പതിനാറാം 👹 തീയാട്ട് {Sajith} 1512

വൈജയന്തി…

***

 

വൈജയന്തിരുടെ ബോർഡർ കടന്നപ്പഴേ കുഞ്ഞൂട്ടന് മനസിനൊരു സമാധാനം വന്നു. ഇനി അപ്പുവും ഇന്ദിരാമ്മയും പുന്നക്കലും സ്രാവണും പാറുവും മറ്റുമായ ഒരു ലോകമാണ്. 

 

പുന്നക്കൽ നിന്നും പോവണം അധിക നാൾ ഇവിടെ നിന്ന് അവരേ കൊണ്ട് പറയിപ്പിക്കരുതെന്ന് കുഞ്ഞൂട്ടനുണ്ട്. അവർക്കാർക്കും ഒരു ബുദ്ധിമുട്ടാവില്ലെന്നൊക്കെ പറയും എന്നാലും അങ്ങനെയല്ലല്ലോ. എവിടെയും അധികപറ്റായി കൂടാൻ ഇടവരരുതേ എന്നവനുണ്ട്. എവിടേലും പോയി ഒരു ജോലി തരപ്പെടുത്തുക കുറച്ച് പണത്തിന് ഒരു വീടും. എന്നിട്ട് പുന്നയ്ക്കൽ വന്ന് ചോദിക്കണം അപ്പൂനെ കല്ല്യാണം കഴിപ്പിച്ച് തരോന്ന്…, കുഞ്ഞൂട്ടൻ ആലോചിച്ചു. അവൻ്റെ ചുണ്ടിലൊരു ചിരി വിരിഞ്ഞു.

 

ഇനി എങ്ങാനും തരില്ലെന്ന് പറയോ.. ഇപ്പഴാണങ്കി വീട്ടുകാരുമില്ല. ഒറ്റയ്ക്ക്. ഒരനാഥൻ പണിയുമില്ല കൂലിയുമില്ല. പുന്നയ്ക്കലുള്ളവര് പറഞ്ഞാലും അപ്പു അങ്ങനെ പറയില്ല. ഉറപ്പുണ്ട്…

 

കുഞ്ഞൂട്ടൻ്റെ ബൈക്ക് നേരെ സ്വർഗ്ഗം സിറ്റി ലക്ഷ്യമാക്കി വന്നു നിന്നു. ശേഷമവിടെ നിന്ന് പാറുവിൻ്റെ വീട്ടിലേക്കും. 

 

ഇന്ന് രുഗ്മിണിക്ക് അവധിയാണ്. പാറുവിന് സ്കൂൾ ഉണ്ട്. കുഞ്ഞൂട്ടൻ ബൈക്ക് വീടിൻ്റെ മുറ്റത്ത് നിന്ന് കുറച്ച് മാറ്റി നിറുത്തി. രുഗ്മിണി പാർവ്വതിയെ പല്ല് തേപ്പിക്കുകയായിരുന്നു. അവളൊറ്റയ്ക്ക് ചെയ്യും എന്നാലും രുഗ്മിണി വിടില്ല. ഒറ്റയ്ക്ക് തേച്ചാ ശരിയാവില്ലെത്രേ…

 

“”ങാഹാ….””,””ഇപ്പൊ എഴുന്നേറ്റേയുള്ളോ പാറുക്കുട്ടി…””,

 

ബാഗിൽ നിന്ന് പാർവ്വതിക്കുള്ള പലഹാര പൊതിയുമായി വീടിൻ്റെ മുറ്റത്തേക്ക് വന്നു കൊണ്ട് കുഞ്ഞൂട്ടൻ ചോദിച്ചു. രുഗ്മിണി പാർവ്വതിയുടെ പല്ല് തേപ്പിച്ച് മുഖം കഴുവി കൊടുക്കുകയായിരുന്നു. കുഞ്ഞൂട്ടൻ്റെ ശബ്ദം കേട്ടപ്പോ പാറു പെട്ടന്ന് വെട്ടിതിരിഞ്ഞ് നോക്കി. 

 

“”ഏട്ടാ…””

 

കുഞ്ഞൂട്ടൻ്റെ അടുത്തേക്ക് ഓടാനായി നിന്ന പാറുവിനെ രുഗ്മിണി പിടിച്ചു നിറുത്തി. 

