ആ രാത്രിയിൽ 1 [പ്രൊഫസർ ബ്രോ] 200

രാജന്റെ ശബ്ദം കേട്ട് അവൻ തല പതിയെ ചെരിച്ചു നോക്കി, തന്നെ നോക്കി പുഞ്ചിരിച്ചുകൊണ്ട് നിൽക്കുന്ന രാജനെ കണ്ടതും അവൻ ആ വേദനക്കിടയിലും ഒന്ന് പുഞ്ചിരിച്ചു . അപ്പോഴാണ് അവൻ താൻ കിടക്കുന്നത് ഒരാശുപത്രി കട്ടിലിൽ ആണെന്ന് അറിയുന്നത്”ഞാൻ എങ്ങനെ ഇവിടെ… അല്ല അയാളെ പിടിച്ചോ…”

“ഇല്ല സർ… അയാളെ കിട്ടിയില്ല…,, സർ പോയിട്ട് കുറച്ചു സമയം കഴിഞ്ഞിട്ടും കാണാത്തത് കൊണ്ട് ഞാൻ സർ പോയ വഴിയേ സർനെ തപ്പി വന്നതാ… അപ്പോഴാ ഒരു വെടിയൊച്ച കേട്ടത്…അടഞ്ഞുകിടന്ന ആ വീടിന്റെ ഉള്ളിൽ കയറാൻ ഞാൻ ഒരുപാട് ബുദ്ധിമുട്ടി, ഞാൻ അവിടെ എത്തിയപ്പോൾ കണ്ടത് ബോധം ഇല്ലാതെ കിടക്കുന്ന സർനെയും കുറെ രക്തത്തുള്ളികളും മാത്രമാണ്… ഞാൻ അപ്പോൾ തന്നെ സ്റ്റേഷനിലേക്ക് വിളിച്ചു പറഞ്ഞ് സർ നെ ആശുപതിയിലേക്ക് മാറ്റി… പിന്നെ അവിടെ എന്ത് നടന്നു എന്നറിയില്ല…”

“അപ്പൊ ആ വീട്ടിൽ ആരും ഉണ്ടായിരുന്നില്ലേ…”

“ഇല്ല സർ…”

“വാ രാജേട്ടാ നമുക്കവിടെ വരെ ഒന്ന് പോകാം…”

ദേവൻ കട്ടിലിൽ നിന്നും എഴുന്നേൽക്കാൻ ഒരു ശ്രമം നടത്തി, അതിയായ വേദനമൂലം അവൻ വീണ്ടും കരഞ്ഞു പോയി…

“എന്താ സർ ഈ കാണിക്കുന്നത്… ഇന്നും കൂടി ഇവിടെ കിടന്നിട്ട് നാളെയെ പോകാൻ പറ്റൂ എന്നാണ് ഡോക്ടർ പറഞ്ഞത്… പോയാലും ഒരാഴ്ച തല അധികം അനക്കരുത് എന്നും പറഞ്ഞു…”

“പക്ഷെ രാജേട്ടാ…”

“സംഭവ സ്ഥലത്തേക്ക് സിഐ സർ പോയിരുന്നു, ബാക്കി എല്ലാം അദ്ദേഹം നോക്കിക്കോളും, അതോർത്തു സർ വെറുതെ ടെൻഷൻ അടിക്കേണ്ട…”

രാജന്റെ സ്‌നേഹപൂർവമായ ആ ശാസന അനുസരിക്കുക എന്നതല്ലാതെ അവന്റെ മുന്നിൽ മറ്റു മാർഗം ഒന്നും ഇല്ലായിരുന്നു

“മോനെ… ദേവാ…”