മാന്ത്രികലോകം 13 [Cyril] 2157

ശക്തികളേയും പ്രകൃതി ശക്തികളേയും ബന്ധനത്തില്‍ ആകാനും ശ്രമിക്കുന്നു… ആ ശക്തിക്ക് ആരോടും സ്നേഹമില്ല — സ്വയം സ്നേഹിക്കുന്ന ഏക ശക്തിയാണ് അവ്യവസ്ഥ-ശക്തി…”

“അപ്പോ ഫ്രെൻ….?” സാഷ ചോദിച്ചു.

“അവ്യവസ്ഥ-ശക്തിയുടെ നിയന്ത്രണത്തിലുള്ള ഒരു ആയുധം മാത്രമാണ് ഫ്രെൻ. അവ്യവസ്ഥ-ശക്തി നേടേണ്ടത് നേടി കഴിഞ്ഞാൽ ഫ്രെന്നിന്റെ ആത്മാവിനെ അവ്യവസ്ഥ-ശക്തി നശിപ്പിച്ചു കളയും…. അതിന്റെ സ്വന്തം സൃഷ്ടിയായ ഫ്രെന്നിനെ പോലും ആ ശക്തി സ്നേഹിക്കുന്നില്ല…. ആ ശക്തിയാണ് യഥാര്‍ത്ഥ തിന്മ… ആ ശക്തിയുടെ പ്രതീകമായ ഫ്രെൻ യഥാര്‍ത്ഥ തിന്മയായി മാറിക്കൊണ്ടിരിക്കുന്നു…

പിന്നേ ഒഷേദ്രസും ഫ്രെന്നും തമ്മില്‍ യുദ്ധം എന്തിന് എന്ന നിങ്ങളുടെ സംശയം…..” അത്രയും പറഞ്ഞിട്ട് അൽദീയ ഓരോ മുഖത്തും നോക്കി.

ഞങ്ങള്‍ കാര്യം അറിയാനുള്ള ആകാംക്ഷയും, ഫ്രെന്നിനെ വിചാരിച്ച് വിഷമം നിറഞ്ഞ മനസ്സോടെ അൽദീയയെ നോക്കി നിന്നു.

“എന്റെയും നിഗൂഢ ശക്തികളുടെയും പ്രേരണ കൊണ്ടാണ് ഫ്രെൻ ആദ്യമായി ശില്‍പ ലോകത്ത് പോയതു – അങ്ങനെ ഘാതകവാൾ, ക്ഷണകാന്തി പക്ഷി അവന്റെ ആത്മാവില്‍ ബന്ധനം സൃഷ്ടിച്ചു.

പിന്നേ എന്റെയും നിഗൂഢ ശക്തികളുടെയും പ്രേരണ കൊണ്ടാണ് മലാഹി ഫ്രെന്നിനെ ഒഷേദ്രസിന്റെ ആ അല്‍ത്താറയിൽ എത്തിച്ചതും, ഫ്രെൻ ആ വാളിനെ ഉയർത്തുകയും… ഒഷേദ്രസിന്റെ വാള്‍ ഫ്രെന്നിന്റെ രക്തത്തെ ഊറ്റി കളഞ്ഞതും എല്ലാം.

അങ്ങനെ ചെയ്യാൻ രണ്ട് കാരണങ്ങൾ ഉണ്ടായിരുന്നു…

ആദ്യത്തെ കാരണം — ഫ്രെന്നിന്റെ രക്തത്തിന്റെ സത്തയിൽ നിന്നും അവ്യവസ്ഥ-ശക്തിയുടെ നിയന്ത്രണം അകറ്റുക എന്നതാണ്. ഫ്രെന്നിന്റെ രക്തം അകറ്റി അവനില്‍ ഒഷേദ്രസിന്റെ രക്തത്തെ പകര്‍ന്നും കൊടുത്തു. ഫ്രെന്നിന്റെ സ്വന്തം രക്തത്തിന്റെ സത്തയ്ക്ക് അവന്റെ ആത്മാവും ആയുള്ള ബന്ധം നഷ്ട്ടപ്പെട്ടപ്പോൾ, ഘാതകവാളിന്റ്റെ പിടിയില്‍ ശേഖരിക്കപ്പെട്ടിരുന്ന ഫ്രെന്നിന്റെ രക്തത്തിന് പോലും അവ്യവസ്ഥ-ശക്തിയുടെ പ്രേരണ മൂല്യം നഷ്ടമായി. പിന്നീട് ആ രക്തത്തില്‍ നിഗൂഢ ശക്തികളുടെ നിയന്ത്രണ ഊര്‍ജ്ജം കലര്‍ന്നു. പിന്നീട് ഹഷിസ്ത്ര ഫ്രെന്നിന്റെ ഹൃദയത്തിലേക്ക് ഘാതകവാൾ ഇറക്കിയപ്പോൾ നിഗൂഢ ശക്തികളുടെ നിയന്ത്രണം ഉള്ള രക്തമാണ് ഫ്രെന്നിന് ലഭിച്ചത്. അങ്ങനെ ഒരു പരിധിവരെ നിഗൂഢ ശക്തികള്‍ക്കു അവനെ നിയന്ത്രിക്കാൻ കഴിയുമായിരുന്നു.