 

“”നിക്കടീ അവടെ…””,””മോഖം തൊടച്ചിട്ട് പോ…””,

 

അയയിൽ നിന്ന് രുഗ്മിണി തോർത്തെടുത്ത് പാർവ്വതിക്ക് നേരെ നീട്ടി.

 

“”ഈ അമ്മ…””,””ഇപ്പൊ വരാട്ടോ…””,

 

പാറു വേഗം തോർത്ത് വാങ്ങി കുഞ്ഞൂട്ടനോട് പറഞ്ഞു ശേഷം വേഗം മുഖം തുടച്ച് തോർത്ത് രുഗ്മിണിക്ക് തന്നെ തിരികേ കൊടുത്തു. 

 

“”ഈ പെണ്ണ്…””,

 

കുഞ്ഞൂട്ടനേ കണ്ടതിൻ്റെ ആവേശമാണവൾക്കെന്ന് രുഗ്മിണിക്ക് അറിയാം. പാർവ്വതിക്ക് മാത്രല്ല രുഗ്മിണിക്കും കുഞ്ഞൂട്ടനെ കണ്ടപ്പൊ ഒരുപാട് സന്തോഷായി കുറച്ച് ദിവസായില്ലേ കണ്ടിട്ട്…

 

“”ഏട്ടാ…””,

 

പാർവ്വതി ഓടി വന്ന് കുഞ്ഞൂട്ടനെ കെട്ടിപിടിച്ചു…

 

“”ഇന്ന് ഇസ്കൂളില്ലേ പാറു…””,

 

“”ഇണ്ട് പോവാൻ നിക്കാ…””,””ഇന്ന് ഏട്ടൻ കൊണ്ടോയാക്കോ…””,

 

“”ഇന്നോ…””,””ഇന്ന് പറ്റില്ല പാറുക്കുട്ടീ…””,””നാളെ നമ്മക്ക് രണ്ടാക്കും പോവാട്ടോ…””,

 

“”മ്മം…””,””എന്നാ നാളെ പോവാ…””,

 

“”കുഞ്ഞൂട്ടാ…””,””വാ ഇരിക്ക്…””,

 

രുഗ്മിണി പെരയ്ക്കകത്ത് നിന്ന് ഒരു കസേര കൊണ്ട് വന്ന് ഉമ്മറത്തിട്ടു. പുത്തൻ ഫൈബർ കസേര..

 

“”ആഹ്…””,””ഇതെപ്പൊ വാങ്ങി…””,

 

“”കഴിഞ്ഞ ആഴ്ച്ച പൈസ കിട്ടിയപ്പൊ…””,

 

“”ഓഹോ…””,””അതപ്പഴേക്കും എടുത്ത് ചെലവാക്കിയോ…””,””നല്ല കാര്യം…””,

 

“”പിന്നല്ലാതെ ആരേലും വരുമ്പൊ നിലത്തിരുത്താൻ പറ്റോ കുഞ്ഞൂട്ടാ…””,

 

“”അതും ശരിയാ…””,

 

കുഞ്ഞൂട്ടൻ ഉമ്മറത്ത് കയറി കസേരയിലിരുന്നു. രുഗ്മിണി അകത്തേക്ക് കയറി പോയി. സത്യത്തിൽ കസേര വാങ്ങിയത് കുഞ്ഞൂട്ടന് ഇരിക്കാൻ തന്നെയാ… 

 

“”ദാ ഇതെൻ്റെ പാറുകുട്ടിക്ക്…””,

 

കുഞ്ഞൂട്ടൻ കൈയ്യിലുള്ള കവറ് പാർവ്വതിക്ക് നേരെ നീട്ടി. അവളത് വാങ്ങി തുറന്നു നോക്കി. 

 

“”എല്ലാർക്കും കൊടുക്കണംട്ടോ…””,

 

പാർവ്വതി തലയാട്ടി. എന്നിട്ട് അകത്ത് കൊണ്ടു വയ്ക്കാനായിട്ട് പോയി. 

