മാന്ത്രികലോകം 13 [Cyril] 2155

“ഇവിടെ നിങ്ങൾ എല്ലാവരും ‘നന്മ-തിന്മ’ എന്ന രണ്ട് ശക്തികളെ കുറിച്ച് മാത്രമാണ് ചിന്തിക്കുന്നത്… എന്നാൽ നന്മയും തിന്മയും എന്താണെന്ന് പോലും നിങ്ങള്‍ക്ക് മനസ്സിലാക്കാൻ കഴിഞ്ഞിട്ടില്ല. പക്ഷേ അവ്യവസ്ഥ-ശക്തി എന്ന യാഥാർത്ഥ്യം എന്താണെന്നും നിങ്ങൾ വിസ്മരിക്കുന്നു….”

അൽദീയ പറഞ്ഞതിന്റെ പൊരുള്‍ മനസിലാവാതെ ഞങ്ങൾ ചോദ്യ ഭാവത്തോടെ അവരെ നോക്കി.

“കൊലപാതകം മാത്രം ചെയ്യുന്ന നിങ്ങളുടെ ഒരു ശത്രുവിനെ നിങ്ങൾ നശിപ്പിച്ചു എന്നിരിക്കട്ടെ… അപ്പോൾ ആ വ്യക്തിയെ നിങ്ങൾ നശിപ്പിക്കുന്നത് നന്മയുടെ ഭാഗമായിട്ടാണോ നിങ്ങൾ കരുതുന്നത്…?” അൽദീയ അക്ഷമയോടെ ചോദിച്ചു.

ഞങ്ങൾ ആലോചനയോടെ അവരെ നോക്കി നിന്നു. എല്ലാ മുഖത്തും സംഭ്രാന്തി പടരാനും തുടങ്ങി.

“എത്ര വലിയ കുറ്റം ആ വ്യക്തി ചെയ്തിരുന്നാലും നിങ്ങൾ ആ വ്യക്തിയെ നശിപ്പിക്കുകയാണ് ചെയ്തത്… അതിനര്‍ത്ഥം നിങ്ങളും തിന്മ ചെയ്തു എന്നാണ്. മറ്റുള്ളവരുടെ നന്മയ്ക്ക് വേണ്ടി ആയാലും മറ്റുള്ളവരുടെ നാശം കരുതി ആയാലും ഒരു കൊലപാതകം തിന്മ തന്നെയാണ്. ഈ ലോകത്തെ രക്ഷിക്കാൻ വേണ്ടി ഒരു കൊലപാതകം ചെയ്താൽ പോലും അത് തിന്മയുടെ ഭാഗം തന്നെയാണെന്നു ഓര്‍ക്കുക. അതിനെ ന്യായീകരിക്കാൻ നമുക്ക് കഴിയുമെങ്കിലും ആ പ്രവര്‍ത്തി തിന്മയുടെ ഭാഗം തന്നെയാണ്. ആ സാഹചര്യത്തിൽ അവിടെ നന്മ എന്ന വാക്കിനും, പ്രവർത്തിക്കും, നന്മ എന്ന ശക്തിക്കും എല്ലാം എന്തു പ്രസക്തിയാണുള്ളതു…..?”

അൽദീയയുടെ ചോദ്യങ്ങള്‍ക്ക് മറുപടി നൽകാൻ ആര്‍ക്കും കഴിഞ്ഞില്ല…. ഞങ്ങളാരും മിണ്ടിയില്ല.

“തിന്മ എന്ന പ്രവൃത്തിയെ സ്നേഹിക്കുന്നവര്‍, ശക്തി കൂടിയവർ ആയാലും കുറഞ്ഞവർ ആയാലും, ഒരു കൂട്ടമായി മാറുന്നു… ചേരുന്നു.. ഒരു സമൂഹമായി മാറി അവർ ഒരുമിച്ചു പ്രവര്‍ത്തിക്കുന്നു.

