മാന്ത്രികലോകം 13 [Cyril] 2156

അങ്ങനെ ഭിന്നത സൃഷ്ടിക്കപ്പെട്ട പ്രകൃതിയുടെ ആ പൂര്‍ണമല്ലാത്ത ശരീരത്തിൽ ഐക്യ ശക്തിക്ക് വ്യാപിക്കാനോ പരിവര്‍ത്തനം സൃഷ്ടിക്കാനോ കഴിയുമായിരുന്നില്ല…” അൽദീയ പറഞ്ഞു.

“എന്തുകൊണ്ടാണ് അവ്യവസ്ഥ-ശക്തി പ്രകൃതിയുടെ ശരീരത്തിൽ നിന്നും പിരിഞ്ഞത്…?” അമ്മു ചോദിച്ചു.

“നിഗൂഢ ശക്തികളുടെ ഭാഗത്ത് നിന്നുണ്ടായ ഒരു വലിയ അബദ്ധത്തിന്‍റെ ഫലമായിട്ടാണ് അവ്യവസ്ഥ-ശക്തി ഉത്ഭവിക്കാൻ കാരണമായത്….” അൽദീയ നിരസത്തോടെ പറഞ്ഞു.

“എന്തു അപദ്ധം…?” ഫ്രേയ ചോദിച്ചു.

“പ്രകൃതി ശക്തികളെ നിഗൂഢ ശക്തികള്‍ സൃഷ്ടിക്കുന്ന സമയത്ത് ‘പ്രതിബന്ധം’ എന്ന നിഗൂഢ നിയമ ശക്തിയുടെ സത്ത ഭിന്നതകള്‍ സൃഷ്ടിച്ചു കൊണ്ടിരുന്നു — പ്രകൃതിയെ സൃഷ്ടിക്കുമ്പോൾ പ്രതിബന്ധം എന്ന നിഗൂഢ ശക്തിയുടെ സത്തയിൽ നിന്നും ഉത്ഭവിച്ച ഊര്‍ജ്ജത്തെ ഉപയോഗിക്കുകയാണെങ്കില്‍ അനന്തരഫലങ്ങൾ ഉണ്ടാവും എന്നു നിഗൂഢ ശക്തികളുടെ ഉപബോധ മനസ്സ് താക്കീതു നല്‍കിയിരുന്നു. പക്ഷേ നിഗൂഢ ശക്തികള്‍ ആ താക്കീതിനെ അവഗണിച്ചു.

‘നന്മ – തിന്മ ’ എന്ന ഈ രണ്ട് ശക്തികള്‍ മാത്രമേ പ്രകൃതി ശക്തികളായി ഉത്ഭവിക്കുകയുള്ളു എന്നാണ് ആ ഏഴു നിഗൂഢ ശക്തികളും അന്ധമായി വിശ്വസിച്ചിരുന്നത്. പക്ഷേ പ്രതിബന്ധം എന്ന നിഗൂഢ ശക്തിയുടെ സത്തയിൽ നിന്നും ഉത്ഭവിച്ച ശക്തി മറ്റുള്ള ശക്തികളുമായി സമ്പര്‍ക്കത്തില്‍ ഏര്‍പ്പെട്ട നിമിഷം തന്നെ വിഘ്‌നങ്ങൾ സൃഷ്ടിക്കപ്പെടുകയും, അതിന്റെ ഫലമായി മറ്റുള്ള എല്ലാ ശക്തികളേയും ഏതെങ്കിലും തരത്തിൽ നിയന്ത്രിക്കാൻ കഴിവുള്ള.. തിരിച്ചറിവുള്ള… അപൂര്‍വ്വവും അപാരവുമായ മൂന്നാമത്തെ ഒരു ശക്തിയുടെ സൃഷ്ടിയുടെ ആരംഭവും കുറിക്കപ്പെട്ടു — അങ്ങനെയായിരുന്നു അവ്യവസ്ഥ-ശക്തിയുടെ ഉത്ഭവം.

