മാന്ത്രികലോകം 13 [Cyril] 2155

അൽദീയ പറഞ്ഞത് കേട്ട ഞങ്ങൾ എല്ലാവരും അന്ധാളിച്ചു നിന്നു.

“ഫ്രെൻ ദൈവങ്ങളെ പ്രേരിപ്പിക്കുകയും അവരെ നയിക്കുകയും ചെയ്തു എന്നോ…?” ഉജ്ജ്വല കണ്ണുരുട്ടി കൊണ്ട് ചോദിച്ചു.

“സത്യമാണ് ഉജ്ജ്വല…”

“വെറും പതിനേഴ് വയസ്സായ ഫ്രെൻ എങ്ങനെയാണ് ആയിരക്കണക്കിന് വര്‍ഷങ്ങള്‍ക്കു മുമ്പ് ദൈവങ്ങളെ പ്രേരിപ്പിച്ച് നിങ്ങളെ സൃഷ്ടിച്ചത്…?” ഞാൻ ചോദിച്ചു.

“ഷൈദ്രസ്തൈന്യയിൽ നിന്നും ഫ്രെൻ ജനിച്ച ശേഷം മാത്രമാണ് അവനെ നിങ്ങൾ അറിയുന്നത്. പക്ഷേ ലക്ഷക്കണക്കിന് വർഷങ്ങൾക്ക് മുൻപ് തൊട്ടേ അവനെ എനിക്കറിയാം, ദനീർ…”

“എന്തു വിഡ്ഡിത്തമാണ് നീ പറയുന്നത്, അൽദീയ..?!” ഷൈദ്രസ്തൈന്യ അന്ധാളിപ്പോടെ ചോദിച്ചു.

“വിഡ്ഢിത്തമല്ല ഞാൻ പറഞ്ഞത് ഷൈദ്രസ്തൈന്യ…” വളരെ ഗൗരവമായി തന്നെ അൽദീയ പറഞ്ഞു. “സത്യത്തിൽ ഫ്രെൻ ആരാണെന്ന് നിങ്ങള്‍ക്ക് അറിയില്ല… യഥാര്‍ത്ഥത്തില്‍ ഫ്രെൻ ആരാണെന്ന സത്യം നിഗൂഢ ശക്തികള്‍ക്കും എനിക്കും മാത്രമേ അറിയൂ. എന്നാൽ പണ്ട് ഒഷേദ്രസ് ഫ്രെന്നിനെ ഒരിക്കല്‍ കണ്ടിട്ടുണ്ട് എങ്കിലും ഇപ്പോഴത്തെ ഫ്രെന്നിനെ ഇന്നലെ വരെ ഒഷേദ്രസിന് തിരിച്ചറിയാൻ കഴിഞ്ഞിരുന്നില്ല…. പക്ഷേ ഇപ്പോൾ ഫ്രെൻ ആരാണെന്ന് ഒഷേദ്രസ് മനസ്സിലാക്കി കഴിഞ്ഞു.

പ്രകൃതി നിങ്ങൾ ദൈവങ്ങളെ സൃഷ്ടിച്ച ശേഷം പല സാഹചര്യങ്ങളില്‍ പ്രകൃതി ശക്തി നിങ്ങളെ പ്രേരിപ്പിച്ചിരുന്നു — ഊര്‍ജ്ജ ശക്തിയില്‍ ലയിക്കാന്‍. പക്ഷേ നിങ്ങൾ എല്ലാവരും പിന്മാറി.

ഒരു തവണയെങ്കിലും പ്രകൃതിയുടെ ഊര്‍ജ്ജ ശക്തിയില്‍ ലയിക്കാനുള്ള ധൈര്യം നിങ്ങൾ ദൈവങ്ങള്‍ കാണിച്ചിരുന്നെങ്കിൽ, പല സത്യങ്ങളും നിങ്ങള്‍ക്കു വെളിപ്പെടുമായിരുന്നു. പല നിഗൂഢതകളേയും നിങ്ങള്‍ക്ക് തിരിച്ചറിവായി നേടാനും കഴിയുമായിരുന്നു…. ഇപ്പോൾ ഉള്ളതിനേക്കാൾ പല ആയിരമിരട്ടി ശക്തി പണ്ടേ നിങ്ങളില്‍ വര്‍ദ്ധിക്കുമായിരുന്നു… വരാൻ പോകുന്ന ഈ അവസാന യുദ്ധത്തെ കുറിച്ച് നിങ്ങള്‍ക്ക് ചില ധാരണകളെങ്കിലും ലഭിക്കുമായിരുന്നു….”

അത്രയും പറഞ്ഞ ശേഷം അൽദീയ എല്ലാ ദൈവങ്ങളെയും തറപ്പിച്ചു നോക്കി.

“ശെരിക്കും ഫ്രെൻ ആരാണ്…..?” ഹഷിസ്ത്ര ആശങ്കയോടെ ചോദിച്ചു.

“പണ്ട്‌ പ്രകൃതി ശക്തി ഉത്ഭവിച്ചപ്പോൾ…. ഇപ്പോൾ നിങ്ങൾ അറിയുന്ന ഈ പ്രകൃതി ശക്തി പോലെ ആയിരുന്നില്ല പണ്ടത്തെ ആ പ്രകൃതിശക്തി….,

ആറ് ഉയർന്ന ശക്തികള്‍, അവരുടെ ആത്മാവില്‍ നിന്നും ഉത്ഭവിച്ച സത്തകളെ ഒന്നായി കൂടിച്ചേർത്തു. അപ്പോൾ ആ ശക്തികള്‍ പരിവര്‍ത്തിച്ച് പ്രപഞ്ചം എന്ന ശരീരത്തിൽ വ്യത്യസ്ത ശക്തികളായി ജനിച്ചതാണ് ‘പ്രകൃതി’ എന്നു പറയപ്പെടുന്ന മൂന്ന് ശക്തികള്‍.

ആ മൂന്ന് ശക്തികളില്‍ ദുര്യോഗം-അവ്യവസ്ഥ-ശക്തി എന്ന അവ്യവസ്ഥ-ശക്തിക്ക് മാത്രമാണ് തിരിച്ചറിവ് ഉണ്ടായിരുന്നത്…”

“അപ്പോൾ മറ്റുള്ള രണ്ട് ശക്തികള്‍ എന്തൊക്കെയാണ്…?” ജാസർ ഇടക്ക് കയറി ചോദിച്ചു.

“ ‘സൃഷ്ടി’ ‘നശീകരണം’ അതാണ് മറ്റുള്ള രണ്ടു ശക്തികള്‍. അതിനെ ‘നന്മ’ ‘തിന്മ’ എന്നും പറയാറുണ്ട്…”