മാന്ത്രികലോകം 13 [Cyril] 2156

തന്നെക്കാൾ വന്‍ നശീകരണ ശക്തി അതിന്റെ ബന്ധനത്തില്‍ നിന്നും രക്ഷപ്പെടാന്‍ ശ്രമിച്ചു കൊണ്ടിരിക്കുന്നതിനേയാണ് ഒഷേദ്രസിന് കാണാന്‍ കഴിഞ്ഞത് – കൂടാതെ ആ ശക്തി അവ്യവസ്ഥ-ശക്തിയിൽ നിന്നും ഉത്ഭവിച്ച ശക്തി ആണെന്ന സൂചനയും ലഭിച്ചതോടെ ഒഷേദ്രസ് നേരിയ ഭീതിയോടെ തിരികെ മടങ്ങി… അതുകൂടാതെ അധികനേരം ഒഷേദ്രസിന് പ്രകൃതിയുടെ ഊര്‍ജ്ജത്തിൽ ലയിച്ച് നിലനില്‍ക്കാനും ശക്തി ഇല്ലായിരുന്നു.

ഒരുപക്ഷേ നിങ്ങൾ ദൈവങ്ങള്‍ പണ്ട് പ്രകൃതിയുടെ ഊര്‍ജ്ജ ശക്തിയില്‍ ലയിച്ച്, ഫ്രെൻ എന്ന ശക്തി അവന്റെ ഉള്ളിലുള്ള ബന്ധനത്തെ നശിപ്പിക്കാന്‍ പൊരുതുന്നത് കണ്ടിരുന്നെങ്കിൽ, നിങ്ങള്‍ക്ക് നിഗൂഢ ശക്തികളെ സഹായിക്കാൻ ചിലപ്പോ കഴിയുമായിരുന്നു — ഒരുപക്ഷേ വെറും പത്തു ശതമാനം മാത്രം ശേഷിച്ച ഫ്രെന്നിന്റെ ശക്തിയെ പൂര്‍ണമായി ബന്ധിക്കാൻ നിങ്ങള്‍ക്ക് നിഗൂഢ ശക്തികളെ സഹായിക്കാൻ കഴിയുമായിരുന്നു. അങ്ങനെ സംഭവിച്ചിരുന്നെങ്കിൽ ഫ്രെൻ നശിച്ച് നിഗൂഢ ശക്തികളില്‍ തന്നെ അലിഞ്ഞ് ചേരുമായിരുന്നു.

പക്ഷേ വിധി എന്ന ശക്തി ഫ്രെന്നിനെ തുണച്ചു എന്നുവേണം കരുതാന്‍… നിങ്ങൾ ദൈവങ്ങള്‍ ഊര്‍ജ്ജ ശക്തിയില്‍ അലിയാൻ തുനിഞ്ഞില്ല… നിഗൂഢ ശക്തികളില്‍ നിന്നും ഉന്നത രഹസ്യങ്ങളെ മനസ്സിലാക്കാനും ശ്രമിച്ചില്ല… കഴിഞ്ഞ പതിനേഴ് വര്‍ഷത്തിനിടയില്‍ എങ്കിലും നിങ്ങളില്‍ ആരെങ്കിലും പ്രകൃതിയുടെ ഊര്‍ജ്ജ ശക്തിയില്‍ ലയിച്ചിരുന്നെങ്കിൽ ഒരു മാന്ത്രികനായി നടന്നിരുന്ന ഫ്രെൻ സത്യത്തിൽ ആരാണെന്ന് നിങ്ങൾ അറിയുമായിരുന്നു…” അത്രയും പറഞ്ഞിട്ട് അൽദീയ കുറ്റപ്പെടുത്തും പോലെ എല്ലാവരെയും ഒന്ന് നോക്കി.

ദൈവങ്ങളും ഫെയറികളും യക്ഷരും തല താഴ്ത്തി നിന്നു.

