ഡെറിക് എബ്രഹാം 15 [അഹമ്മദ് ശഫീഖ് ചെറുകുന്ന്] 174

കേരളത്തിലെ അതിർത്തികളിലൊക്കെ വിശ്വസ്തരായ കുറച്ചു പോലീസുകാരെ മധുവങ്കിൾ മുഖേന തയ്യാറാക്കി നിർത്തി… തമിഴ്നാട് അതിർത്തികളിൽ കമ്മീഷണർ ജയന്തിന്റെ സഹായത്താലും പോലീസുകാർ തയ്യാറായി നിന്നു…ശേഷം സേവിയറിനെയും ഗീതയേയും പോലീസ് കണ്ട്രോൾ റൂമിലേക്ക് അയച്ചു…. അവർക്കായി അവിടെ രണ്ട് അതിർത്തികളിലെയും ക്യാമറകൾ വീക്ഷിക്കാനുള്ള സൗകര്യം തയ്യാറാക്കിയിരുന്നു…

സേവിയറും ഗീതയും പോയതിന് ശേഷം ഡെറിക്കും അജിത്തും ചെട്ടിയാരെ കുറിച്ച് കൂടുതൽ അറിയാൻ വേണ്ടിയുള്ള ശ്രമത്തിലായിരുന്നു…

കുറച്ചു സമയത്തിന് ശേഷം കമ്മീഷണറുടെ ഫോൺ വന്നു….

” ഡെറിക്…..ചെട്ടിയാർക്ക് ഒരുപാട് ഗോഡൗണുകളുണ്ട്….പക്ഷേ, താൻ പറഞ്ഞത് പോലെ ഉപയോഗിക്കാതെ ഒറ്റപ്പെട്ടു നിൽക്കുന്ന നാല് ഗോഡൗണുകളാണുള്ളത്….അതും അയാളുടെ പേരിലല്ല…. ബിനാമി പേരിലാണ്… സ്റ്റീഫന് ചെട്ടിയാർ ഉള്ളത് പോലെ ഇയാൾക്കും ഒരുപാട് ബിനാമികളുണ്ട്….”

“സാർ…. അവിടുത്തെ ചുറ്റുപാടുകളൊക്കെ എങ്ങനെ….? ”

“താൻ പറഞ്ഞത് പോലെ തന്നെ…..അടുത്തൊക്കെ തീരെ ആൾത്താമസമില്ലാത്തതാണ് ആ സങ്കേതങ്ങളൊക്കെ….അതിലൊന്ന് കാടിന്റെ അടുത്താണ്…എനിക്ക് കിട്ടിയ റിപ്പോർട്ട്‌ അനുസരിച്ച് ചെട്ടിയാർ പോലും ഒഴിവാക്കിയ സ്ഥലങ്ങളാണ് അതൊക്കെ….അതായത് അയാളോ അയാളുടെ ആൾക്കാരോ ആ ഭാഗത്തേക്ക്‌ തിരിഞ്ഞു നോക്കാറില്ല… ”

“എനിക്ക് വേണ്ടതും അത് പോലെയുള്ള സ്ഥലമാണ്….. ഉറപ്പാണ്…അതിലേതെങ്കിലും സങ്കേതത്തിലേക്ക് തന്നെയായിരിക്കും കുട്ടികളെ കൊണ്ട് വരുന്നത് ”

“എനിക്കും അത് തന്നെയാണ് തോന്നിയത് ഡെറിക് ”