ഡെറിക് എബ്രഹാം 15 [അഹമ്മദ് ശഫീഖ് ചെറുകുന്ന്] 174

അവൻ ഫോൺ വെച്ചിട്ട് , അജിത്തിനോട് ഫോൺ വരുന്നത് ശ്രദ്ധിക്കാൻ പറഞ്ഞ് കമ്മീഷണറുടെ ഓഫീസിലേക്ക് നീങ്ങി…

ഓഫീസിന് മുന്നിലെത്തിയതിന് ശേഷം വാതിലിലൊന്ന് മുട്ടി….

“കയറി വരൂ ഡെറിക്… ഞാനിവിടെയുണ്ട്…”

അവൻ അകത്തേക്ക് കയറി…അവിടെ കമ്മീഷണറെ കൂടാതെ ചില പരിചിത മുഖങ്ങൾ കൂടിയുണ്ടായിരുന്നു…പക്ഷേ, അതൊക്കെ ആരാണെന്ന് പെട്ടെന്ന് മനസ്സിലേക്ക് ഓടി വന്നില്ല…

“ഇതാണ് ഞാൻ പറഞ്ഞ നിങ്ങളുടെ കേസ് അന്വേഷിക്കുന്ന ഡെറിക് എബ്രഹാം IPS…”

അപ്പോഴാണ് ഡെറിക് ആ മുഖങ്ങൾ തിരിച്ചറിഞ്ഞത്…അവൻ സ്ക്കൂളിൽ കണ്ട മുഖങ്ങളായിരുന്നു അതൊക്കെ….

കുട്ടികളുടെ മാതാപിതാക്കൾ…

ഡെറിക്കിനെ കണ്ടപ്പോൾ തന്നെ അതിലൊരു അമ്മ അവനരികിലേക്ക് ഓടി വന്നു….പെട്ടെന്നത് കണ്ടു പകച്ചു നിന്ന അവന്റെ കാലിലേക്ക് വീണു….

“അയ്യോ… എന്താണിത്…. ചേച്ചീ എഴുന്നേൽക്ക്….”

പക്ഷേ അതൊന്നും കേൾക്കാതെ ആ സ്ത്രീ പൊട്ടിക്കരയുകയായിരുന്നു….