മാന്ത്രികലോകം 13 [Cyril] 2157

ലഭിച്ചാല്‍ പോലും വളരെ സൂക്ഷിച്ചു വേണം പ്രവർത്തിക്കാൻ…. ഒഷേദ്രസിന്റെ കാര്യത്തിലും അതുതന്നെയാണ് എനിക്ക് പറയാനുള്ളത്…” അൽദീയ ഗൌരവത്തോടെ പറഞ്ഞു.

“ഒഷേദ്രസ് മാത്രമാണ് നമ്മുടെ ശത്രു എന്നാണ് ഞങ്ങൾ ഇതുവരെ കരുതിയിരുന്നത്…. പക്ഷേ ഫ്രെൻ…..” ഷൈദ്രസ്തൈന്യ അർദ്ധോക്തിയിൽ നിർത്തി. എന്നിട്ട് കുറച്ച് നേരം കണ്ണുമടച്ച് എന്തോ തിരയുന്നത് പോലെ നിന്ന ശേഷം അവർ കണ്ണ് തുറന്നു നോക്കി.

അവരുടെ കണ്ണില്‍ വേദനയും വിഷമവും നിറഞ്ഞിരുന്നു. നനവും പടർന്നിരുന്നു.

അൽദീയ പറഞ്ഞതൊന്നും എനിക്ക് ഉള്‍ക്കൊള്ളാന്‍ കഴിഞ്ഞില്ല.

ഫ്രെൻ എല്ലാ ജീവികളെയും നശിപ്പിക്കുമോ..? അവ്യവസ്ഥ-ശക്തിയുടെ ഇഷ്ടപ്രകാരം മാത്രമേ അവന് പ്രവർത്തിക്കാൻ കഴിയുകയുള്ളോ..?

എന്റെ ഉള്ളില്‍ ആയിരം ചോദ്യങ്ങൾ ഉയർന്നു. എന്റെ അടുത്തു നില്‍ക്കുന്ന സാഷയെ ഞാൻ നോക്കി… അവളുടെ മുഖത്തും എന്റെ അതേ ചിന്തകള്‍ പ്രതിഫലിച്ചു നിന്നതിനെ ഞാൻ കണ്ടു.

എന്റെ മറ്റുള്ള സുഹൃത്തുക്കളെയും ഞാൻ പാളി നോക്കി – ഫ്രെന്നിനെ കുറിച്ചു അൽദീയ പറഞ്ഞത് സത്യം തന്നെയാണെന്ന് ഞങ്ങളുടെ മനസ്സ് പറഞ്ഞെങ്കിലും ഫ്രെൻ എല്ലാ ജീവികളെയും നശിപ്പിച്ചു കളയുമെന്ന് ആരും വിശ്വസിക്കുന്നില്ല എന്നാണ് അവരുടെ മുഖത്ത് നിന്നും വായിക്കാൻ കഴിഞ്ഞത്…. പക്ഷേ സത്യത്തെ അവഗണിക്കാനും കഴിയാത്ത അവസ്ഥയില്‍ ആയിരുന്നു ഞാനും എന്റെ സുഹൃത്തുക്കളും.

ഒരു തീരുമാനത്തില്‍ എത്താന്‍ കഴിയാതെ ഞങ്ങൾ വലഞ്ഞു.

“ഒഷേദ്രസിനെ പോലെ ഫ്രെന്നും തിന്മയുടെ ഭാഗത്ത് ആണെങ്കിൽ പിന്നേ, ഫ്രെന്നും ഒഷേദ്രസും എന്തുകൊണ്ടാണ് ഒറ്റക്കെട്ടായി നിന്നു നന്മയ്ക്ക് എതിരായി യുദ്ധം ചെയ്യാതെ പരസ്പരം നശിപ്പിക്കാന്‍ ഒരുങ്ങുന്നത്…?” ശില്‍പ്പി സംശയത്തോടെ ചോദിച്ചു.

“നിഗൂഢ ശക്തികളില്‍ നിന്നാണ് അവ്യവസ്ഥ-ശക്തി ജനിച്ചതെങ്കിലും ആ ശക്തി സമുന്നത ശക്തിയാണ്. അവ്യവസ്ഥ-ശക്തിക്ക് സമാനമായ മറ്റൊരു ശക്തിയുമില്ല. കാരണം അവ്യവസ്ഥ-ശക്തി ഉത്ഭവിക്കാൻ തുടങ്ങിയ സമയമേ ആ ശക്തിക്ക് തിരിച്ചറിവ്‌ ഉണ്ടായിരുന്നു — മറ്റൊരു ശക്തിക്കും, നിഗൂഢ ശക്തികള്‍ക്ക് പോലും, ഉത്ഭവ സമയത്ത് തിരിച്ചറിവ്‌ ഇല്ലായിരുന്നു.

നിഗൂഢ ശക്തികളില്‍ നിന്നാണ് പ്രകൃതി എന്ന നന്മയും തിന്മയും കലര്‍ന്ന ശക്തികളും അവ്യവസ്ഥ-ശക്തിയും എല്ലാം ഉത്ഭവിച്ചത്. നിഗൂഢ ശക്തികളാണ് ഉന്നത നിലയിലുള്ള ശക്തി എന്നാണ് നിങ്ങൾ എല്ലാവരും കരുതുന്നത്. പക്ഷേ നിഗൂഢ ശക്തികള്‍ക്കും മുകളില്‍ മറ്റൊരു അജ്ഞാത ശക്തി ഉണ്ടെന്നും.. ആ ശക്തിയില്‍ നിന്നാണ് നിഗൂഢ ശക്തികള്‍ പോലും ഉത്ഭവിച്ചത് എന്നുമാണ് ഞങ്ങളുടെ വിശ്വസം.

കാരണം, അവ്യവസ്ഥ-ശക്തി ഉത്ഭവിച്ചു കഴിഞ്ഞ ആ നിമിഷം തന്നെ നിഗൂഢ ശക്തികളെക്കാൾ ഉയർന്ന ശക്തിയായി പരിണാമം പ്രാപിച്ച് കഴിഞ്ഞു എന്നത് എനിക്കും നിഗൂഢ ശക്തികള്‍ക്കും അറിയാം. അങ്ങനെ സംഭവിക്കണമെങ്കിൽ നിഗൂഢ ശക്തികള്‍ക്കും മുകളില്‍ മറ്റൊരു വലിയ ശക്തി ഉണ്ടു എന്നതാണ് സത്യം….”

അൽദീയ പറഞ്ഞത് കേട്ട് ഞങ്ങൾ എല്ലാവരും മിഴിച്ചു നിന്നു.

അൽദീയ തുടർന്നു, “ഉത്ഭവ സമയത്തു തന്നെ അവ്യവസ്ഥ-ശക്തിക്ക് തിരിച്ചറിവ്‌ ലഭിച്ചിരുന്ന കാരണത്താല്‍ നിഗൂഢ ശക്തികളെക്കാൾ ഉയർന്ന ശക്തി ഉണ്ടെന്ന് അവ്യവസ്ഥ-ശക്തിക്ക് മനസ്സിലാക്കാനും, ആ ശക്തിയുമായി സമ്പര്‍ക്കത്തില്‍ ഏര്‍പ്പെടാനും, ആ ശക്തിയില്‍ നിന്നും ഊര്‍ജ്ജം സ്വീകരിക്കാനും കഴിഞ്ഞു എന്നും ആണ് ഞങ്ങൾ വിശ്വസിക്കുന്നത്.