മാന്ത്രികലോകം 13 [Cyril] 2157

“എല്ലാറ്റിനും കാരണങ്ങൾ ഉണ്ട്, ദനീർ..” അൽദീയ അലിവോടെ പറഞ്ഞു.

“എന്തു കാരണങ്ങൾ…?” ഷൈദ്രസ്തൈന്യ ദേഷ്യത്തോടെ ചോദിച്ചു.

“ഘാതകവാൾ, ക്ഷണകാന്തി പക്ഷി, ഫ്രെന്നിൽ ഉള്ള ഒഷേദ്രസിന്റെ രക്തം, അവനിലുള്ള മാന്ത്രിക ബോധം, അവനിലുള്ള എന്റെ ഊര്‍ജ്ജ ശക്തി, അവനില്‍ ഉള്ള ദ്രാവക അഗ്നിയുടെ സത്തയുടെ ശക്തി — അങ്ങനെയുള്ള ആ എല്ലാ ശക്തികളും, അവസാന ഘട്ടത്തിൽ ഫ്രെന്നിന്റെ ശക്തിക്ക് എതിരായി പ്രവർത്തിക്കാൻ തയാറായി നില്‍ക്കുന്ന ഞങ്ങളുടെ നിയന്ത്രണ ശക്തികള്‍ ആണ്, ഷൈദ്രസ്തൈന്യ… ഫ്രെൻ കരുതിയിരിക്കുന്നത് പോലെ ആ ശക്തികള്‍ ഒരിക്കലും അവന്റെ നേട്ടമല്ല — അവനെ പൂര്‍ണമായി ബന്ധിക്കാനുള്ള കുരുക്കുകള്‍ ആണ്…” അൽദീയ പറഞ്ഞു.

അൽദീയ പറഞ്ഞത് കേട്ട് എല്ലാവരും ഒരുപാട്‌ നേരത്തേക്ക് മിഴിച്ചു നിന്നു.

“ഒഷേദ്രസിൽ നിന്നും ഈ പ്രപഞ്ചത്തെ ഫ്രെൻ രക്ഷിക്കും… അല്ലെങ്കിൽ ഒഷേദ്രസിന്റെ അടിമയായി മാറി ഈ പ്രപഞ്ചത്തിലെ എല്ലാ ശക്തികളേയും ഒഷേദ്രസിന്റെ കാല്‍ ചുവട്ടില്‍ ആക്കാന്‍ ഫ്രെൻ സഹായിക്കും എന്ന വ്യാജ പ്രവചനത്തെ നിങ്ങൾ വ്യാപിപ്പിക്കാനുള്ള കാരണം…?” ഹെമീറ അവസാനം തലയാട്ടി കൊണ്ട് കോപത്തോടെ ചോദിച്ചു.

“ഒരുപാട്‌ കാലങ്ങളായി, കോടിക്കണക്കിന് പരീക്ഷണങ്ങള്‍ നടത്തി നൂറുകണക്കിന് ഫലപ്രദമായ മാര്‍ഗങ്ങളിലൂടെ, എന്റെ ഉള്ളില്‍ മന്ദഗതിയിൽ വളര്‍ന്നു കൊണ്ടിരുന്ന ഫ്രെൻ എന്ന ശക്തിയുടെ മാന്ത്രിക വളര്‍ച്ചയെ തടസ്സപ്പെടുത്തി അവന്റെ ഉള്ളിലുള്ള അവ്യവസ്ഥ-ശക്തിയെ ഞാനും നിഗൂഢ ശക്തികളും ചേര്‍ന്ന് കുറേശ്ശെയായി നശിപ്പിച്ച് കൊണ്ടിരുന്നു.

ഒരു ഘട്ടത്തിൽ ഫ്രെന്നിന്റെ ഉള്ളിലുള്ള അവ്യവസ്ഥ-ശക്തിയെ ഏറെക്കുറെ പൂര്‍ണമായി ഫ്രെന്നിന്റെ ആത്മാവില്‍ നിന്നും ഞങ്ങൾക്ക് അകറ്റാൻ കഴിഞ്ഞു. അവസാനം അതിന്റെ ഫലമായി അവന്റെ ഹൃദയവും ആത്മാവും മനസ്സും എല്ലാം തിന്മയേക്കാൾ കൂടുതൽ നന്മയുള്ള ശക്തിയായി നവീകരിക്കപ്പെട്ടു.

അപ്പോൾ മാത്രമാണ് ഫ്രെൻ എന്ന ശക്തി നന്മയുടെ ഭാഗത്തെ പൂര്‍ണമായി സ്വീകരിച്ച് പുതിയൊരു നന്മയുടെ വ്യക്തിത്വം സ്വീകരിച്ചത്. എന്റെ സന്തോഷത്തിന്‌ അതിരില്ലായിരുന്നു. അവനെ ഞാൻ എന്റെ സ്വന്തം മകനായി സ്നേഹിച്ചു. ഇപ്പോഴും സ്നേഹിക്കുന്നു.

അപ്പോഴാണ് എന്റെ ഉള്ളില്‍ നിന്നും ഫ്രെന്നിനെ ഷൈദ്രസ്തൈന്യയുടെ ഉത്തരത്തിലേക്ക് നിക്ഷേപിച്ചത്…”

“എന്തിനു…?” ശിബിരത്തിൽ മാന്ത്രിക ജീവികളെ കുറിച്ചു പഠിപ്പിക്കുന്ന റൈഹൻ ചോദിച്ചു.

“കാരണം, അപ്പോൾ പോലും ഫ്രെന്നിന്റെ ഉപബോധ മനസ്സിന് അതിശീഘ്രമായി എന്നിലുള്ള നിഗൂഢ ശക്തികളുടെ മറ അകറ്റി അഗാധമായ ഉന്നത രഹസ്യങ്ങളെ മനസിലാക്കാനുള്ള അപാര കഴിവും നിപുണതയും ഉണ്ടായിരുന്നു. അവന് ലഭിക്കുന്ന അപാര അറിവ് പിന്നെയും മറ്റേതെങ്കിലും പുതിയ ആപത്ത് സൃഷ്ടിക്കും എന്ന ആശങ്ക കാരണമാണ് ഞാനും നിഗൂഢ ശക്തികളും ആ തീരുമാനത്തില്‍ എത്തിയത്. കൂടാതെ ഫ്രെന്നിൽ നശീകരണ ശക്തിയുടെ അംശം വര്‍ധിച്ചു കൊണ്ടിരുന്നു. ആ ശക്തിയെ റീനസിന് അവനില്‍ നിന്നും അകറ്റാൻ കഴിയുമായിരുന്നു.

അങ്ങനെ ഫ്രെൻ ഷൈദ്രസ്തൈന്യയുടെ ഉദരത്തിൽ ആയി.

പിന്നീട് ഫ്രെൻ നന്മയുടെ ഭാഗത്ത് മാത്രം ഉറച്ച് നില്‍ക്കും എന്ന വിശ്വസം ഞങ്ങൾക്ക് ഉണ്ടായിരുന്നു….

അതുകൊണ്ട്‌ പിന്നീടുള്ള പ്രശ്നം ഒഷേദ്രസ് ആയിരുന്നു.