മാന്ത്രികലോകം 13 [Cyril] 2155

അത് എന്തുതന്നെയായാലും, അവ്യവസ്ഥ-ശക്തി ഒരു സമുന്നത ശക്തി ആയതുകൊണ്ട്, മറ്റൊരു ശക്തിയേയും തനിക്ക് തുല്യമായോ തനിക്ക് മുകളില്‍ ഉയരാനും അവ്യവസ്ഥ-ശക്തി അനുവദിക്കില്ല….” അൽദീയ വിശദീകരിച്ചു.

“പക്ഷേ അതും, ഫ്രെൻ – ഒഷേദ്രസ് തമ്മിലുള്ള ശത്രുതയും തമ്മില്‍ എന്താണ് ബന്ധം…?” ഹഷിസ്ത്ര ചോദിച്ചു.

“ബന്ധമുണ്ട് ഹഷിസ്ത്ര…” അൽദീയ ഗൗരവത്തിൽ തന്നെ പറഞ്ഞു. “അവ്യവസ്ഥ-ശക്തി ഒരിക്കലും മറ്റുള്ള ജീവികള്‍ക്കോ ശക്തികള്‍ക്കോ അതിന്റെ ശക്തിയെ പകര്‍ന്നു കൊടുക്കാൻ ആഗ്രഹിക്കുന്നില്ല. അതുകൊണ്ടാണ് അവ്യവസ്ഥ-ശക്തിയിൽ ബന്ധനം സൃഷ്ടിക്കുന്ന എല്ലാ ശക്തികളുടെയും ആത്മാവിനെ പരിണാമം പ്രാപിക്കും മുന്നേ ആ ശക്തി നശിപ്പിച്ചു കളയുന്നത്….”

“അതിന്റെ കാരണം…?” ശില്‍പ്പി ഇടക്ക് കയറി ചോദിച്ചു

“അവ്യവസ്ഥ-ശക്തി ഏറ്റവും ഉയർന്ന ശക്തിയെ കുറിച്ച് മനസ്സിലാക്കി ആ ശക്തിയില്‍ നിന്നും ഊര്‍ജ്ജം നേടി നിഗൂഢ ശക്തികളെക്കാൾ ഉയർന്ന ശക്തി നേടിയത് പോലെ, മറ്റൊരു ശക്തിയും നേടാൻ പാടില്ല എന്ന ചിന്തയാണ് കാരണം. അങ്ങനെ സംഭവിച്ചാല്‍ ആ ശക്തിക്ക് ഒരുപക്ഷേ അവ്യവസ്ഥ-ശക്തിയെ പോലും നശിപ്പിക്കാന്‍ സാധിച്ചേക്കും എന്ന ഭയം അവ്യവസ്ഥ-ശക്തിക്ക് ഉണ്ട്.

പക്ഷേ മനുഷ്യരും, മാന്ത്രികരും, ദൈവങ്ങളും, മാന്ത്രിക ജീവികളും എല്ലാം എപ്പോഴും എല്ലാ തരത്തിലുള്ള പരീക്ഷണങ്ങളും നടത്തിക്കൊണ്ടിരിക്കുന്നു. അതുകൊണ്ട്‌ ഇന്നല്ലെങ്കില്‍ നാളെ ആ ഉയർന്ന നിലയിലുള്ള ശക്തിയെ കുറിച്ച് നമ്മള്‍ അറിയാൻ ഇടയുണ്ട്. അങ്ങനെ സംഭവിച്ചാല്‍ നമ്മളും ആ ശക്തിയില്‍ നിന്നും ഊര്‍ജ്ജം നേടി ചിലപ്പോ അവ്യവസ്ഥ-ശക്തിയെ പോലും നശിപ്പിക്കും എന്നത് കൊണ്ടാണ് അവ്യവസ്ഥ-ശക്തി എല്ലാ സൃഷ്ടികളേയും ഉന്മൂലനം ചെയ്യാൻ തീരുമാനിച്ചത്. അതുകൊണ്ടാണ് പ്രകൃതി ശക്തികളേയും നിഗൂഢ ശക്തികളേയും എല്ലാം അതിന്റെ നിയന്ത്രണത്തിൽ ആക്കാനും അവ്യവസ്ഥ-ശക്തി ശ്രമിക്കുന്നത്.

