മാന്ത്രികലോകം 13 [Cyril] 2155

കഴിഞ്ഞില്ലെങ്കിലും, അവന്റെ ഉള്ളില്‍ അവന് എതിരായി പ്രവർത്തിച്ചു കൊണ്ടിരുന്ന ഒട്ടുമിക്ക ശക്തികളെയും അവന്ന് പുറന്തള്ളാൻ കഴിഞ്ഞിരുന്നു…

പക്ഷേ അവന്റെ ശക്തിയില്‍ ഏർപ്പെടുത്തിയിരുന്ന ബന്ധനത്തെ മാത്രം അവന് ലവലേശം പോലും നശിപ്പിക്കാന്‍ കഴിഞ്ഞില്ല…

അത് എന്തുതന്നെയായാലും, ഫ്രെന്നിന്റെ ശേഷിച്ച പത്ത് ശതമാനം ശക്തിയും മെല്ലെ ക്ഷയിക്കാൻ തുടങ്ങിയിരുന്നു. കൂടാതെ അവന്റെ എല്ലാ ഓര്‍മകള്‍ പോലും അവന്റെ ബോധ മനസില്‍ നിന്നും മറയാന്‍ തുടങ്ങിയിരുന്നു… അവന്റെ ഉപബോധ മനസ്സിലും ശക്തി കുറഞ്ഞ ഒരു ചെറിയ തടസ്സത്തെ സൃഷ്ടിക്കാനും നിഗൂഢ ശക്തികള്‍ക്ക് കഴിഞ്ഞു.

ദിവസങ്ങൾ കഴിയുന്തോറും, അവന്റെ ശക്തിയില്‍ ഏർപ്പെടുത്തിയിരുന്ന ബന്ധനവും.. ഉപബോധ മനസിലെ തടസ്സവും കാരണം, ഫ്രെൻ ശെരിക്കും താന്‍ ആരാണെന്ന സത്യത്തെ മറക്കാൻ തുടങ്ങി…. പക്ഷേ അവന്റെ ഓര്‍മകളേ പൂര്‍ണമായി തുടച്ചു നീക്കാൻ നിഗൂഢ ശക്തികള്‍ക്ക് കഴിഞ്ഞിരുന്നില്ല….

എന്നാൽ അവനില്‍ എന്താണ് സംഭവിക്കുന്നത് എന്ന കാര്യം ഫ്രെൻ നേരത്തെ മനസ്സിലാക്കിയത് കൊണ്ട് അവന്റെ ഓര്‍മകള്‍ നശിക്കാൻ തുടങ്ങുന്നതിന് മുന്നേ അവൻ ഉദ്ദേശിച്ച് കാര്യങ്ങളെ അവന്‍ നിങ്ങൾ ദൈവങ്ങള്‍ മുഖേനെ നിറവേറ്റി കഴിഞ്ഞിരുന്നു — അവന്റെ ആഗ്രഹപ്രകാരം നിങ്ങൾ ദൈവങ്ങള്‍ എന്നെ സൃഷ്ടിച്ച് കഴിഞ്ഞിരുന്നു….

പ്രകൃതി ശക്തിയായ എന്നെ, അൽദീയ എന്ന അവതാരമായി സൃഷ്ടിക്കാന്‍ വേണ്ടി, ഫ്രെന്നിനിൽ ഞാൻ നേരത്തെ പകര്‍ത്തി കൊടുത്തിരുന്ന എന്റെ ജീവ ഊര്‍ജ്ജത്തെ അവന്റെ ജീവന്റെ സത്തയിൽ ബന്ധിപ്പിച്ചും…., ഫ്രെന്നിന്റെ പ്രധാന ശക്തിയായ അവ്യവസ്ഥ-ശക്തിയെ പ്രയോഗിച്ച് എന്റെ ആത്മാവിന്റെ അംശത്തെ ആവാഹിച്ച് നിങ്ങൾ ദൈവങ്ങള്‍ക്ക് ആ അംശത്തെ പകർന്നു തന്നും…, ആ പകര്‍ന്നു തന്നെ എന്റെ ആത്മാവിന്റെ അംശത്തെ ഉപയോഗിച്ച് എന്നെ സൃഷ്ടിക്കാനാണ് ഫ്രെൻ നിങ്ങളെ പ്രേരിപ്പിച്ചതും നയിച്ചതും.

അങ്ങനെയാണ് നിങ്ങൾ ദൈവങ്ങള്‍ എന്നെ സൃഷ്ടിച്ചത്….” അത്രയും പറഞ്ഞിട്ട് അൽദീയ കുറച്ച് നേരത്തേക്ക് മൗനമായി ഞങ്ങളെ വീക്ഷിച്ചു.

“അവന്റെ വെറും പത്തു ശതമാനം ശക്തി ഉപയോഗിച്ച് അവന് ഇതെല്ലാം ചെയ്യാൻ കഴിയുമെങ്കില്‍… അവന്റെ ശക്തിയില്‍ ഏര്‍പ്പെടുത്തിയ ബന്ധനം തകർന്നാൽ ഒഷേദ്രസിന് പോലും അവനെ ഒന്നും ചെയ്യാൻ കഴിയില്ല…” അയോറസ് പറഞ്ഞു.

ഒരുപാട്‌ സംശയങ്ങള്‍ എനിക്ക് ചോദിക്കാന്‍ ഉണ്ടായിരുന്നു… പക്ഷേ എന്റെ വായ ഞാൻ തുറന്നില്ല… കാരണം എന്റെ ശബ്ദം പോലും തടസ്സപ്പെട്ടു പോയതുപോലെ എനിക്കു തോന്നി.

“എന്നെ സൃഷ്ടിച്ചു കഴിഞ്ഞ മാത്രയില്‍ ഫ്രെൻ എന്ന ശക്തി എന്റെ ഗർഭപാത്രത്തിൽ സ്വയം നിക്ഷേപിക്കപ്പെട്ടു. ആ ശക്തിയെ നശിപ്പിക്കാനുള്ള ശക്തി എനിക്ക് ഇല്ലാത്തതു കൊണ്ട്, എന്നില്‍ അവന്റെ വളര്‍ച്ചയെ തടയാനും – അവന്റെ ശക്തിയുടെ വളര്‍ച്ചയെ തടയാനും വേണ്ടി എന്നെ ഞാൻ സ്വയം നിശ്ചലമാക്കി.

പക്ഷേ അപ്പോഴും ചെറിയ തോതില്‍ അവന് എന്റെ നിഗൂഢ ശക്തിയില്‍ നിന്നും, ഞാൻ മുഖേനെ മറ്റുള്ള ശക്തികളെ സ്വീകരിക്കാനും അവന് കഴിയുമായിരുന്നുവെങ്കിലും അവന്റെ വളർച്ച വെറും മന്ദഗതിയിൽ ആയിരുന്നു എന്നുമാത്രം.

ഞാനും നിഗൂഢ ശക്തികളും ഞങ്ങളുടെ ശക്തി ഉപയോഗിച്ച് അവനെ സാധാരണ മാന്ത്രികനായി മാറ്റാന്‍ ശ്രമിച്ചുകൊണ്ടിരുന്നു…. അവന്റെ യഥാര്‍ത്ഥ വ്യക്തിത്വത്തെ നശിപ്പിച്ച് അവനെ നന്മയുടെ ഭാഗമായി മാറ്റാനും ശ്രമിച്ചു കൊണ്ടിരുന്നു.