മാന്ത്രികലോകം 13 [Cyril] 2156

ഞങ്ങൾ ആശങ്കയോടെ പരസ്പ്പരം നോക്കി.

“ഞാൻ വിചാരിച്ചതിനേക്കാള്‍ വേഗത്തിലാണ് അവന്റെ ശക്തിയുടെ വളര്‍ച്ചയും.. അവന്റെ തിരിച്ചറിവും വര്‍ധിച്ചു കൊണ്ടിരിക്കുന്നത്…,

അവന്റെ യഥാര്‍ത്ഥ വ്യക്തിത്വത്തെ അവനില്‍ നിന്നും ഞങ്ങൾ അകറ്റിയിരുന്നു. അവന്‍ ആരാണെന്ന സത്യത്തെ അവനില്‍ നിന്നും ഇത്രയും കാലം ഞങ്ങള്‍ക്ക് മറച്ചു പിടിക്കാനും കഴിഞ്ഞിരുന്നു.. അതുകാരണം അവന്റെ നിയോഗത്തെ പോലും മാറുകയാണ് ചെയ്തത്. അതിൽ ഞങ്ങൾ സന്തോഷിക്കുകയും ചെയ്തിരുന്നു.., പക്ഷേ അവസാനം ഞങ്ങൾ പരാജയപ്പെട്ടു പോയി…. അവന്‍ ആരാണെന്നു അവന്‍ തിരിച്ചറിഞ്ഞു കഴിഞ്ഞു… ഇനി എന്തു സംഭവിക്കുമെന്ന് ഞങ്ങൾക്ക് പോലും പ്രവചിക്കാൻ കഴിയില്ല…” അൽദീയ നിരാശയോടെ പറഞ്ഞു.

“ഒഷേദ്രസിന്റെ കാര്യമാണോ നീ പറയുന്നത്…? പക്ഷേ ഒഷേദ്രസ് എന്താണെന്നു ഒഷേദ്രസിന് പോലും അറിയാമല്ലോ..? നീ പറഞ്ഞു വരുന്നത് എന്താണെന്ന് എനിക്ക് മനസ്സിലാക്കാൻ കഴിയുന്നില്ല, അൽദീയ…” കൈറോൺ കണ്ണുകള്‍ കുറുക്കി കൊണ്ട് പറഞ്ഞു.

പെട്ടന്ന് അൽദീയ കൈറോണെ കോപത്തോടെ നോക്കി… അവരുടെ കണ്ണുകൾ നിറം മാറി കൊണ്ടിരുന്നു… ഏതോ നിഗൂഢ ശക്തികള്‍ അവരുടെ ആ കണ്ണുകളില്‍ നിന്നും പുറത്തേക്ക്‌ വ്യാപിച്ച് ഞങ്ങൾ എല്ലാവരെയും പൊതിഞ്ഞു.

പെട്ടന്ന് എന്റെ ഹൃദയം നിലച്ചത് പോലെ തോന്നി… ഹൃദയത്തില്‍ നിന്നും എന്റെ ഊര്‍ജ്ജം വേഗത്തിൽ ചോര്‍ന്നുപോകുന്നത് പോലെയും അനുഭവപ്പെട്ടു.

“ആത്മധൈര്യം ഇല്ലാത്ത വിഡ്ഢി….” അൽദീയ കോപത്തോടെ കൈറോണെ നോക്കി ഗര്‍ജ്ജിച്ചു. “ഞാൻ ഒഷേദ്രസിന്റെ കാര്യമല്ല പറയുന്നത് — ഫ്രെന്നിനെ കുറിച്ചാണ് ഞാൻ സംസാരിക്കുന്നത്…”

അതുകേട്ട് ഞങ്ങൾ എല്ലാവരും വായും പൊളിച്ചു നിന്നു.

“നീ ഞങ്ങളെക്കാള്‍ ശക്തയായിരിക്കാം, അൽദീയ… പക്ഷേ നിന്നെ സൃഷ്ടിച്ചത് ഞങ്ങൾ ദൈവങ്ങള്‍ ആണെന്ന് നീ മറക്കുന്നു. നിന്റെ സൃഷ്ടാക്കളെ നിന്ദിക്കുന്നതിന് മുൻപ് നീ നല്ലതുപോലെ ചിന്തിക്കുന്നത് നന്നായിരിക്കും…” കൈറോൺ ദേഷ്യത്തില്‍ പറഞ്ഞു.

അതുകേട്ടു അൽദീയ പൊട്ടിച്ചിരിച്ചു.

“ഞാൻ ആരാണെന്നു നീ അറിയുന്നില്ല, കൈറോൺ… ഞാൻ പറയാതെ നീ അറിയുകയുമില്ല. പക്ഷേ അവന്റെ ബോധ മനസ്സിലും ഉപബോധ മനസ്സിലും ഏര്‍പ്പെടുത്തിയിരുന്ന എല്ലാ നിയന്ത്രണങ്ങളേയും അവന്‍ തകർത്തു കൊണ്ടിരിക്കുന്നു. അവന്‍ മറന്നിരുന്ന എല്ലാറ്റിനെയും ഫ്രെൻ ഇപ്പോൾ അവന്റെ ബോധ മനസ്സിലേക്ക് കൊണ്ടുവരാനും തുടങ്ങി കഴിഞ്ഞിരിക്കുന്നു…” അൽദീയ കൈറോണെ നോക്കി പറഞ്ഞു.

കൈറോൺ അന്തിച്ചു നിന്നു.

എന്നിട്ട് അൽദീയ ഞങ്ങൾക്ക് നേരെ തിരിഞ്ഞു “ഞാൻ ആരാണെന്ന് നിങ്ങളും അറിയുന്നില്ല…” അത്രയും പറഞ്ഞിട്ട് അൽദീയ പിന്നെയും പൊട്ടിച്ചിരിച്ചു.

കുറച്ച് കഴിഞ്ഞ് അവരുടെ ചിരി നിലച്ചു… മുഖത്തിൽ ഗൗരവം പടർന്നു പിടിച്ചു.

“എന്റെ നിയോഗം എന്തായിരുന്നു എന്നും നിങ്ങളാരും അറിയുന്നില്ല. എന്നെ സൃഷ്ടിക്കാന്‍ വിഡ്ഢികളായ നിങ്ങൾ ദൈവങ്ങളെ പ്രേരിപ്പിച്ചതും നയിച്ചതും ഫ്രെൻഷർ ആണെന്ന സത്യവും നിങ്ങൾ അറിയുന്നില്ല. ഇപ്പോഴെങ്കിലും എന്താണ് സത്യമെന്നു നിങ്ങൾ അറിയുക….”