മാന്ത്രികലോകം 13 [Cyril] 2156

പെട്ടന്നു ഒരു സ്ത്രീയുടെ ശബ്ദം അന്തരീക്ഷത്തില്‍ മുഴങ്ങി ——

“ഫ്രെന്നിനെ വിശ്വസിക്കരുതെന്ന് നിന്റെ ഉപബോധ മനസ്സ് പറഞ്ഞത് ശെരിയാണ്, ഷൈദ്രസ്തൈന്യ… ഫ്രെൻ നന്മയ്ക്കെതിരായി തിരിഞ്ഞിരിക്കുന്നു…”

അതുകേട്ട് എല്ലാവരും ഞെട്ടി.

എല്ലാവരുടെ വായിൽ നിന്നും അവ്യക്തമായ പല ശബ്ദങ്ങളും ഉണ്ടായി.

ഒന്നും മനസിലാവാതെ അമ്പരപ്പോടെ ഞാൻ എന്റെ സുഹൃത്തുക്കളുടെ മുഖത്തേക്ക് നോക്കി. അവരുടെ മുഖത്തും എന്റെ അതേ വികാരങ്ങള്‍ പ്രതിഫലിച്ചു.

പെട്ടന്നു ഫെയറികളും ഷൈദ്രസ്തൈന്യയും ഫ്രെന്നിന്റെ മനസ്സിനെ വായിക്കാൻ ശ്രമിക്കുന്നത് പോലെ അവനെ ചുളിഞ്ഞു നോക്കി. പക്ഷേ ഫലമൊന്നും ലഭിക്കില്ലെന്ന് അവര്‍ക്കു തന്നെ അറിയാമായിരുന്നു.

പക്ഷേ ആ ശബ്ദം അങ്ങനെ പറയാൻ ഉണ്ടായ കാര്യമറിയാതെ എല്ലാവരും ഒരുപോലെ കുഴങ്ങി നിന്നു.

ഫ്രെൻ ഒരു കൂസലുമില്ലാതെ ശബ്ദം വന്ന ദിശയില്‍ ദൃഷ്ടി പതിച്ചു പുഞ്ചിരിയോടെ നിന്നു… പക്ഷേ അവനില്‍ ഞങ്ങൾ കണ്ടിട്ടുള്ള പുഞ്ചിരി അല്ല ഇപ്പോൾ കണ്ടത് — ഒരു വേട്ടക്കാരന്റെ പുഞ്ചിരി ആയിരുന്നു.

“അൽദീയ….” ഫ്രെന്നിന്റെ വായിൽ നിന്നും ആ വാക്കു പുറത്തേക്ക്‌ തെറിച്ചു. “എന്റെ അമ്മ…” അവന്‍ പുച്ഛത്തോടെ പറഞ്ഞു.

പെട്ടന്നുള്ള അവന്റെ ഈ ഭാവ മാറ്റാം ഞങ്ങളെ ഞെട്ടിച്ചു.

“ഫ്രെൻ….” ഷൈദ്രസ്തൈന്യ ശബ്ദമുയർത്തി വിളിച്ചു.

ഉടനെ ഫ്രെൻ തല തിരിച്ച് അവരേ നോക്കി. അവന്റെ കണ്ണുകൾ സ്വര്‍ണ്ണ നിറത്തില്‍ തിളങ്ങി… കോപവും വെറുപ്പും കണ്ണില്‍ നിറഞ്ഞു നിന്നു.

അതുകണ്ട് ഞങ്ങൾ എല്ലാവരും പതറി നിന്നു. പക്ഷേ ഷൈദ്രസ്തൈന്യ പതറാതെ അവന്റെ കണ്ണില്‍ തന്നെ നോക്കി ചോദിച്ചു ——,

“ഒഷേദ്രസിന്റെ സ്വാധീനത്തില്‍ നി വീഴുകയാണോ ചെയ്തത്…? നീ ഇപ്പോൾ ഒഷേദ്രസിന്റെ നിയന്ത്രണത്തിൽ ആണോ, ഫ്രെൻ..?”

പെട്ടന്ന് ഫ്രെന്നിന്റെ കണ്ണുകൾ ദേഷ്യത്തില്‍ ജ്വലിച്ചു… അവനില്‍ നിന്നും അതിശക്തമായ ഒരു ഊര്‍ജ്ജം പുറത്തേക്ക്‌ വ്യാപിച്ച് ഞങ്ങൾ എല്ലാവരെയും ശക്തിയായി പിന്നോട്ട് തള്ളി. ചിലരൊക്കെ താഴേ വീഴുകയും ചെയ്തു.

ഷൈദ്രസ്തൈന്യ പോലും അഞ്ചാറു അടി പിന്നോട്ട് വെച്ചുപോയി.

ഉടനെ ഫ്രെൻ പൊട്ടിച്ചിരിച്ചു.

“ഞാൻ ഒഷേദ്രസിന്റെ നിയന്ത്രണത്തിൽ ആണെന്നോ…?” ഫ്രെൻ പുച്ഛത്തോടെ ചോദിച്ചു.

എന്നിട്ട് അട്ടഹസിച്ചു ചിരിച്ചുകൊണ്ട് ഫ്രെൻ അപ്രത്യക്ഷനായി.

ഒന്നും മനസിലാവാതെ എല്ലാവരും മിഴിച്ചു നിന്നു.