അപരാജിതൻ 29 [Harshan] 9712

“അനിയാ ,,മോള് പറഞ്ഞതു സത്യമാ ,, ഞാനെന്‍റെ ജീവിതത്തിൽ ഇത്രയും സൗന്ദര്യമുള്ള ഒരു  കുട്ടിയെ , കണ്ടിട്ടില്ല ,, പ്രജാപതി കൊട്ടാരത്തിലെ ഏറ്റവും സുന്ദരി ഇശാനിക കൊച്ചു തമ്പുരാട്ടിയാണ് , ആ തമ്പുരാട്ടിക്ക്  പോലുമില്ല ഈ മോളുടെ അത്രയും സൗന്ദര്യം ,ദേവി ഈ മണ്ണിൽ കാൽ വെച്ച പോലെയാണ് തോന്നിയത്  ”

ആദി തലയാട്ടി

“മാമാ ,,,,,”

“എന്താ വാവേ  ,,”

“വാവ ഒരൂട്ടം പറഞ്ഞോട്ടെ ,മാമാ ,,,?”

‘പറഞ്ഞോ ,,,,”

“മാമൻ ആ ആൻറിയെ മംഗലം കയിക്കാവോ .,,,?”

ആദി ആ ചോദ്യം കേട്ട് ഞെട്ടിപ്പോയി

“വാവേ ,,നീ തല്ലു വാങ്ങിക്കും ,,എന്തൊക്കെയാ ഈ പറയുന്നേ ,,,,?”

കസ്‌തൂരി അവളെ ശാസിച്ചു

“എന്തിനാ മോളങ്ങനെ പറഞ്ഞത് ?” അവൻ ചോദിച്ചു

“ആൻറിയെ വാവക്ക് ഒരുപാട് ഇഷ്ടായി ,, മാമൻ ആൻറിയെ മംഗലം കയിച്ചാ ,,ആ ആൻറി ഇവിടെ ഉണ്ടാവൂല്ലോ ,,അപ്പോ വാവയ്ക്ക് കളിക്കാൻ കൂട്ടാവില്ലേ ,,,,,”

ആദി അവളുടെ നിഷ്കളങ്കയായ സംസാരം കേട്ടു ചിരിച്ചു

“മോളെ ,,അവരൊക്കെ വലിയ ആളുകളാ ,, നമ്മളൊക്കെ ചെറിയ ആളുകളും ,,അതുകൊണ്ടെ അങ്ങനെ മംഗലം കഴിക്കാനൊന്നും  പറ്റില്ലാട്ടോ ,,,,,,”

അപ്പോളേക്കും അവളുടെ കൂട്ടുകാർ അങ്ങോട്ടേക്ക് വന്നു

അവൾ വേഗം അവന്‍റെ മടിയിൽ നിന്നും എഴുന്നേറ്റു അവരുടെ കൂടെ കളിക്കാൻ പോയി

“എന്തൊക്കെയാ ഈ വാവ പറയുന്നത് ,,,,” അവൻ ചിരിച്ചു കൊണ്ട് കസ്തൂരിയെ നോക്കി

“അനിയാ ,,,,,,”

“എന്താ ചേച്ചി ,,,,?”

“ആ കുട്ടിയെ കണ്ടപ്പോൾ അത് തന്നെയാ എന്‍റെ മനസ്ലിലും വന്നത് ,,എന്‍റെ അനിയന് കിട്ടിയിരുന്നെങ്കിലെന്ന് ,, അത്രക്കും നല്ല കുട്ടിയാ ,,നിങ്ങള് രണ്ടു പേരും ഒരുമിച്ചു നിന്നാൽ സാക്ഷാൽ ഉമയും മഹേശ്വരനും  ആണെന്നെ പറയു ,,,,,, അന്ന് രാത്രീ ഞാനതോർത്ത് കിടക്കുകയായിരുന്നു ,എന്‍റെ അനിയനു നന്നായി ചേരുന്ന കുട്ടിയാ ,,,,, ”

“ഒന്ന് പോ ചേച്ചി ,,,,,, നമ്മളെ കണ്ടാൽ അശുദ്ധമാകുന്നവരാ ,,,അപ്പോളാ ,,,,,”

“ആ കുട്ടി അങ്ങനെയുള്ളതാണെങ്കിൽ ഇവിടെ വന്നു നമ്മളോടൊക്കെ സ്നേഹത്തോടെ പെരുമാറുമോ ,, ഈ ശിവശൈലത്തിന്‍റെ ചരിത്രത്തിൽ ആദ്യമായാണ് വലിയ മാളികയിൽ നിന്നും ഒരാൾ അതും ഒരു പെൺകുട്ടി ഇവിടെ വന്നു കരുണയോടെ പെരുമാറിയിട്ടുള്ളത് ,, അതാ പറഞ്ഞത് ,,എന്‍റെ അനിയനു ആ കുട്ടിയെ  കിട്ടിയാൽ അത് പുണ്യമാകും ,,, അത്രക്കും മനസ്സിൽ ആഗ്രഹിച്ചു പോയിരുന്നു,,,”

എല്ലാം കേട്ടു ഒന്നുമറിയാത്തവനെ പോലെ അവ൯ ചിരിച്ചു കൊണ്ടിരുന്നു.

കസ്തൂരി ചേച്ചി , നേരമായതിനാൽ അവിടെ നിന്നും എഴുന്നേറ്റു

അവനോടു യാത്ര പറഞ്ഞു  കുഞ്ഞിനെയും വിളിച്ച്  ഒക്കത്തിരുത്തി വീട്ടിലേക്ക് തിരിച്ചു.

ഗൌരി മോള്‍ ഇടക്ക് അവനെ തിരിഞ്ഞു നോക്കി ഉറക്കെ വിളിച്ച് പറഞ്ഞു.

“മാമാ ,വാവെടെ ,ആന്‍റിയെ മംഗലം കയിക്കനെ “

കസ്തൂരി വേഗമവളുടെ വായ പൊത്തി.

ആദി കുസൃതി വര്‍ത്തമാനം കേട്ട് ചിരിച്ചു കൊണ്ട് അവളെ നോക്കിയിരുന്നു.

 

അവന്‍റെയുള്ളില്‍ അപ്പോളും അടുത്തതായി എന്താണ് ചെയ്യേണ്ടത് എന്നുള്ള ചിന്തയായിരുന്നു.

സമയം മുന്നോട്ട് പോകുകയാണ്.ഇനി കാര്യങ്ങള്‍ വേഗത്തിലാക്കണം . 

ശിവശൈലത്തെ അടിമത്വത്തില്‍ നിന്നും മോചിപ്പിക്കണം.

അതിപ്പോള്‍ പ്രജാപതികളെ ഇല്ലായ്മചെയ്തിട്ടാണെങ്കില്‍ അങ്ങനെ.

സംഹാര൦ മാത്രമാണ് ഇനിയുള്ള മാര്‍ഗ്ഗം

 

(തുടരും)

 

അടുത്തത് വ്യാഴമൊ വെള്ളിയോ പബ്ലിഷ് ആക്കും