പക്ഷേ ചെറിയൊരു കണിക മാത്രമായിരുന്ന അവ്യവസ്ഥ-ശക്തിയെ നിഗൂഢ ശക്തികള്‍ തുടക്കത്തിൽ തിരിച്ചറിഞ്ഞിരുന്നില്ല…

നിഗൂഢ ശക്തികളുടെ ഉപബോധ മനസ്സിന് പോലും അവ്യവസ്ഥ-ശക്തിയെ തിരിച്ചറിയാൻ കഴിഞ്ഞില്ല എന്നതാണ് ഭയാനകം.

സാധാരണയായി എന്തുതന്നെ സൃഷ്ടിക്കപ്പെട്ടാലും ഏറ്റവും അവസാന ഘടകം ആയിരിക്കും ‘തിരിച്ചറിവ്’ എന്ന ശക്തിയെ പകര്‍ന്നു കൊടുക്കുക എന്നത്. പക്ഷേ അവ്യവസ്ഥ-ശക്തിയുടെ കണിക ഉത്ഭവിച്ച ആ നിമിഷം തന്നെ തിരിച്ചറിവ്‌ ശക്തിയും അതിനൊപ്പം ജനിച്ചു… അതുകൂടാതെ മറ്റ് ചില കഴിവുകള്‍ കൂടി അവ്യവസ്ഥ-ശക്തിക്ക് ഉണ്ടായിരുന്നു — അജ്ഞാതമായി കഴിയാനും, നിഗൂഢ ശക്തികളുടെ ഉപബോധ മനസ്സുകള്‍ പോലും അറിയാതെ എല്ലാ ഉപബോധമന ശക്തികളിലും ഒരു താല്‍ക്കാലിക ബന്ധം സൃഷ്ടിക്കാനും അവ്യവസ്ഥ-ശക്തിക്ക് കഴിഞ്ഞിരുന്നു.

അങ്ങനെ പ്രകൃതി ശക്തികളുടെ ഉത്ഭവം പൂര്‍ണമാകുന്നത് വരെ നിഗൂഢ ശക്തികളും… ആ ശക്തികളുടെ ഉപബോധ മനസ്സുകളും എല്ലാം അവ്യവസ്ഥ-ശക്തിയെ കുറിച്ച് അജ്ഞാതരായിരുന്നു എന്നു മാത്രമല്ല —— അവ്യവസ്ഥ-ശക്തിക്ക് അഗാധമായ നിഗൂഢ നിയമങ്ങളെ നൂറ് ശതമാനവും ഗ്രഹിക്കാനും… സ്വായത്തമാക്കാനും… ഒരു പരിധി വരെ നിഗൂഢ ശക്തികളുടെ ഉപബോധ മനസ്സുകളെ പോലും നിയന്ത്രിക്കാനും കഴിയും എന്ന സത്യത്തെയും നിഗൂഢ ശക്തികളും ഉപബോധ മനസ്സുകളും അറിഞ്ഞിരുന്നില്ല….”

അൽദീയയുടെ വെളിപ്പെടുത്തല്‍ എല്ലാവരെയും ഞെട്ടിച്ചു കളഞ്ഞു. ഷൈദ്രസ്തൈന്യ യുടെ കണ്ണില്‍ പോലും ആദ്യമായി ഭീതി നിറഞ്ഞത് ഞാൻ കണ്ടു.

“നിഗൂഢ ശക്തികളുടെ ഉപബോധ മനസ്സിനെ പോലും നിയന്ത്രിക്കാൻ അവ്യവസ്ഥ-ശക്തിക്ക് കഴിയും എന്നോ…” ഫ്രേയ വാ പൊളിച്ചു നിന്നു.

“ഒരു പരിധിവരെ മാത്രമേ കഴിയു, ഫ്രേയ….”അൽദീയ പറഞ്ഞു.