മാന്ത്രികലോകം 13 [Cyril] 2156

ഫ്രെൻ എന്ന ശക്തി വളര്‍ന്നു പൂര്‍ണ ശക്തിയെ പ്രാപിച്ചാൽ എന്തു സംഭവിക്കും എന്നു അറിയാവുന്നത് കൊണ്ട്‌ ഞങ്ങൾ ഫ്രെന്നിനെ നശിപ്പിക്കാന്‍ ശ്രമിച്ചു. പക്ഷേ ഞങ്ങൾക്ക് കഴിഞ്ഞില്ല.

അതുകൊണ്ട് പല പരീക്ഷണങ്ങള്‍ക്ക് ശേഷം – എന്റെ ആത്മാവ്, തിന്മയുടെ ഭാഗമായ പ്രകൃതിയുടെ ആത്മാവ്, പിന്നെ ഏഴു പ്രധാന നിഗൂഢ ശക്തികളുടെ ആത്മാവ്… എന്ന ഒന്‍പത് ശക്തികളുടെ ആത്മാവിന്റെ അംശത്തിൽ നിന്നുമാണ് റീനസിനെ ഞങ്ങൾ സൃഷ്ടിച്ചത്. അതുപോലെ ഞങ്ങൾ ഒന്‍പത് ശക്തികള്‍ ഒന്നായി പ്രവർത്തിച്ചാണ് ഇപ്പോൾ ഫ്രെന്നിന്റെ പക്കലുള്ള ആ ഘാതകവാളിനെ റീനസിന്റെ ആയുധമായും സൃഷ്ടിച്ചത് — റീനസിനേയും ഘാതകവാളിനേയും ഫ്രെന്നിന്റെ ഘാതകർ ആയിട്ടാണ് ഞങ്ങൾ സൃഷ്ടിച്ചത്.

അങ്ങനെ ആ ഘാതകവാളിനെ റീനസ് ഫ്രെന്നിന് എതിരായി പ്രയോഗിച്ചു….. പക്ഷേ അത്രത്തോളം ശക്തമായ ഫ്രെന്നിന്റെ ആത്മാവിനെ അത്ര നിസ്സാരമായി നശിപ്പിക്കാന്‍ ആ വാളിന് പോലും കഴിയുമായിരുന്നില്ല.

അതുകൊണ്ട്‌ അവന്റെ ആത്മാവിനെ നശിപ്പിക്കുന്നതിന് പകരം ആ വാളിന് അവന്റെ ആത്മാവിനെ നാല് ഭാഗങ്ങളായി വിഭജിപ്പിക്കാൻ മാത്രമാണ് ആദ്യ ഘട്ടത്തിൽ കഴിഞ്ഞത്. അവന്റെ ആത്മാവിന്റെ നാലില്‍ ഒരു ഭാഗം മാത്രമാണ് ഫ്രെന്നിന്റെ ഉള്ളില്‍ തന്നെ തങ്ങിയത്.

അങ്ങനെ ഓരോ ഭാഗമായി നശിപ്പിക്കാന്‍ ആയിരുന്നു ഘാതകവാൾ കരുതിയത്. പക്ഷേ ഫ്രെന്നിന്റെ ആത്മാവിനെ നാലായി വിഭജിച്ചപ്പോഴേക്കും ഘാതകവാളിന്റ്റെ ജീവചൈതന്യവും ക്ഷയിച്ചു പോയിരുന്നു. അതുകൊണ്ട് ആ വാളിനെ വീണ്ടും ഫ്രെന്നിന്റെ ആത്മാവിനെതിരെ പ്രയോഗിക്കാൻ റീനസിന് കഴിഞ്ഞില്ല.

ഒരു ഭാഗം ഫ്രെന്നിൽ തന്നെ തങ്ങി. രണ്ടാമത്തെ ഭാഗത്തെ റീനസ് തന്റെ ആത്മാവില്‍ സ്വീകരിച്ചു ബന്ധിച്ചു. പക്ഷേ ബാക്കിയുള്ള ആ രണ്ട് ഭാഗങ്ങളെയും അതുപോലെ ബന്ധിക്കാനുള്ള ശേഷി റീനസിന് ഇല്ലായിരുന്നു.

