ചിങ്കാരി 2 [Shana] 272

” ടീ നിൻ്റെ പരട്ട ചേച്ചിമാർ വാതുക്കൽ തന്നെ ഉണ്ടല്ലോ ” അവൻ പറഞ്ഞു കഴിഞ്ഞതും അഞ്ചുവിൻ്റെ ശബ്ദം അവിടെ മുഴങ്ങികേട്ടു.

“അമ്മേ , ദാ നാടു നിരങ്ങികൾ എത്തി ”

“നീ പോടി ചേച്ചി , ഞാൻ അതുലേട്ടൻ്റെ വീട്ടിൽ പോയതാ ”

“എന്നിട്ടെന്തേ ഇറക്കി വിട്ടോ ”

“ഓ പിന്നേ ഞങ്ങൾ അതുലേട്ടൻ്റെ ഒപ്പം ടി വി ഒക്കെ കണ്ടിരിക്കുവാർന്നു ”

“അത് അതുൽ ഇപ്പോൾ വിളിച്ചു പറഞ്ഞായിരുന്നു ”

“ഓ അപ്പോഴേക്കും ന്യൂസ് ഇങ്ങെത്തിയോ ”

” അവൻ നിന്നെ കൈയിൽ കിട്ടാൻ നോക്കി നിൽക്കുവാ ”

“നന്നായി ” അവൾ മുഖം കോട്ടി പറഞ്ഞു.

അവരുടെ തർക്കം ഉടനൊന്നും അവസാനിക്കില്ലന്ന് മനസിലായപ്പോൾ അവളോട് പറഞ്ഞിട്ട് അജി വീട്ടിലേക്ക് പോയി , രാധമ്മ അടുക്കളയിൽ നിന്നു വന്ന് രണ്ടൊച്ച ഇട്ടപ്പോൾ അച്ചുവും ടോമിയും അകത്തേക്ക് കയറി , നാമജപമൊക്കെ കഴിഞ്ഞപ്പോൾ മുറിയിൽ കേറി വാതിലടച്ചു ലൈബ്രറിയിൽ നിന്നെടുത്ത ബുക്കുമെടുത്ത് വായിക്കാനിരുന്നു .

“ടി നിന്നെ അജി വിളിക്കുന്നു ” അനു വാതിലിൽ വന്നു മുട്ടി

“ഇവൻ പോയിട്ട് കുറച്ചു നേരമല്ലേ ആയുള്ളൂ , ഇപ്പൊ എന്തിനാണാവോ വിളിക്കുന്നത് ” വായന മുടങ്ങിയ ദേഷ്യത്തിൽ അവൾ പിറുപിറുത്തു കൊണ്ടു ലാൻഫോൺ എടുത്തു

” ഹലോ ഞാൻ അച്ചുവാടാ..നീ എന്തിനാ വിളിച്ചെ , ഞാൻ വായിക്കാൻ ഇരിക്കുവായിരുന്നു ”

” നീ അവിടെ വല്ല കഥയും വായിച്ചിരുന്നോ , ഒരു പണി ലോറിയും പിടിച്ചു വരുന്നുണ്ട് ”

“എന്താടാ , നീ ചുമ്മാതെ മനുഷ്യനെ വട്ടാക്കാതെ കാര്യം പറ ”

നമ്മുടെ കഷണ്ടിയുടെ സ്കൂട്ടർ ആക്സിഡൻ്റായി. അജി പേടിയോടെ പറഞ്ഞു.

ഓഹ്.. ദൈവത്തിന്നു സ്തുതി. ഇനി വീട്ടീൽ നിന്ന് ആരേം വിളിക്കണ്ടല്ലോ.അങ്ങേർക്ക് അങ്ങനെ വേണം. അവൾ സന്തോഷത്തോടെ പറഞ്ഞു.

” ടീ നീ അതികം സന്തോഷിക്കണ്ട ഇന്നു കഷണ്ടിക്കു കൊടുത്ത പണി മറന്നോ ഇനി അതാണോ വണ്ടി അപകടത്തിനു കാരണം”

അച്ചു അതു കേട്ടു ഞെട്ടി ” ഇല്ലടാ അതാകില്ല, നീ വെറുതെ എന്നെ പേടിപ്പിക്കാതെ ”

“ടി വണ്ടി എവിടോ പോയി ഇടിച്ചു എന്നാ കേട്ടത് പഞ്ചറാകുമ്പോൾ അതിനുള്ള സാധ്യത ഉണ്ട് ,ഒന്നാമതെ ജാംബവാന്റെ കാലത്തെ വണ്ടിയ എന്തായാലും സാറിപ്പോൾ ഹോസ്പിറ്റലിലാ ”

“ടാ വെറുതെ അല്ലേ പറയുന്നത് , സത്യം പറ ”

” സത്യമാടി നിന്നോട് വെറുതെ ഞാൻ ഒന്നും പറയില്ലല്ലോ പിന്നെ നമ്മൾ വിചാരിക്കും പോലല്ല , കുറച്ചു സീരിയസാണന്നാ കേട്ടെ ”

” നിന്നോടാരാ പറഞ്ഞെ ” അച്ചുവിന് കൂടുതൽ ടെൻഷനായി

“നമ്മുടെ വിനു ഇപ്പോൾ വിളിച്ചു , അവൻ്റെ വീടിനടുത്തല്ലേ സാറിൻ്റെ വീട് , അവൻ പറഞ്ഞതാ ”