മാന്ത്രികലോകം 13 [Cyril] 2157

“വളച്ചൊടിക്കപ്പെട്ട സത്യം..” അൽദീയ മറുപടി നല്‍കി. “മറ്റുള്ള ദൈവങ്ങളെ പോലെയല്ല ഒഷേദ്രസ്. അളവ് കടന്ന ശക്തിയെ മറ്റുള്ള ദൈവങ്ങളും മാന്ത്രികരും സ്വീകരിക്കാന്‍ ശ്രമിച്ചാൽ അവരുടെ ആത്മാവ് നശിക്കും.

പക്ഷേ പ്രകൃതിയില്‍ ക്രമാതീതമായി വര്‍ദ്ധിക്കുന്ന നശീകരണ ശക്തിയെ മാത്രം എത്രവേണമെങ്കിലും ഒഷേദ്രസിന് സ്വന്തം ആത്മാവില്‍ സംഭരിക്കാന്‍ കഴിയും… ശക്തി സ്വരൂപിക്കുന്നത് അനുസരിച്ച് അവന്റെ ആത്മാവിന്റെ പ്രാപ്തിയും വര്‍ധിച്ച് കൊണ്ടിരിക്കും. അങ്ങനെ സംഭവിച്ചാല്‍ ഒഷേദ്രസിന് നിഗൂഢ ശക്തികളെ പോലും നശിപ്പിക്കാനുള്ള ശേഷി ലഭിക്കും. പ്രകൃതി – നിഗൂഢ ശക്തികളേയും ഒഷേദ്രസിന് നിസ്സാരമായി നിയന്ത്രിക്കാനും പ്രാപ്തി ലഭിക്കും എന്നതാണ് സത്യം.

പിന്നീട് ഒഷേദ്രസും അവ്യവസ്ഥ-ശക്തിക്ക് തുല്യമായി മാറാനുള്ള അപായവും ഉണ്ട്. അത് സംഭവിച്ചാല്‍ പിന്നെ ആ രണ്ട് ശക്തികളുടെ പോരാട്ടം ആയിരിക്കും എപ്പോഴും… അപ്പോൾ അതിൽ പെട്ട് മറ്റുള്ള ശക്തികള്‍ എല്ലാം നശിക്കും.

അങ്ങനെയുള്ള സാഹചര്യം ഉണ്ടാവാതിരിക്കാനാണ് നശീകരണ ശക്തിയെ റീനസ് നിയന്ത്രിച്ച് അതിന്റെ സ്വഭാവത്തെ മാറ്റി എല്ലാവർക്കും കൊടുക്കുന്നത്..” അൽദീയ പറഞ്ഞു.

കുറച്ച് നേരത്തേക്ക് എല്ലാവരും അവരവരുടെ ചിന്തകളില്‍ മുഴുകിയിരുന്നു.. ആരും ആരോടും സംസാരിച്ചില്ല.

അവസാനം ഷൈദ്രസ്തൈന്യ മെല്ലെ തലയാട്ടി കൊണ്ട് അൽദീയയെ നോക്കി ചോദിച്ചു, “ഫ്രെന്നിന് എതിരായുള്ള ഈ യുദ്ധത്തിൽ നമുക്ക് വിജയിക്കാന്‍ കഴിയുമെന്ന് ഉറപ്പുണ്ടോ, അൽദീയ…?”

പക്ഷേ അൽദീയ ആ ചോദ്യത്തിന് മറുപടി പറഞ്ഞില്ല.

“ഇന്നു തുടങ്ങി മൂന്ന് മാസം തുടങ്ങുന്ന അന്ന് ഒഷേദ്രസ് ഉണരും — അതേസമയം തന്നെ ഫ്രെന്നും ഉണരും….” അത്രയും പറഞ്ഞിട്ട് അൽദീയ എന്നെയും എന്റെ കൂട്ടുകാരേയും നോക്കി. “ഒഷേദ്രസ് വിജയിച്ചാലും ഇല്ലെങ്കിലും ഒഷേദ്രസിന്റെ ആ രണ്ട് ലക്ഷം സൃഷ്ടികളെയും നശിപ്പിച്ചു കളയേണ്ട ചുമതല നിങ്ങൾ പത്തു പേര്‍ക്കാണ് എന്നതിനെ മറക്കരുത്… കാരണം ആ സൃഷ്ടികളെ നശിപ്പിക്കാൻ നിങ്ങളുടെ ശക്തിക്ക് മാത്രമേ കഴിയൂ.

എന്നിട്ട് അൽദീയ മറ്റുള്ള ദൈവങ്ങള്‍, ശില്‍പ്പി, മാന്ത്രികർ, ഐന്ദ്രികർ, യക്ഷർ എന്നിവരെ നോക്കി പറഞ്ഞു, “നിങ്ങളുടെ ഉത്തരവാദിത്വങ്ങളും ഞാൻ നേരത്തെ പറഞ്ഞു കഴിഞ്ഞു…”

അവസാനമായി അൽദീയ ഫെയറികളെ നോക്കി പറഞ്ഞു, സമയമാകുമ്പോള്‍ നിങ്ങളുടെ നിയോഗം എന്തെന്ന് നിങ്ങൾ മനസ്സിലാക്കും….”

അത്രയും പറഞ്ഞ ശേഷം അൽദീയ ഞങ്ങളെ ദുഃഖത്തോടെ നോക്കിയിട്ട് അപ്രത്യക്ഷമായി.

ഒരുപാട്‌ ചോദ്യങ്ങളും സംശയങ്ങളും ഞങ്ങളുടെ മനസില്‍ കുന്നുകൂടി. ഇതുവരെ അറിഞ്ഞിരുന്നു പല കാര്യങ്ങളും വ്യത്യസ്തത മുഖങ്ങളുള്ള സത്യങ്ങൾ ആയിരുന്നുവോ…?

“ഫ്രെൻ എല്ലാം നശിപ്പിക്കും എന്നാണോ നിങ്ങളും വിശ്വസിക്കുന്നത്…?” സാഷ പെട്ടന്ന് ചോദിച്ചു.

ഞാൻ അവളുടെ മുഖത്ത് നോക്കി…. എന്നിട്ട് എന്റെ മറ്റ് സുഹൃത്തുക്കളെയും. ഒരു തീരുമാനത്തില്‍ എത്താന്‍ കഴിയാത്ത മുഖഭാവം ആയിരുന്നു എല്ലാവരിലും — സാഷ പോലും.

“എല്ലാറ്റിനെയും ഫ്രെൻ നശിപ്പിക്കും എന്നു നിനക്ക് ഉറപ്പുണ്ടായാൽ നീ എന്തു തീരുമാനമെടുക്കും, സാഷ…?” ഷൈദ്രസ്തൈന്യ അലിവോടെ ചോദിച്ചു.