ചിങ്കാരി 2 [Shana] 272

അവളുടെ ഏങ്ങലടികൾ ഉയർന്നു വലിയ വായിൽ അവൾ നിലവിളിക്കുന്നതു കണ്ട് സാറിനും വല്ലാണ്ടായി. ഇതിപ്പോ രക്ഷിക്കണോ ശിക്ഷിക്കണോ എന്നറിയാതെ അയാളുടെ മനസ് ഉഴറി.

അജിയുടെ മാനസികാവസ്ഥയും മറിച്ചല്ല സാറിൻ്റെ തീരുമാനം എന്താകുമെന്നായിരുന്നു അവൻ്റെ ഉള്ളിൽ.

അച്ചു മാത്രം ഒരു മാറ്റവുമില്ലാതെ നിലവിളി തുടർന്നു.കരയുന്നതിനിടെ ഓരോന്നും അവൾ പിറുപിറുത്തു കൊണ്ടിരുന്നു.

” ഇയാൾ ആദ്യം അവിടുന്ന് എഴുന്നേൽക്കു , എന്നിട്ട് നമുക്ക് തീരുമാനം ഉണ്ടാക്കാം. എനിക്ക് കാലു വേദനിക്കുന്നുണ്ട്.”

“ഇല്ല സാർ , സാർ ക്ഷമിച്ചുവെന്നു പറയാതെ ഞാൻ മാറില്ല ,സാറിൻ്റെ ശാപം എൻ്റെ തലയിൽ വീഴും പിന്നെ ഒരു കാലത്തും ഞാൻ ഗുണം പിടിക്കില്ല , ക്ഷമിച്ചൂന്ന് പറ സാർ “സാർ അമ്പരന്ന് അവളെ നോക്കി.

അവൾ സാറിൻ്റെ കാലിൽ വലിച്ചുകൊണ്ടേയിരുന്നു

ഇനി ഒരു വേള ഇവൾ വലിച്ച് നിലത്തിടുമോ എന്നായി സാറിൻ്റെ ചിന്ത. ഒരു വഴക്കുപറഞ്ഞതിന് ഇത്രക്കും സമ്മാനം തന്നതാ അപ്പൊ പിന്നെ ക്ഷമ കൊടുക്കാതിരുന്നാൽ ചിലപ്പോൾ അതും ചെയ്യും. വെറുതേ എന്തിനാ അതിനൊരവസരം കൊടുക്കുന്നത് , അതുമല്ല തെറ്റു ചെയ്തിട്ട് ഇത്രയേറെ കരഞ്ഞു മാപ്പു പറഞ്ഞിട്ടും അവളോട് ഞാൻ ക്ഷമിച്ചില്ലങ്കിൽ ഞാൻ അവളുടെ അദ്ധ്യാപകൻ എന്നുള്ളതിൽ എന്തർത്ഥമാ ഉള്ളത് …അയാളുടെ ചിന്തകൾ മാറി മറിഞ്ഞു.

“താൻ എഴുന്നേൽക്ക് ഞാൻ ക്ഷമിച്ചു ഒന്നും മനസിൽ വെച്ചിട്ടല്ലല്ലോ ആർച്ച അങ്ങനെ ചെയ്തത് , തൻ്റെ അറിവില്ലായ്മ കൊണ്ടല്ലേ സാരമില്ല പോട്ടെ ഇതാരും അറിയണ്ട നമുക്കുള്ളിൽ ഇരുന്നാൽ മതി ”

അതു കേട്ടതും അച്ചു കരച്ചിൽ മതിയാക്കി മുഖമൊക്കെ തൂത്ത് അജിയുടെ മുതുകത്ത് തേച്ചു , എന്നിട്ട് സാറിനെ ദയനീയമായി ഒന്നുകൂടി നോക്കി. ഒരുറപ്പിനെന്നോണം വീണ്ടും ചോദിച്ചു.

” സാർ പറഞ്ഞത് സത്യമല്ലേ , എന്നോട് ക്ഷമിച്ചു ന്നുള്ളത് ”

” സത്യമാകുട്ടി , തനിക്ക് വിശ്വാസം ആയില്ലേ , എന്നാലും ഒരു കാര്യം പറയാം തമാശക്ക് പോലും ആരോടും ഇങ്ങനൊന്നും ചെയ്യരുത് ,നമ്മൾ ചിലപ്പോൾ മനസിൽ പോലും വിചാരിക്കാത്ത കാര്യമാവും സംഭവിക്കുക ചിലപ്പോൾ പശ്ചാത്തപിക്കാൻ പോലും അവസരം കിട്ടിയെന്ന് വരില്ല. അതുകൊണ്ട് എന്തു കാര്യം ചെയ്യുമ്പോഴും ഒരിക്കൽ കൂടി ചിന്തിക്കണം , ഞങ്ങൾ നിങ്ങളെ വഴക്ക് പറയുന്നത് നിങ്ങളുടെ നൻമക്ക് വേണ്ടിയാണ് അല്ലാതെ നിങ്ങളോടുള്ള ഇഷ്ടക്കുറവുകൊണ്ടല്ല. നിങ്ങൾ ഞങ്ങളുടെ മക്കളെ പോലെയാണ്. അപ്പോ ശാസിക്കാനും ഞങ്ങൾക്ക് അവകാശം ഉണ്ട് , ഇതൊക്കെ ചിലപ്പോൾ നിങ്ങൾക്ക് ഇപ്പൊ മനസ്സിലാവണമെന്നില്ല ,അത് നിങ്ങളുടെ കുഴപ്പമല്ല നിങ്ങളുടെ പ്രായത്തിൻ്റെ കുഴപ്പമാണ് ഇപ്പൊ സംഭവിച്ചത് സംഭവിച്ചു ഇനി ഇതുപോലുള്ള കുരുത്തക്കേട് കാണിക്കരുത് , നല്ല കുട്ടികളായിരിക്കണം കേട്ടോ ,നിങ്ങളോട് സ്നേഹവും ഇഷ്ടവും മാത്രമേ ഉള്ളൂ ” സാർ അത്രയും പറഞ്ഞു നിർത്തി.

അച്ചുവും അജിയും എല്ലാം മനസിലായന്ന മട്ടിൽ തലയാട്ടി , അപ്പോഴേക്കും സാറിൻ്റെ അമ്മ തിരിച്ചെത്തിയിരുന്നു.

“നിങ്ങൾക്കു പോകാൻ വൈകിയോ മക്കളേ , അവിടെ നല്ല തിരക്കായിരുന്നു അതാ താമസിച്ചത് ”

“ഇല്ലമ്മേ , ഞങ്ങൾ സാറുമായി സംസാരിച്ചിരിക്കുവായിരുന്നു ” അജി പുഞ്ചിരിച്ചു കൊണ്ട് മറുപടി പറഞ്ഞു.

“അയ്യോ ഈ കുട്ടിയുടെ മുഖമെന്താ വല്ലാതിരിക്കുന്നെ എന്തു പറ്റി.മോളു കരഞ്ഞോ ”