💞സ്നേഹ തീരം 5 💞 [ ചെകുത്താനെ സ്നേഹിച്ച മാലാഖ ] [Climax] 670

അവന്റെ കയിൽ കിടന്ന് പിടയുന്നതിനിടയിൽ ബാലചന്ദ്രൻ പറഞ്ഞൊപ്പിച്ചു .

” മരിച്ചുപോലും … എല്ലാം അറിഞ്ഞിട്ടാ ഞാൻ വന്നത് . സത്യം പറഞ്ഞില്ലേൽ …. ”

വിഷ്ണു അതും പറഞ്ഞ് അയാളുടെ കഴുത്തിലെ പിടി ഒന്നു കൂടി മുറുക്കി . അയാൾ ശ്വാസത്തിനു വേണ്ടി കിടന്ന് പിടയാൻ തുടങ്ങി .

“പറയാം …… പറയാം എന്നെ ….. താഴെ ….
.. നിർ … ”

ബാലചന്ദ്രൻ അത് പറഞ്ഞതും അയാളുടെ കഴുത്തിലെ പിടി വിഷ്ണു സ്വതന്ത്രമാക്കി . അയാൾ നിലത്തേക്ക് വീണു . നിലത്ത് എണീറ്റ് ഇരുന്ന് ശക്തിയായി ചുമയക്കാൻ തുടങ്ങി. വിഷ്ണു അയാളുടെ ഷർട്ടിന്റെ കോളറിൽ പിടിച്ച് തൂക്കി എണീപ്പിച്ച് നിർത്തി .

” പറയടാ ….. ”

വിഷ്ണുവിന്റെ ശബ്ദം അവിടെ അലറി മുഴങ്ങി .

” പറയാം …. പറയാം …..
അന്ന് നിന്നെ ഹോസ്പിറ്റലിൽ ആക്കിയ രാത്രി അവളെ പിടിച്ച് കൊണ്ട് വന്ന് ഇവിടെ പൂട്ടി ഇട്ടു … പതിയെ എന്റെ ബിസിനസ് പാട്ണറുടെ മകനുമായി അവളുടെ വിവാഹം നടത്താം അവളെ കെട്ടുന്നവൻ വഴി ഈ സ്വത്തൊക്കെ എനിക്ക് കിട്ടും അതായിരുന്നു പ്ലാൻ . നീ അവളെ കെട്ടിയാൽ എനിക്ക് എല്ലാം നഷ്ടമാകും . എന്നാൽ പിറ്റേന്ന് രാത്രി അവൾക്ക് ആഹാരം കൊടുക്കാൻ വന്ന ജോലിക്കാരിയുടെ തലയ്ക്കടിച്ച് ബോധം കെടുത്തിയ ശേഷം പുറകു വശം വഴി ആരും അറിയാതെ പാർവ്വതി കടന്നു കളഞ്ഞു . അൽപ നേരം കഴിഞ്ഞ ശേഷമാ അവൾ ചാടി പോയ വിവരം ഞാൻ അറിഞ്ഞത് . നിന്നെ തല്ലിയവർ അപ്പോഴും ഇവിടെ ഉണ്ടായിരുന്നു അവന്മാരെ ഞാൻ അവളെ കണ്ടുപിടിക്കാൻ വേണ്ടി പറഞ്ഞയച്ചു പക്ഷെ അവളെ കിട്ടിയില്ല . പിറ്റേന്ന് രാവിലെ അവന്മാർ വന്നു പറഞ്ഞു പാർവ്വതിയുടെ പ്രായം ഉള്ള ഒരു പെൺകുട്ടി അടുത്തുള്ള റെയിൽവേ ട്രാക്കിൽ തിരിച്ചറിയാൻ പറ്റാത്ത രീതിയിൽ മരിച്ച് കിടക്കുന്നു എന്ന് . എനിക്ക് ഒരു സംശയം തോന്നി അന്വേഷിച്ചു ഒടുവിൽ കിട്ടിയ സാഹചര്യ തെളുവുകൾ വച്ച് അത് പാർവ്വതിയാണെന്ന് പോലീസ് പറഞ്ഞു . കാരണം മറ്റാരും അവകാശം പറഞ്ഞ് വന്നിരുന്നില്ല. എനിക്ക് സത്യത്തിൽ സന്തോഷമാണ് ഉണ്ടായത് . മുന്നിലുള്ള തടസ്സം മാറി എന്നുള്ള സന്തോഷം . അങ്ങനെ ആ ശരീരം പാർവ്വതിയുടേത് ആണെന്ന് കരുതി സംസ്കരിച്ചു .

എല്ലാം എന്റെ കൈപ്പിടിയിലായി എന്ന് സമാധാനിച്ച് ഞാൻ ഇരുന്നു പക്ഷെ എനിക്ക് തെറ്റ് പറ്റിപ്പോയി .

പത്രത്തിലെ മരണ വാർത്തയോടൊപ്പം ഉള്ള പാറുവിന്റെ ഫോട്ടോ കണ്ട് ഒരാൾ എന്റെ ഫോൺ നമ്പർ തേടി പിടിച്ച് എന്നെ വിളിച്ചു . പാർവ്വതി ഒരാരാക്സിഡന്റ് പറ്റി അബോധ അവസ്ഥയിൽ ആണ് അവൾ മരിച്ചിട്ടില്ല , തന്റെ കാറാണ് ഇടിച്ചതെന്നും കേസാക്കരുത് അതാ എന്നെ നേരിട്ട് വിളിച്ചത് എന്നും അയാളുടെ തന്നെ ഒരു ചെറിയ ഹോസ്പിറ്റലിൽ ആണ് അവളെന്നും അയാൾ എന്നോട് പറഞ്ഞു .

എനിക്ക് ആകെ ഭ്രാത്ത് പിടിച്ച അവസ്ഥയായി, കാരണം അവൾ ജീവനോടെ ഉണ്ടെന്ന് പുറത്തറിഞ്ഞാൽ എന്റെ കയ്യിലുള സ്വത്ത് മുഴുവൻ നഷ്ടമാകും എന്നാൽ അവളെ തീർത്താൽ അതും പിന്നീട് എനിക്ക് പണിയായി വരും ഒന്നിന് പകരം രണ്ടായി കാരണം പാർവ്വതി ആണെന്ന് കരുതി ഒരു പെൺകുട്ടിയെ ഇവിടെ അടക്കം ചെയ്തതല്ലേ ആ കേസും എന്റെ പേരിൽ വന്നാലോ ……

അതു കൊണ്ട് അവൾ ജീവനോടെ ഉണ്ടെന്ന് പുറത്ത് പറയരുത് എന്നും പറഞ്ഞാൽ അവളെ കാർ ഇടിച്ച് കൊല്ലാൻ നോക്കിയതിന് കേസ് കൊടുക്കും എന്ന് പറഞ്ഞ് അയാളെ ഭീഷണിപ്പെടുത്തി ഞാൻ അവളെ അവിടെ നിന്ന് മാറ്റി . കഴിഞ്ഞ രണ്ടര വർഷമായി ഞാൻ അവളെ ഒരിടത്ത് ആരും അറിയാതെ താമസിപ്പിച്ചിരിക്കുകയാ ……”

അയാൾ ഒരു കിതപ്പോടെ എല്ലാ സത്യങ്ങളും തുറന്ന് പറഞ്ഞു .