അതിന് വേണ്ടിയാണ് അത് ഫ്രെൻ എന്ന മാരക ആയുധത്തെ സൃഷ്ടിച്ചത്. പക്ഷേ തുടക്കം മുതലേ ഞാനും നിഗൂഢ ശക്തികളും അവ്യവസ്ഥ-ശക്തി പ്രതീക്ഷിക്കാത്ത കുരുക്കുകള്‍ മെനഞ്ഞ് കൊണ്ടിരുന്നു.

ഒഷേദ്രസിന്റെ രക്തം, ഘാതകവാൾ, ക്ഷണകാന്തി പക്ഷി, പ്രകൃതിയുടെ ഊര്‍ജ്ജം, ദ്രാവക അഗ്നിയുടെ സത്ത… അങ്ങനെ അതെല്ലാം ശക്തികളേയും ഫ്രെന്നിന് എതിരായി പ്രവർത്തിപ്പിക്കാൻ വേണ്ടി ഞങ്ങൾ സൃഷ്ടിച്ച നിയന്ത്രണ ശക്തികള്‍ ആയിരുന്നു.

അവ്യവസ്ഥ-ശക്തി ഫ്രെന്നിനെ എന്തിനു വേണ്ടിയാണോ സൃഷ്ടിച്ചത്, ഫ്രെന്നിന്റെ ആ സ്വഭാവ ശക്തിയെ… ആ വ്യക്തിത്വത്തെ ഞങ്ങൾ ഒരുപാട്‌ പരീക്ഷണങ്ങള്‍ക്ക് ശേഷം മാറ്റിയെടുത്തു. പക്ഷേ ഫ്രെൻ പിന്നെയും അവന്റെ യഥാര്‍ത്ഥ വ്യക്തിത്വം സ്വീകരിക്കാന്‍ ഇടയായാൽ മാത്രമേ ക്ഷണകാന്തി പക്ഷിയും മറ്റുള്ള നിയന്ത്രണങ്ങളും ഫ്രെന്നിന് എതിരായി പ്രവർത്തിക്കാൻ ആരംഭിക്കുകയുള്ളു — അവന്‍ ‘അവ്യവസ്ഥ-ശക്തി’ എന്ന അവന്റെ പഴയ വ്യക്തിത്വത്തെ സ്വീകരിക്കാതെ ഇരുന്നാല്‍ അവനിലുള്ള ആ നിയന്ത്രണങ്ങള്‍ ഒഷേദ്രസിനെ നശിപ്പിക്കാന്‍ അവനെ സഹായിക്കുമായിരുന്നു…”

ഇതെല്ലാം കേട്ടു ഞങ്ങൾ തറഞ്ഞതു പോലെ മിഴിച്ചു നിന്നു.

“ഇപ്പോഴും ഫ്രെൻ – ഒഷേദ്രസ് തമ്മിലുള്ള ശത്രുത ഞങ്ങൾക്ക് മനസ്സിലായില്ല…!! ഒഷേദ്രസും ഫ്രെന്നും തമ്മില്‍ യുദ്ധം നടന്നാല്‍ ആരെങ്കിലും ഒരാൾ നശിക്കും… അതോ രണ്ടു പേരും നശിക്കാൻ സാധ്യതയുണ്ടോ…? എന്തുതന്നെയായാലും അത് നന്മയുടെ ഭാഗത്തിന് ഗുണം മാത്രമല്ലേ ഉണ്ടാക്കുകയുള്ളു…? അപ്പൊ പിന്നെ എന്തുകൊണ്ട്‌ അവർ ഒന്നായി നന്മയുടെ ഭാഗത്തുള്ള എല്ലാവരെയും നശിപ്പിക്കുന്നില്ല…?” ലാവേഷ് സംശയത്തോടെ ചോദിച്ചു.

“ശത്രുത കാരണമല്ല ഫ്രെന്നും ഒഷേദ്രസും തമ്മിലുള്ള ഈ യുദ്ധം നടക്കാൻ പോകുന്നത്…” അൽദീയ എല്ലാവരുടെയും മുഖത്ത് കണ്ണോടിച്ചു കൊണ്ട് പറഞ്ഞു. “അവ്യവസ്ഥ-ശക്തിയുടെ പ്രധാന ആവശ്യമാണ് ഒഷേദ്രസിനെ നശിപ്പിക്കുക എന്നത്….”

അതുകേട്ട് ഞങ്ങൾ വായും പൊളിച്ചു നിന്നു.