അഭിരാമി Part 10 241

“അമ്മ ന്തിനാ കയയിന്നെ? അമ്മക്ക് ഉവ്വാവ് ആണോ….? ”
ഇതും പറഞ്ഞു മോള് എത്തി പിടിച്ചു കട്ടിലിൽ കയറി എന്റെ നെറ്റിയിലും കഴുത്തിലും തൊട്ട് നോക്കി…. ആ ഒരു മനസിലാവസ്ഥയിലും മോളുടെ ആ പ്രവർത്തി എന്റെ ചുണ്ടുകളിൽ പുഞ്ചിരി വിടർത്തി…..
“അമ്മക്ക് ഉവ്വാവ് ഒന്നും ഇല്ലെന്നേ… മോളെന്താ അമ്മമ്മയോട് കൂട്ടു കൂടാഞ്ഞേ…? അമ്മാമ്മക്ക് വിഷമം ആവില്ലേ…. അമ്മാമ്മക്ക് വിഷമം ആയോണ്ടാ അമ്മയ്ക്കും വിഷമം ആയത്…. ”
“ആന്നോ അമ്മേ….? ആ അമ്മാമ്മക്ക് വിഷമം ആയോണ്ടാന്നോ അമ്മ ക്കും ചങ്കടം വന്നത്? ”
“അതേല്ലോ….. മോള് പോയി അമ്മമ്മയോട് സംസാരിച്ചു ഉമ്മയൊക്കെ കൊടുക്ക് അമ്മാമ്മക്ക്…. കൊടുക്കൂലേ? ”
“കൊക്കാലോ….. ”
ഇതും പറഞ്ഞു മോള് വേഗം ഓടി പോയി…. കതകിന്റെ അടുത്ത് നിന്നപ്പോൾ താഴെ ഹാളിൽ മോളുടെയും വിദ്യയുടെ അമ്മയുടെയും കളിയും ചിരിയും ഒക്കെ കേട്ടു…. അത് കണ്ടപ്പോൾ ഒരൽപ്പം ആശ്വാസം തെളിഞ്ഞു….
കുറച്ചു കഴിഞ്ഞ് അവരൊക്കെ പോകാൻ ഇറങ്ങി… ഭക്ഷണം കഴിക്കാൻ നിർബന്ധിച്ചിട്ടും നിന്നില്ല… വേറെ എന്തോ അത്യാവശ്യം ഉണ്ടെന്ന് പറയുന്നത് കേട്ടു….. വിദ്യയുടെ ഏടത്തിയുടെ മുഖം വലിയ തെളിച്ചം ഒന്നും ഇല്ലെങ്കിലും വിദ്യയുടെ അമ്മയുടെ മുഖത്ത് മോള് കൂടെ ചെന്നതിന്റെ സന്തോഷം കാണാം… എങ്കിലും തന്നോട് മാത്രം വല്യ മൈൻഡ് ഒന്നും കാട്ടിയില്ല…. ചെറിയ വിഷമം ഒക്കെ തോന്നി… എന്നാലും അവരുടെ മനസ്സ്  കൂടി മനസിലാക്കണമല്ലോ….
അവര് പോയതിന്റെ പിന്നാലെ അമ്മ പറഞ്ഞു…
“മോള് വിഷമിക്കണ്ട…. വിദ്യയുടെ ഏട്ടത്തി നല്ല ഏഷണി യാണ്…. അവളുടെ അമ്മ അത്ര പ്രശ്നം ഒന്നുമല്ല… ആ ഏട്ടത്തി എന്തൊക്കെയോ കുത്തി കൊടുത്ത് പേടിപ്പിച്ചിട്ടുണ്ട്.. അതാണ്…. വിദ്യയുടെ അമ്മയുടെ കൂടെ സമ്മതത്തോടെയാ സിധുവിനു കല്യാണം ആലോചിച്ചത് പോലും… മോള് കാര്യമാക്കണ്ട… അതൊക്കെ ശരിയായിക്കൊള്ളും… ”
അമ്മയ്ക്ക് ഒരു പുഞ്ചിരി മറുപടിയായി നൽകി ഞാൻ മോളെയും കൊണ്ട് അകത്തേക്ക് പോയി…..