“അവസാനം ഫ്രെന്നിന്റെ ശക്തിയെ പഴയപടി എത്തിക്കാൻ ഫ്രെൻ ഒരു മാര്‍ഗ്ഗം കണ്ടുപിടിച്ചു.

അതിന്റെ പ്രാരംഭ ഘട്ടമായി അവന്റെ ശേഷിച്ച പത്തു ശതമാനം ശക്തിയെ അവന്‍ പ്രപഞ്ചമാകെ വ്യാപിപ്പിച്ചു. വെറും അത്ര ശക്തി ഉപയോഗിച്ച് നിങ്ങൾ ദൈവങ്ങളെ അവന്‍ നിസ്സാരമായി പ്രേരിപ്പിച്ച് അവന്റെ ഇഷ്ടത്തിന് നിങ്ങളെ നയിച്ചു… അതുകൂടാതെ പ്രകൃതി ശക്തിയുടെ നശീകരണ ഭാഗത്തെയും നന്മയുടെ ഭാഗത്തെയും അവന് പ്രേരിപ്പിക്കാനും കഴിഞ്ഞു…

അതിന്റെ ഫലമാണ് ഈ ഞാൻ, അൽദീയ എന്ന സൃഷ്ടി….”

എന്തു പറയണം എന്നുപോലും അറിയാതെ എല്ലാവരും മിഴിച്ചു നിന്നു.

“നിങ്ങൾ ശെരിക്കും പ്രതിമയാണോ…?” ഹൈനബദ് നിശബ്ദതയെ ഭേദിച്ചു.

അതിന്റെ മറുപടിയായി അൽദീയ പൊട്ടിച്ചിരിച്ചു.

“ഞാൻ പ്രതിമയുമല്ല മനുഷ്യനും അല്ല. ഞാൻ ദൈവവും അല്ല ഐന്ദ്രികയുമല്ല, പ്രിയരേ. ഞാൻ ആരാണെന്ന സത്യം നിങ്ങൾ അറിയേണ്ട സമയം അതിക്രമിച്ചു കഴിഞ്ഞു…” അതും പറഞ്ഞ്‌ അൽദീയ പിന്നെയും പൊട്ടിച്ചിരിച്ചു.

അവരുടെ ആ ചിരിയില്‍ നിന്നുപോലും ഏതോ അജ്ഞാത ശക്തി വ്യാപിച്ച് ഞങ്ങളുടെ ആത്മാവിനെ ബാധിക്കും പോലെ തോന്നി.

ഒന്നും മനസിലാവാതെ ഞങ്ങള്‍ അവരെ തന്നെ നോക്കി നിന്നു.

“ഞാൻ തന്നെയാണ് പ്രകൃതിശക്തി…. നന്മയുടെ ഭാഗമായ പ്രകൃതിശക്തി.
ഫ്രെന്നിന്റെ പ്രേരണയും, സ്വാധീനവും, പിന്നെ എന്നില്‍ അവന്‍ സൃഷ്ടിച്ച മാതൃ-പുത്ര ബന്ധനവും കാരണം ഈ അവതാരം എനിക്ക് സ്വീകരിക്കേണ്ടി വന്നു ….
എന്റെ ഈ അവതാരത്തിന്‍റെ നിയോഗം, ഫ്രെൻ എന്ന ശക്തിയെ എന്നില്‍ സ്വീകരിച്ച് – പ്രകൃതിയുടെയും, പ്രപഞ്ചത്തിന്‍റെയും, നിഗൂഢ ശക്തികളുടെയും ഊര്‍ജ്ജത്തെ അവന് പോഷകമായി പകര്‍ന്നു കൊടുത്തു അവനെ ശക്തിപ്പെടുത്തുക എന്നതാണ്‌.
പതിനേഴ്‌ വർഷങ്ങൾക്കു മുന്‍പേ എന്റെ നിയോഗം ഞാൻ പൂര്‍ത്തീകരിച്ചു കഴിഞ്ഞു…”