‍‍രുധിരാഖ്യം-8 | rudhiraagyam-8 | Author : ചെമ്പരത്തി

[ Previous Part ]

” വിലാര……. ”

പതിയെ തല മാത്രം പുറത്തേക്ക് നീട്ടി അതിനെ കണ്ട ഇന്ദുവിന്റെ ശരീരം കഠിനമായി ഒന്ന് ഞെട്ടുന്നതും അവളുടെ ചുണ്ടുകൾ ചെറുതായി പിറുപിറുക്കുന്നതും  അറിഞ്ഞ ഏഥൻ ഞെട്ടി തിരിഞ്ഞ് അവളെ നോക്കി.

( തുടർന്ന് വായിക്കുക…………)

” നിനക്ക് എങ്ങനെ അതിന്റെ പേര് അറിയാം……?? ”

അവളെ പുറംകൈകൊണ്ട് ഒന്നുകൂടി പാറക്കെട്ടിലേക്ക് ചേർത്തു നിർത്തിയിട്ടവൻ ചോദ്യഭാവത്തിൽ അവളെ നോക്കി.

” അന്ന് മാവികയെ ഉപദ്രവിച്ച പക്ഷിയാണിത്…..അന്ന് അവളുടെ കിരീടത്തിലെ രത്നം തകർന്നു കഴിഞ്ഞപ്പോൾ എനിക്ക് അത് മനസ്സിലായി…..”

“ഉം…….. വിലാര…… അവൾ ഈ മായാവനത്തിന്റെ  കാവല്ക്കാരി ആണ്….. ഈ വനത്തിനുള്ളിൽ ഉൾപ്പെട്ടതിനെ അടക്കം എന്തിനെയും അവൾക്ക് ആക്രമിക്കാം… മനുഷ്യനെ ഒഴികെ…. മനുഷ്യനെ തൊടാൻ മാത്രം അവൾക്ക് അധികാരമില്ല…..”

നേർത്ത കാറ്റുപിടിക്കുന്ന പോലെയുള്ള ശബ്ദത്തിൽ ഏഥൻ അവളുടെ ചെവിയോരത്ത് പറഞ്ഞു. ഇളം ചൂടാർന്ന അവന്റെ നേർത്ത നിശ്വാസം ചെവിതട്ടിൽ തട്ടിയ ഇന്ദുവിന്റെ ശരീരം ഒന്ന് വിറച്ചു.

കണ്ണുകളിൽ പാറിവീണു കത്തിപ്പടർന്നു തുടങ്ങിയ ചെറിയ തിളക്കത്തോടെ അവൾ ഏഥന്റെ മുഖത്ത് തന്നെ തന്റെ കണ്ണുകൾ പതിപ്പിച്ച് നിന്നെങ്കിലും അവൻ പക്ഷേ വിലാരയിലേക്ക് മാത്രം കണ്ണുനട്ട് നിൽക്കുകയായിരുന്നു.

“സസ്സ്സ്… ”

അവന്റെ കയ്യിൽ പിടിച്ച് ഒന്ന് കുലുക്കിയിട്ട് എന്തോ പറയാൻ തുടങ്ങിയ അവളെ തിരിഞ്ഞു നോക്കി അവൻ ചുണ്ടത്ത് വച്ച് നേരിയ ശബ്ദത്തോടെ കണ്ണുരുട്ടി.

അതോടെ അവനെ പിടിച്ച അവളുടെ കൈകളുടെ മുറുക്കം അയഞ്ഞതോടൊപ്പം കണ്ണുകളിലെ തിളക്കവും പോയി മറഞ്ഞു.

അൽപ്പനേരം ആ മരത്തിന് മുകളിൽ ഇരുന്ന് തലവെട്ടിച്ച് ചുറ്റും നോക്കിയശേഷം വിലാര താഴേക്ക് പറന്നു.