നിഴലായ് അരികെ -8 [ചെമ്പരത്തി] 369

ഒന്നു നിർത്തിയിട്ടു നന്ദൻ ആർദ്രമായി അവളോട് ചോദിച്ചു

“നിനക്കെന്താ അമ്മൂ പറ്റിയത് അന്ന്??”

മുഖം തിരിച്ചു ഒന്ന് കണ്ണുകൾ തുടച്ചിട്ട് അവൾ പറഞ്ഞു..

“നീഅന്ന് മമ്മിയോട്  പറഞ്ഞത് തന്നെ നന്ദാ……പനിയുടെ ക്ഷീണം കാരണം നടന്നപ്പോൾ വേച്ചു പോയി.തല കൊണ്ടുപോയി കണ്ണാടിയിൽ ഇടിച്ചു. കൈ തട്ടി ഫ്ലവർവേസ് താഴെ വീണു പൊട്ടി. ചവിട്ടിയപ്പോൾ ഫ്ലവർവേസ്ന്റെ മേലെ ആയിപ്പോയി അങ്ങനെ കാലും മുറിഞ്ഞു….. ”

പറഞ്ഞിട്ടു അവൾ തലകുനിച്ചിരുന്നു….

ഉരുകിയിറങ്ങിയ, തണുത്തുറഞ്ഞ ഐസ്ക്രീമിനൊപ്പംഒഴുകിച്ചാടിയ  തിളച്ചു മറിഞ്ഞ ജലകണങ്ങളും, താഴെ, പാദങ്ങൾക്കിടയിൽ ഞെരിഞ്ഞമർന്നു നിസ്സഹായരായി കിടന്ന മണൽ തരികൾ ഏറ്റുവാങ്ങി…..

പക്ഷെ നന്ദൻ നിഷേധപൂർവ്വം തലയാട്ടി…

“അങ്ങ്…. മാച്ച് ആകുന്നില്ലല്ലോ അമ്മൂ…….. തല ഇടിച്ചാണ് കണ്ണാടി പൊട്ടിയത് എങ്കിൽ നിന്റെ ഇടതു കൈ എങ്ങനെ മുറിഞ്ഞു….?? ”

“അത്… അത് വീണു കഴിഞ്ഞപ്പോൾ…….അല്ല തലയിടിച്ചു കഴിഞ്ഞപ്പോൾ പെട്ടന്ന് കണ്ണാടിയിൽ കൈ കുത്തിയതാ…. ”

“അതും ശരിയാകുന്നില്ലല്ലോ അമ്മൂ……. അങ്ങനെ വന്നാൽ നിന്റെ നെറ്റിയിൽ ആയിരിക്കുകയില്ലേ വലിയ മുറിവ്……..പിന്നെ പൊട്ടിയ കണ്ണാടിയുടെ ഫ്രെയിമിനുള്ളിൽ ഫ്ലവർവേസിന്റെ ചീളുകൾ  ഉണ്ടായിരുന്നു… അതേപോലെ നിന്റെ കയ്യിൽ കുത്തിക്കയറിയതിലും…..”

“ആ ….. എനിക്കെങ്ങും അറിയാൻ മേലാ….. അന്നേരം….. എനിക്ക്………….. എനിക്ക്……. നല്ല ബോധം ഉണ്ടായിരുന്നില്ല…..നീയിപ്പോ എന്നെ പോലീസ് മുറയിൽ ചോദ്യം ചെയ്യാൻ ഇറങ്ങിയതാണോ നന്ദാ??? ”

ആര്യ തലയുയർത്തി, ദേഷ്യത്തോടെ അവനോട് ചോദിച്ചു.