ഒന്നും ഉരിയാടാതെ 31 [നൗഫു] 4908

നാജിയുടെ മുഖത്തു നോക്കി എനിക്കിട്ടൊരു പണി തിരിച്ചു തന്നു എന്ന ഭാവത്തില്‍ അവൻ നിർത്തി…

“എന്നാ ഇറങ്ങല്ലേ.. നാജി നീ അങ്ങോട്ട് കുറച്ചു മാറി നിന്നോ.. നീ ഇതിന്റെ ഇടയിൽ പെട്ട് നാളെ അജ്മൽ വരുമ്പോൾ പഞ്ചറായി കിടക്കണ്ട..” 

ജാബിർ വീണ്ടും നാജിയോട് പറഞ്ഞു…

നാജി എന്നിലേക്കു കുറച്ചു കൂടുതൽ ചേർന്നിരുന്നു… എന്റെ തോളിൽ കൈ വെച്ച് കൊണ്ട് വണ്ടി എടുക്കാൻ ആയി പറഞ്ഞു… ഞാൻ ജാബിറിനെ ഒന്നു  നോക്കി ചിരിച്ചു…  

“നാജി.. നിന്നോട് ആണ് പറഞ്ഞത്… ജാബിറിന്റെ ശബ്ദം കുറച്ചു കൂടി..” 

ജാബിര്‍ മുന്നോട്ട് വന്നു എന്റെ ബൈക്കിന്റെ ചാവി ഊരി എടുത്തു.. പക്ഷെ.. നാജി ബൈക്കില്‍ നിന്നും അനങ്ങിയില്ല..

“ഇവൻ നിന്റെ കല്യാണം മുടക്കി എന്ന് പറഞ്ഞാൽ അത് വിശ്വസിക്കാതെ ഇരിക്കേണ്ട കാര്യം ഇല്ല.. ചിലപ്പോൾ സംഭവിച്ചിരിക്കാം.. അമ്മാതിരി പണി അല്ലെ നീ ഇവനിട്ട് വെച്ചത്… അത് വെച്ച് നീ ഇവനെ തല്ലാനാണ് പുറപ്പാട് എങ്കിൽ ഈ നാജിയെ കൂടി തല്ലേണ്ടി വരും…”

നാജി അതും പറഞ്ഞു ഒന്നുകൂടെ എന്നോടു ചേര്‍ന്നിരുന്നു…