മാന്ത്രികലോകം 13 [Cyril] 2156

അടുത്തതായി അവർ എന്താണ് പറയാൻ പോകുന്നതെന്നറിയാൻ ഞങ്ങളും അവരെ തന്നെ ശ്വാസമടക്കി കൊണ്ട് നോക്കി നിന്നു.

“നിഗൂഢ ശക്തികളില്‍ ഫ്രെൻ പടർത്തിയ കലുഷിത ശക്തി പരിണാമം പ്രാപിച്ച് അവരെ നശീകരണ ശക്തികളായക്കി മാറ്റിയാല്‍, അതേസമയം ഫ്രെന്നിനെയും അവ്യവസ്ഥ-ശക്തിക്ക് അതിന്റെ ഊര്‍ജ്ജത്തിൽ ലയിപ്പിക്കാനും പരിണമിപ്പിക്കാനും കഴിഞ്ഞാൽ — അവ്യവസ്ഥ-ശക്തിക്ക്, ദൈവങ്ങള്‍ ഉള്‍പ്പെടെയുള്ള എല്ലാ ജീവികളേയും പ്രപഞ്ചത്തില്‍ നിന്നും ഉന്മൂലനം ചെയ്യാൻ കഴിയും.

പിന്നെ നിഗൂഢ ശക്തികള്‍ ഉള്‍പ്പെടെയുള്ള എല്ലാ ശക്തികളേയും നിയന്ത്രിച്ച് പരിണമിപ്പിച്ച് അവ്യവസ്ഥ സ്വഭാവമുള്ള ശക്തികളായ അതിന്റെ നിയന്ത്രണത്തിലുള്ള ശക്തികളാക്കി മാറ്റി എല്ലാ മാന്ത്രിക ശക്തികള്‍ക്ക് മുകളിലും അതിന്റെ ആധിപത്യം സ്ഥാപിക്കും….

സാധാരണ മനുഷ്യരോ… സാധാരണ പക്ഷിമൃഗാദികളോ… മാന്ത്രികരോ… ദൈവങ്ങളോ… മാന്ത്രിക ജീവികളോ… ഒന്നുംതന്നെ ഇല്ലാത്ത, വെറും മാന്ത്രിക ഊര്‍ജ്ജവും – മാന്ത്രിക ശക്തികളും മാത്രമുള്ള ഒരു പുതിയ പ്രപഞ്ചം ആയിരിക്കും പിന്നീട് നിലനില്‍ക്കുന്നത്.

ആ മഹാദുരന്തത്തെ തടയാനാണ് ഈ അവസാനത്തെ യുദ്ധം അരങ്ങേറാൻ പോകുന്നത്. അതിനു വേണ്ടിയാണ് ഒഷേദ്രസിനെ, നന്മയുടെ ഭാഗത്തുള്ള പ്രകൃതി ശക്തിയായ ഞാനും- തിന്മയുടെ ഭാഗമായ പ്രകൃതി ശക്തിയും – പിന്നേ നിഗൂഢ ശക്തികളും, ഉപബോധ ശക്തികളും എല്ലാം… ഞങ്ങളുടെ എല്ലാ ശക്തിയെയും ഒഷേദ്രസിന് പകര്‍ന്നു കൊടുത്ത്, ഒഷേദ്രസിനെ ഫ്രെന്നിന് തുല്യമായ ശക്തിയായി മാറ്റികൊണ്ടിരിക്കുന്നത്….

ഈ അവസാനത്തെ യുദ്ധം അവ്യവസ്ഥ-ശക്തിയുടെ പുത്രനും പ്രതിനിധിയുമായ ഫ്രെൻഷർ —— പിന്നേ തിന്മയുടെ പുത്രനും പ്രതിനിധിയുമായ ഒഷേദ്രസ് തമ്മില്‍ നടക്കാൻ പൊക്കുന്ന നിര്‍ണായക യുദ്ധം ആയിരിക്കും….”

അൽദീയ പറഞ്ഞത് കേട്ട് എല്ലാവരും ഞെട്ടി വിറച്ചു… ഭയവും ദേഷ്യവും നിസ്സഹായതയും ഞങ്ങളിൽ നിറഞ്ഞു.

“പക്ഷേ ഒഷേദ്രസ് വിജയിച്ചാല്‍ മനുഷ്യരും… മാന്ത്രികരും… പ്രകൃതി ഉള്‍പ്പെടെയുള്ള എല്ലാ ജീവികളും ഒഷേദ്രസിന്റെ അടിമയായി മാറും…” സുല്‍ത്താന്‍ ഉറക്കെ പറഞ്ഞു.

അൽദീയ അവനെ ദുഃഖത്തോടെ നോക്കി.

“ഫ്രെൻ വിജയിച്ചാല്‍…, എന്നെ പോലത്തെ ശക്തികള്‍ ഒഴികെ മനുഷ്യരുടെയും, മാന്ത്രികരുടെയും, മറ്റുള്ള എല്ലാത്തരം ജീവികളുടെയും ഉന്മൂലനം ആയിരിക്കും സംഭവിക്കുക. അതാണോ നിങ്ങൾ എല്ലാവരും ആഗ്രഹിക്കുന്നത്…? അതാണോ നിങ്ങള്‍ക്ക് വേണ്ടത്…?” അൽദീയ കടുപ്പിച്ച് ചോദിച്ചു.

അതിന്റെ ഉത്തരം ആര്‍ക്കും ഇല്ലായിരുന്നു.

സാഷ തലതാഴ്ത്തി നിന്നു. അവളുടെ കണ്ണില്‍ നിന്നും കണ്ണുനീര്‍ ഇറ്റിറ്റു വീണുകൊണ്ടിരുന്നു. ഹഷിസ്ത്രയും കരയുകയായിരുന്നു… ഷൈദ്രസ്തൈന്യ ഒരു തീരുമാനം എടുക്കാന്‍ കഴിയാത്ത പോലെ നിന്നു.

ഞാനും എന്റെ സുഹൃത്തുക്കളും എന്തുചെയ്യണം എന്നറിയാതെ കുഴഞ്ഞു മറിയുന്ന മനസ്സുമായി വിറങ്ങലിച്ച് നിന്നു.

ശെരിക്കും പറഞ്ഞാൽ ആര്‍ക്കും ഒരു തീരുമാനത്തില്‍ എത്താന്‍ കഴിഞ്ഞില്ല.

“അപ്പോപിന്നെ ഘാതകവാൾ, ക്ഷണകാന്തി പക്ഷി, നിങ്ങളുടെ ഓരോ പ്രവചനം — അതൊക്കെ എന്തിനായിരുന്നു…” അവസാനം ഞാൻ എങ്ങനെയോ ദേഷ്യത്തില്‍ അലറി.