ടെന്ന് അറിയാതെ ചോദിച്ചു പോയി.

“അല്ലാ.. ഇവിടെ ഉണ്ടെങ്കിൽ മോളുടെ ഒപ്പം ഉണ്ടാകുമല്ലോ എന്ന് ആലോചിച്ചതാ.. എനിക്ക് ഒരു മാര്യേജിന് പോകണം.. ഓഫീസിലും ഒന്ന് കയറിയിട്ടെ വരൂ..”

അവൾ അത് പറഞ്ഞപ്പോൾ അവൻ കുറച്ചു നേരം ഒന്നും മിണ്ടിയില്ല..

“ഞാൻ ഉണ്ടാകും..”

“ഓക്കേ..”

അവൻ അത്‌ പറഞ്ഞപ്പോൾ മറുപടി പറഞ്ഞവൾ പുറത്തേക്ക് നടന്നു..

പതിവില്ലാതെ അവൾ എപ്പോഴോ വാങ്ങി ഗാരേജിൽ ഇട്ട ചുവന്ന നിറമുള്ള ഒരു ഔടി ക്യു സെവൻ ആയിരുന്നു എടുത്തത്..

അവൾ അത്‌ ഓടിച്ചു പുറത്തേക്ക് പോകുന്നത് വിഷ്ണു ഒന്ന് നോക്കി നിന്നു..

അതിന് ശേഷം അവൻ വാവയുടെ അടുത്തേക്ക് പോയി..

•••

“എന്തൊരു മാറ്റമാ നിനക്ക്..? ഇങ്ങനെ നിന്നെ കണ്ടിട്ട് ഒരുപാട് നാൾ ആയെടി..”

ഭദ്ര നല്ല സന്തോഷത്തിൽ ആയിരുന്നു.. വൈഷ്ണവിയെ പഴയ പോലെ കണ്ടിട്ട് അവൾക്ക് ആയിരുന്നു സന്തോഷം..

“ഇനി എന്നും ഞാൻ ഇങ്ങനെ ആയിരിക്കും..”

വൈഷ്ണവി പുഞ്ചിരിച്ചു കൊണ്ടാണ് അത്‌ പറഞ്ഞത്.

“വിഷ്ണു ആണോ കാരണം..?”

“വിഷ്ണു ആണോ എന്ന് ചോദിച്ചാൽ യെസ്. ഹി ഈസ്‌ ഗേറ്റിങ് മാരീഡ്..”

അവൾ മേശയിൽ ഇരുന്ന പേപ്പർ വെയിറ്റ് ഒന്ന് കറക്കിക്കൊണ്ട് പറഞ്ഞു..

“വെയിറ്റ്.. വാട്ട്‌..?!”

ഭദ്ര ഒന്നും മനസിലാകാതെ അവളെ നോക്കി..

“അന്ന് കണ്ട പെണ്ണില്ലേ..? അവർ വിവാഹം ചെയ്യാൻ പോകുന്നു.. അത്‌ തന്നെ..”

വൈഷ്ണവി അത്‌ പറഞ്ഞപ്പോൾ ഭദ്ര ഒന്ന് ഞെട്ടി.. അവൾക്ക് ഒന്നും മനസിലായില്ല.

വൈഷ്ണവി തലേ ദിവസം നടന്ന കാര്യങ്ങൾ എല്ലാം പറഞ്ഞുകൊടുത്തപ്പോൾ അവൾ തരിച്ചു ഇരുന്നു പോയി..

“ഞാൻ വിചാരിച്ചു നിങ്ങൾ രണ്ടും ഓക്കേ ആയി നല്ലൊരു ലൈഫ് സെറ്റ് ആക്കും എന്ന്.. ഇതിപ്പോ..?”