 

രുഗ്മിണി അടുപ്പത്ത് ചായ തിളപ്പിക്കാൻ വച്ചു. എന്താപ്പൊ കുഞ്ഞൂട്ടന് കൊടുക്കാ.. പലഹാരമൊന്നുമില്ല. രാവിലെ ഉണ്ടാക്കിയ കുറച്ച് കപ്പപുഴുക്കും ചമ്മന്തിയും ഇണ്ട്. ഇഷ്ടാവോ ആവോ… കൊടുത്ത് നോക്കാം… രുഗ്മിണി ഒരു പാത്രത്തിൽ കുറച്ച് കപ്പപുഴുക്കെടുത്തിട്ടു കൂടെ ചമ്മന്തിയും. അതുമായി എഴുന്നേറ്റപ്പഴാണ് ഒരു കവറും കൈയ്യിൽ പിടിച്ച് പാർവ്വതി അങ്ങോട്ടേക്ക് വന്നത്…

 

“”അമ്മാ ഇത് നോക്ക് ഏട്ടൻ കൊണ്ടന്നതാ…””,””നിമ്മിക്ക്ള്ളതൊക്കെ ഇണ്ട്…””,

 

“”ആണോ…””,””മോള് വൈകുന്നേരം സ്കൂള് കഴിഞ്ഞ് വന്നിട്ട് പുഷ്പ്പേച്ചിടെട്ത്ത് കൊണ്ടോയി എല്ലാർക്കും കൊട്ക്ക്ട്ടോ…””,””ഇപ്പൊ അവിടെ വെച്ചേക്ക്..””,

 

പാറു മൂളി എന്നിട്ട് പലഹാരങ്ങൾ ഇട്ടുവയ്ക്കാനായി വാങ്ങിയിരുന്ന ഒരു ടപ്പി എടുത്ത് കൊണ്ടു വന്നു. മാറാല പിടിച്ചിട്ടിണ്ട്. അവളത് തുടയ്ക്കാൻ തുടങ്ങി..

 

“”മോളേ തീയിൽ കളിക്കര്ത്ട്ടോ…””,

 

രുഗ്മിണി വാതൽക്കൽ നിന്ന് വിളിച്ചു പറഞ്ഞു..

 

“”ആഹ് അമ്മാ….””,

 

പാറു ടപ്പി തുടച്ച് വൃത്തിയാക്കി കുഞ്ഞൂട്ടൻ കൊണ്ടുവന്ന പലഹാരം അതിലിട്ട് അടച്ച് ബദ്രമാക്കി വച്ചു. 

 

“”കുഞ്ഞൂട്ടാ കുറച്ചു കപ്പ പുഴുക്കാ…””,””ഇഷ്ട്ടാവോ…””,

 

ഉമ്മറത്തേക്കു വന്ന രുഗ്മിണി അവനു നേരെ പാത്രം നീട്ടി. കുഞ്ഞൂട്ടൻ ആണങ്കി ഒന്നും കഴിച്ചിട്ടും ഉണ്ടായിരുന്നില്ല. ഇന്നലെ ഉച്ചയ്ക്കോ മറ്റോ കഴിച്ചതാ..

 

“”പിന്നെ കഴിക്കാതെ…””,

 

കുഞ്ഞൂട്ടൻ പാത്രം കൈയ്യിലേക്ക് വാങ്ങി..

 

“”നിങ്ങള് കഴിച്ചോ…””,

 

കുഞ്ഞൂട്ടൻ്റെ മറു ചോദ്യം..

 

“”ഇല്ല കഴിക്കാൻ പോണേയുള്ളൂ..””,

 

“”ആണോ എന്നാ വാ…””,

 

രുഗ്മിണി അകത്തേക്ക് പോയി. കുഞ്ഞൂട്ടൻ തൻ്റെ കസേരയൊക്കെ മാറ്റി വച്ച് ചാണകം മെഴുകിയ തിണ്ണയിലിരുന്നു. 