അന്നേരം ഞങ്ങൾ ഒന്‍പത് ശക്തികളും ചേര്‍ന്നു ദ്രാവക അഗ്നിയെ സൃഷ്ടിച്ചു — അതിൽ ഫ്രെന്നിന്റെ ആത്മാവിന്‍റെ മൂന്നാം ഭാഗത്തെ നിക്ഷേപിച്ചു… പക്ഷേ ദ്രാവക അഗ്നിക്ക് പോലും അവന്റെ ആത്മാവിന്റെ ഭാഗത്തെ നശിപ്പിക്കാന്‍ കഴിഞ്ഞില്ല. അതുകൊണ്ട് ദ്രാവക അഗ്നിയുടെ സത്തയിൽ അവന്റെ ആത്മാവിന്റെ മൂന്നാം ഭാഗത്തെ ഞങ്ങൾ ബന്ധിച്ചു.

ശേഷം സ്വര്‍ണ്ണ വ്യാളിയെ സൃഷ്ടിച്ച് അതിന്റെ ഉഗ്ര അഗ്നിയുടെ ശക്തി പ്രയോഗിച്ച് ആത്മാവിനെ നശിപ്പിക്കാന്‍ ഞങ്ങൾ ശ്രമിച്ചു… ഫലം ഉണ്ടായില്ല. അതുകൊണ്ട്‌ സ്വര്‍ണ്ണ വ്യാളിയുടെ ആത്മാവില്‍ ഫ്രെന്നിന്റെ ആത്മാവിന്‍റെ നാലാം ഭാഗത്തേയും ബന്ധിച്ചു.

അതിന്‌ ശേഷവും ശക്തി ക്ഷയിച്ച ഫ്രെന്നിനെ നശിപ്പിക്കാന്‍ ഞങ്ങൾ ഒരു ശ്രമം നടത്തി — ഫലം ഉണ്ടായില്ല. റീനസ് സ്വന്തം ശക്തി പ്രയോഗിച്ച് അവനെ നശിപ്പിക്കാന്‍ നോക്കി.. പക്ഷേ അപ്പോഴാണ് റീനസിന്റെ ശക്തി അവനെ നശിപ്പിക്കുന്നതിന് പകരം അവനെ ശക്തിപ്പെടുത്തുന്നു എന്ന കാര്യം ഞങ്ങൾ മനസ്സിലാക്കിയത്.

പിന്നീട് പല പരീക്ഷണങ്ങള്‍ നടത്തി.. അവസാനം ഫലമുണ്ടായി. വെറും നശീകരണ ഊര്‍ജ്ജത്തിൽ നിന്നും സൃഷ്ടിക്കപ്പെട്ട ഒരു ശക്തിക്ക് അവ്യവസ്ഥ-ശക്തിയെ പകര്‍ന്നു കൊടുക്കുക…. എന്നിട്ട് പ്രകൃതി ശക്തിയും നിഗൂഢ ശക്തികളും അവരുടെ പൂര്‍ണ ശക്തികളേയും ആ ശക്തിക്ക് നല്‍കിയാല്‍, അവ്യവസ്ഥ-ശക്തിയിൽ നിന്നും ജനിച്ച ഫ്രെന്നിനെ നശിപ്പിക്കാന്‍ സാധ്യതയുണ്ട്.

അങ്ങനെയാണ് ഒഷേദ്രസ് നശീകരണ ശക്തിയില്‍ നിന്നും ജനിക്കുന്നത്… അങ്ങനെ ആദ്യത്തെ വാളിനേക്കാൾ ശക്തിയുള്ള രണ്ടാമത്തെ ഘാതകവാളും ഫ്രെന്നിനെതിരെ പ്രയോഗിക്കാനായി സൃഷ്ടിക്കപ്പെട്ടു. പിന്നീട് സംഭവിച്ചത് നിങ്ങള്‍ക്കും അറിയാം…” അൽദീയ പറഞ്ഞ്‌ നിർത്തി.

“അപ്പോ നശീകരണ ശക്തി പ്രകൃതിയില്‍ വര്‍ദ്ധിച്ചാൽ പ്രകൃതി ശക്തികള്‍ താനേ ഒഷേദ്രസിനെ തന്റെ യജമാനനായി സ്വീകരിക്കും എന്നത്….?” ഈഫിയ ചോദിച്ചു.