രണ്ടാമത്തെ കാരണം — ഫ്രെന്നിന്റെ രക്തത്തിന്റെ നേരിയ അംശം ഒഷേദ്രസിന്റെ ശക്തിക്ക് പകര്‍ന്നു കൊടുക്കുക എന്ന ഉദ്ദേശ്യം ആയിരുന്നു. വെറും നശീകരണ ശക്തിയില്‍ നിന്നും ജനിച്ച് പരിണമിച്ച ഒഷേദ്രസിന്റെ ശക്തിക്ക് മാത്രമേ ഫ്രെന്നിൽ നിന്നും ലഭിച്ച അവ്യവസ്ഥ-ശക്തിയുടെ അംശത്തെ വലിയ അനന്തരഫലങ്ങള്‍ ഒന്നുമില്ലാതെ സ്വീകരിക്കാന്‍ കഴിയുമായിരുന്നുള്ളൂ. അങ്ങനെ സ്വീകരിച്ചത് കൊണ്ട്‌ ഒഷേദ്രസിന് ഫ്രെന്നിന് എതിരായി പൊരുതി ഫ്രെന്നിനെ സ്വന്തം നിയന്ത്രണത്തിൽ ആക്കാനോ ഫ്രെന്നിനെ നശിപ്പിച്ച് കളയണോ ഉള്ള സാധ്യത ഉണ്ടാക്കിയെടുക്കാനും ഞങ്ങൾക്കു കഴിഞ്ഞു.

അങ്ങനെ അവ്യവസ്ഥ-ശക്തിയിൽ ബന്ധനം സൃഷ്ടിക്കാതെ തന്നെ ഒഷേദ്രസിന് അവ്യവസ്ഥ-ശക്തിയുടെ ഊര്‍ജ്ജം ലഭിക്കുകയും ചെയ്തു… കൂടാതെ ഒഷേദ്രസിനും പ്രകൃതിവിരുദ്ധശക്തി യെ ഒരു തടസ്സവും കൂടാതെ പ്രയോഗിക്കാനും കഴിയും.

പക്ഷേ ഞങ്ങളുടെ ഈ നീക്കങ്ങള്‍ കൊണ്ട്‌ ഒഷേദ്രസിന് ലഭിച്ച കഴിവിനെ അവ്യവസ്ഥ-ശക്തി മനസ്സിലാക്കുക തന്നെ ചെയ്തു. പക്ഷേ പരോക്ഷമായി ഒഷേദ്രസിന് അവ്യവസ്ഥ-ശക്തി ലഭിച്ചത്‌ കൊണ്ടും… അവ്യവസ്ഥ-ശക്തിയിൽ ഒഷേദ്രസിന്റെ ആത്മാവിനെ ബന്ധിക്കാത്തത് കൊണ്ടും ഒഷേദ്രസിനെ അവ്യവസ്ഥ-ശക്തിക്ക് വളരെ ചെറിയ തോതില്‍ നിയന്ത്രിക്കാന്‍ കഴിയുമെങ്കിലും, അവ്യവസ്ഥ-ശക്തിയിൽ ഒഷേദ്രസ് ബന്ധനം സൃഷ്ടിക്കാത്തതു കൊണ്ട് അവന്റെ ആത്മാവിനെ അവ്യവസ്ഥ-ശക്തിക്ക് നശിപ്പിക്കാനും കഴിയില്ല എന്ന ഞങ്ങളുടെ ഊഹം തെറ്റിയില്ല.