മാന്ത്രികലോകം 13 [Cyril] 2156

കുറച്ചുനേരം എല്ലാവരും എന്തെല്ലാമോ ചിന്തിച്ചു നിന്നു.

അൽദീയ തുടർന്നു——,,

“അവ്യവസ്ഥ-ശക്തിക്ക് ഒറ്റപ്പെട്ട ശക്തിയായി നിലകൊള്ളാനാണ് താല്‍പര്യം. മറ്റുള്ള എല്ലാ ശക്തികളേയും നിയന്ത്രിച്ച് തന്റെ അധീനതയിലാക്കാനും — നിയന്ത്രിക്കാൻ കഴിയാത്ത ശക്തികളെ നശിപ്പിച്ച് കളയാനുമാണ് ആ ശക്തി ആഗ്രഹിക്കുന്നത് – പക്ഷേ ദൈവങ്ങള്‍, മനുഷ്യര്‍, മാന്ത്രികർ, മാന്ത്രിക ജീവികള്‍ എന്ന എല്ലാറ്റിനെയും ആ ശക്തി വെറുക്കുന്നു. അതിനെയെല്ലാം പൂര്‍ണമായി നശിപ്പിച്ച് കളയാനുള്ള നീക്കങ്ങളാണ് പണ്ടു മുതലേ അവ്യവസ്ഥ-ശക്തി മെനഞ്ഞ് കൊണ്ടിരിക്കുന്നത്.

അവ്യവസ്ഥ-ശക്തി എന്നത് നശീകരണ ശക്തിയെക്കാൾ പല ലക്ഷങ്ങള്‍ ഇരട്ടി ഉയർന്ന നശീകരണ സ്വഭാവമുള്ള ശക്തിയാണ് എന്നറിയുക. തിന്മ, നാശം, ദുരന്തം, നരകം എന്ന എല്ലാത്തിന്റെയും ഉച്ചസ്ഥായി എന്നു അവ്യവസ്ഥ-ശക്തിയെ വിശേഷിപ്പിക്കാം. ആ ശക്തി എല്ലാത്തിനെയും നിയന്ത്രിക്കാനോ നശിപ്പിക്കാനോ തീരുമാനിച്ചാല്‍, ഒഷേദ്രസ് എന്നല്ല.. പ്രകൃതിക്കും നിഗൂഢ ശക്തികള്‍ക്ക് പോലും ഒന്നും ചെയ്യാൻ കഴിയില്ല… ക്രൂരത, നാശം, ദുരിതം, വേദന എന്നതിനെ മാത്രം അത്യധികം സ്നേഹിക്കുന്ന ശക്തിയാണ് അവ്യവസ്ഥ-ശക്തി. ക്രൂരതയെ മാത്രം സ്നേഹിക്കുന്ന ഒഷേദ്രസ് പോലും ആ ശക്തിയില്‍ നിന്നും ഓടി ഒളിക്കാന്‍ മാത്രമേ ശ്രമിക്കൂ. അപ്പോ കുറച്ചെങ്കിലും നിങ്ങള്‍ക്ക് ആ ശക്തിയെ കുറിച്ച് ഊഹിക്കാൻ കഴിയും എന്നു ഞാൻ കരുതുന്നു….”

അൽദീയ പറഞ്ഞ കാര്യങ്ങൾ എല്ലാം ദൈവങ്ങളെ പോലും ഭയപ്പെടുത്തി എന്നതിനെ ഞാൻ കണ്ടു. എന്റെ ശരീരത്തിന് ചെറിയൊരു വിറയൽ ബാധിച്ചിരുന്നു. സാഷയുടെ പിടി എന്റെ കൈയെ ശക്തമായി മുറുകിയിരുന്നു.

“അപ്പോ അവ്യവസ്ഥ-ശക്തി എല്ലാത്തിനെയും നശിപ്പിക്കും എന്നാണോ നിങ്ങൾ പറയുന്നത്…? പ്രകൃതിക്ക് പോലും അതിനെ തടയാൻ കഴിയില്ലെങ്കിൽ പിന്നേ മറ്റുള്ളവര്‍ക്ക് എന്തു ചെയ്യാൻ കഴിയും…?” ജാസർ ചോദിച്ചു.

“പക്ഷേ ഫ്രെന്നും ആ ശക്തിയും തമ്മിലുള്ള ബന്ധം എന്താണ്…?” നല്യത്രിദ ചോദിച്ചു.

അൽദീയ ദുഃഖത്തോടെ അവളെ നോക്കി പറഞ്ഞു, “അത് നിനക്ക് വഴിയേ മനസ്സിലാകും, നല്യത്രിദ…”

നല്യത്രിദ തല മെല്ലെ അനക്കി.

“എന്തുതന്നെയായാലും താല്‍ക്കാലികമായി പ്രപഞ്ചത്തെ ചെറിയൊരു ഭാഗ്യം തുണയ്ക്കുക തന്നെ ചെയ്തിരുന്നു…” അൽദീയ ചെറു പുഞ്ചിരിയോടെ പറഞ്ഞു. “നിഗൂഢ ശക്തികള്‍ പ്രകൃതിയെ സൃഷ്ടിച്ചു കഴിഞ്ഞ ശേഷം മാത്രമാണ് അവ്യവസ്ഥ-ശക്തിയെ കുറിച്ചും അതിന്റെ സവിശേഷതകളെ കുറിച്ചും അറിയുന്നത്.

അതുകൊണ്ട് നിഗൂഢ ശക്തികള്‍ അവ്യവസ്ഥ-ശക്തി ഒഴികെ, നന്മ തിന്മ എന്ന രണ്ടു ശക്തികൾക്ക് മാത്രമായിട്ടാണ് ഒരു ആത്മാവിനെ നല്‍കിയത്.

അങ്ങനെ പ്രകൃതിയുടെ ശരീരത്തിൽ നിന്നും അവ്യവസ്ഥ-ശക്തി വേർപെട്ടപ്പോൾ, ആ ശക്തിക്ക് പ്രകൃതിയുടെ ആത്മാവിനെ പ്രകൃതിയുടെ ശരീരത്തിൽ നിന്നും ഭാഗിച്ചെടുക്കാൻ കഴിഞ്ഞിരുന്നില്ല….

അതേസമയം ഉപബോധ മനസ്സ് എന്ന ശക്തിയും, പ്രകൃതിയുടെ ആത്മാവും, നന്മ-തിന്മ എന്ന രണ്ട് ഭാഗങ്ങളായി വിഭജിക്കുകയും… ആ ഭാഗങ്ങൾ പ്രകൃതിയുടെ ശരീരത്തില്‍ തന്നെ രണ്ടു ശക്തികളിലായി തരംതിരിഞ്ഞു നിലയ്ക്കുകയും ചെയ്തു.