 

രുഗ്മിണി രണ്ട് പാത്രത്തിലും കൂടി കപ്പ എടുത്ത് ഉമ്മറത്ത് വച്ചു. അപ്പൊ ദാ കുഞ്ഞൂട്ടൻ നിലത്തിരിക്കുന്നു…

 

“”അയ്യോ ഇതെന്തേ നിലത്തിരിക്കുന്നെ ഉടുപ്പിലാകെ അഴുക്കാവില്ലേ…””,

 

“”ഏയ്…””,””ഇതാ കംഫർട്ടബിൾ…””,

 

രുഗ്മിണിയെ നോക്കി പുഞ്ചിരിച്ചു കൊണ്ട് തന്നെ കുഞ്ഞൂട്ടൻ പറഞ്ഞു. രുഗ്മിണിക്ക് കുഞ്ഞൂട്ടൻ ചിരിക്കുമ്പഴും മറ്റും മുഖത്ത് നോക്കാൻ മടിപോലെയാണ്… അവള് തല താഴ്ത്തി അകത്തേക്ക് പോയി. അപ്പൊ ദാ പാറു ആടുപ്പിൽ വെറക് കൊള്ളി എടുത്ത് കളിക്കുന്നു.

 

“”ഇവളെ ഞാനിന്ന്…””,

 

രുഗ്മിണി പോയി പാറൂൻ്റെ ചെവിക്കൊരു പിടി പിടിച്ചു…

 

“”നിന്നോട് ഞാൻ പറഞ്ഞിട്ട്ണ്ടോ തീയിൽ കളിക്കരുത്ന്ന്…””,

 

“”ആഹ്…””,””വിടമ്മേ…””,””ഇനികളിക്കില്ല…””,””ആഹ്….””,

 

പാറു രുഗ്മിണിയുടെ കൈയ്യിൽ പിടിച്ച് കൊണ്ട് കെഞ്ചി. അത് കണ്ടിട്ട് രുഗ്മിണിക്ക് ചിരി വന്നു. പക്ഷെ അവടെന്ന് ചിരിച്ചില്ല. അത് കണ്ടാ പെണ്ണ് പിന്നെയും തീയെടുത്ത് കളിക്കും. 

 

“”മ്മം…””,””ന്നാ പോ..””,””അവടെ കപ്പ എടുത്ത് വച്ചിട്ട്ണ്ട്…””,””പോയി കഴിക്ക്…””,

 

ചെവി വിട്ട് രുഗ്മിണി പറഞ്ഞു. പാറു ചെവിയും തിരുമ്മി വേഗം അവിടെ നിന്നും പോന്നു. അവളുടെ പോക്ക് കണ്ട് രുഗ്മിണിയുടെ ചുണ്ടിൽ പുഞ്ചിരി വന്നു. 

 

പാറു കുഞ്ഞൂട്ടനോടൊപ്പം ഉമ്മറത്തിരുന്ന് പുഴുക്ക് കഴിക്കാൻ തുടങ്ങി. രുഗ്മിണി മൂന്ന് ചായ ഗ്ലാസുമായി വന്ന് അവരോടൊപ്പം ഇരുന്നു. 

 

കുഞ്ഞൂട്ടൻ രുഗ്മിണിയോട് ജോലിയുടെ കാര്യങ്ങളും മറ്റും ചോദിച്ചു. അവളതിന് മറുപടി കൊടുത്തു. കുഞ്ഞൂട്ടന് വിധേയ ആയവളേ പോലെയാണ് രുഗ്മിണിയുടെ സംസാരം. അവനെന്ത് പറയുന്നെന്ന് നോക്കി നിൽക്കുക. കുഞ്ഞൂട്ടൻ കഴിക്കുന്ന വിധവും കണ്ണു ചിമ്മലും വരെ അവള് ശ്രദ്ധിക്കുന്നുണ്ട്. 

 

കഴിപ്പ് കഴിഞ്ഞ് കുഞ്ഞൂട്ടൻ പോവാൻ തിടുക്കം കൂട്ടി. പുന്നയ്ക്കൽ പാറൂനേക്കാളും ഒരു കുഞ്ഞികുട്ടി കാത്തിരിക്കല്ലേ… 

 

അവൻ വേഗം കൈയ്യെല്ലാം കഴുകി ഒരു കട്ടനും കുടിച്ച് യാത്ര പറഞ്ഞിറങ്ങി. നാളെ പാറൂനെ സ്കൂളിൽ കൊണ്ടു വിടാമെന്ന് വാക്കും കൊടുത്തു. 

 

***★☆★***