അതുപോലെ തന്നെ നന്മ ചെയ്യുന്നു എന്നു കരുതുന്നവരും കൂട്ടമായി… സമൂഹമായി മാറുന്നു…. മറ്റുള്ളവരുടെ സന്തോഷവും സമാധാനവും നിലനിര്‍ത്താന്‍ വേണ്ടി മറ്റേ സമൂഹത്തിന്‌ എതിരായി അവർ നാശം വിതയ്ക്കുന്നു…. പക്ഷേ ആ രണ്ടു സമൂഹങ്ങളും അവരവരുടെ സമൂഹത്തില്‍ പെട്ടവരെ സ്നേഹിക്കുന്നു… ചിലര്‍ എതിര്‍ സമൂഹത്തില്‍ ഉള്ളവരെ പോലും സ്നേഹിക്കുന്നു.

ഞാനും നന്മയുടെ പ്രതീകമാണ്.. നിഗൂഢ ശക്തികളും നന്മയുടെ പ്രതീകമാണ്… പക്ഷേ അവ്യവസ്ഥ-ശക്തി ഫ്രെന്നിനെ സൃഷ്ടിച്ച ആ നിമിഷം തൊട്ടെ അവനെ എങ്ങനെ നിയന്ത്രിക്കാം… എങ്ങനെ നശിപ്പിക്കാം എന്നു ചിന്തിക്കുകയും, അതിനുവേണ്ടി പ്രയത്നിക്കുകയും മാത്രമാണ് ഞങ്ങൾ കൂടുതലും ചെയ്തിട്ടുള്ളത്. അപ്പോ മറ്റൊരു ശക്തിയെ നശിപ്പിക്കണം എന്നോ നിയന്ത്രിക്കണം എന്നോ ചിന്തിക്കുന്ന ഞങ്ങൾക്ക് എങ്ങനെയാണ് നന്മയുടെ പ്രതീകമായി നിലനില്‍ക്കാന്‍ കഴിയുക….? പക്ഷേ അപ്പോൾ പോലും ഞങ്ങളും എല്ലാ സൃഷ്ടികളേയും സ്നേഹിക്കുക തന്നെ ചെയ്യുന്നു.

ഒഷേദ്രസ് എല്ലാ ജീവികളെയും ശക്തികളേയും അവന്റെ കാല്‍ കീഴില്‍ നിര്‍ത്താന്‍ മാത്രമാണ് ശ്രമിക്കുന്നത്. എല്ലാവരെയും അവന്റെ അനുസരണയിലുള്ളവരായി മാറ്റാനും അവന്‍ ശ്രമിക്കുന്നു. എല്ലാ ശക്തികളിലും പരീക്ഷണങ്ങൾ നടത്തി പുതിയ ജീവികളേ സൃഷ്ടിക്കാനും ശ്രമിക്കുന്നു… പക്ഷേ ഒഷേദ്രസ് പോലും അവന് എതിരായി തിരിഞ്ഞു അവനെ നശിപ്പിക്കാന്‍ ശ്രമിക്കുന്നവരെ മാത്രമാണ് നശിപ്പിച്ചിട്ടുള്ളത്. ഫെയറി ലോകത്ത് നടന്ന യുദ്ധത്തിൽ അനാവശ്യമായി ആരെയും കൊല്ലരുത് എന്നും അവന്റെ സൃഷ്ടികള്‍ക്ക് അവന്‍ താക്കീതു പോലും നല്‍കിയിരുന്നു… എല്ലാവരെയും അടിമകളാക്കി മാറ്റുക എന്ന ചിന്തയാണ് ഒഷേദ്രസിനുള്ളത്. അതുകൊണ്ട്‌, ഒന്നുമില്ലെങ്കിലും ഒഷേദ്രസ് അവന്റെ അടിമകളെ സ്നേഹിക്കുന്നു എന്നു പോലും നമുക്ക് വിലയിരുത്താന്‍ കഴിയും.

പക്ഷേ ഇവിടെ, പണ്ടു തൊട്ടേ അവ്യവസ്ഥ-ശക്തി എല്ലാ സൃഷ്ടികളേയും ഉന്മൂലനം ചെയ്യാൻ മാത്രമാണ് ശ്രമിച്ചു കൊണ്ടിരിക്കുന്നത്… പിന്നേ നിഗൂഢ