ആ രാത്രിയിൽ 1 [പ്രൊഫസർ ബ്രോ] 200

രാജനും ചെറുതായി ഒന്ന് പുഞ്ചിരിച്ചുവണ്ടിയുടെ ഉള്ളിൽ ഇരുന്ന വാക്കി ടോക്കി ചിലച്ചു തുടങ്ങി

“ബഹുമാനപ്പെട്ട ഗതാഗത മന്ത്രിയുടെ വാഹനം ശാന്തിമുക്ക് പിന്നിട്ടിരിക്കുന്നു… ഏത് നിമിഷവും അവിടെ എത്തിച്ചേരാം…”

പിന്നെ ഒട്ടും വൈകാതെ റോഡിൽ വീണുകിടന്ന കുട മടക്കി എടുത്തുകൊണ്ടു രാജൻ ഡ്രൈവിങ് സീറ്റിലേക്ക് കയറി, ഇടത് സൈഡിൽ ദേവനും

“വരുന്നുണ്ട് നാട് ഭരിച്ചു മുടിക്കുന്ന ഒരുത്തൻ… അവന്റെ അച്ഛനും ഇങ്ങനെയൊക്കെ ആയിരുന്നു എങ്കിലും നാടിനു വേണ്ടി എന്തെങ്കിലും ഒക്കെ ചെയ്തിട്ടുണ്ട്…”

രാജന്റെ രോക്ഷത്തോടുള്ള സംസാരം ദേവന്റെ ചുണ്ടിൽ ഒരു ചിരി വിടർത്തി

ദൂരെനിന്നും ഒരു പോലീസ് ജീപ്പിന്റെ സൈറൺ കേട്ട് തുടങ്ങിയതും രാജൻ ബൊലേറോ സ്റ്റാർട്ട്‌ ചെയ്ത് നിർത്തി.

♦️♦️♦️♦️♦️

അവൾ ചുറ്റിനും നോക്കി ,എങ്ങും അന്ധകാരം, അവളെ ഭയം എന്ന വികാരം ഭരിച്ചു തുടങ്ങി … ദൂരെയായി ഒരു വെളിച്ചം കണ്ടതും അവളിൽ ഒരു  പ്രതീക്ഷ ഉടലെടുത്തു

അവൾ ആ വെളിച്ചം കണ്ട ഭാഗത്തേക്ക് ഓടിത്തുടങ്ങി, അടുക്കുന്തോറും ആ വെളിച്ചം അവളിൽ നിന്നും അകലുകയായിരുന്നു.

“മോളെ…”

അവളുടെ ഏട്ടന്റെ വാത്സല്യത്തോടെയുള്ള ആ വിളി അവളുടെ കാലുകളുടെ വേഗത കൂട്ടി

വെളിച്ചം അവളിലേക്ക് അടുത്തുതുടങ്ങി

“മോളെ…”

വെളിച്ചത്തിലേക്കുള്ള ദൂരം കുറയുന്തോറും ആ വിളിയിൽ ഉണ്ടായിരുന്ന ഭാവങ്ങളും മാറുകയായിരുന്നു, ആദ്യം വാത്സല്യമായിരുന്നു എങ്കിൽ ഇപ്പോൾ അത് ഭയത്തോടെയായിരുന്നു

ആ വെളിച്ചത്തിൽ അവൾ ആദ്യം കണ്ടത് മറിഞ്ഞു കിടക്കുന്ന കസേരയായിരുന്നു, അവളുടെ ദൃഷ്ടി പതിയെ മുകളിലേക്ക് സഞ്ചരിച്ചു തുടങ്ങി പിടയുന്ന കാലുകൾ കണ്ടതും അവളുടെ ശ്വാസോച്ഛാസം ഉച്ചത്തിലായി