ചിങ്കാരി 2 [Shana] 271

രാവിലെ തന്നെ അവരെ കണ്ട ഷോക്കിൽ ആയിരുന്നു അയാൾ , അവരുടെ കണ്ണുനിറച്ചുള്ള നിൽപ്പു കണ്ടപ്പോൾ അയാൾക്ക് പാവം തോന്നി

“സർ എന്തുപറ്റിയതാ ” അജി ചോദിച്ചു

“അതൊന്നും പറയണ്ട ഇന്നലെ ഏതോ തല തെറിച്ച പിള്ളേർ സ്കൂട്ടറിൽ ബബിൾഗം ഒട്ടിച്ചു വെച്ചു , വണ്ടി ഓടിച്ചു കുറച്ചു കഴിഞ്ഞപ്പോഴാ കൈയ്യിൽ അത് ഒട്ടിപ്പിടിച്ചത് സ്കൂട്ടർ നിർത്താതെ തന്നെ അതു കുടഞ്ഞെറിയാൻ ശ്രമിച്ചു അപ്പോഴേക്കും കഷ്ടകാലത്തിന് വണ്ടിയും പഞ്ചറായി , നേരെ പോയി മതിലിലിടിച്ചു വേറൊന്നും പറ്റിയില്ല ഇത്രേ സംഭവിച്ചുള്ളൂ അതു തന്നെ ഭാഗ്യം ”

അച്ചു ദയനീയമായി അജിയെ നോക്കി , അവൻ അവളെ സമാധാനിപ്പിക്കാനെന്നവണ്ണം കണ്ണടച്ചു കാണിച്ചു , അവരുടെ ടെൻഷനടിച്ചുള്ള മുഖം കണ്ടപ്പോൾ സാറിനു പാവം തോന്നി

” എനിക്ക് ഇപ്പോ കുഴപ്പമൊന്നുമില്ല ,നിങ്ങൾ ടെൻഷൻ ആവണ്ട , ഇന്നലെ ചെറുതായി തലകറങ്ങി അതാ അഡ്മിറ്റ് ആക്കിയെ ഇന്ന് വീട്ടിൽ പോകാം ”

അയാൾ അതു പറഞ്ഞപ്പോൾ അജിയുടെ മുഖത്ത് ആശ്വാസം നിഴലിച്ചു , അച്ചു അപ്പോഴും നിറഞ്ഞ കണ്ണുകളുമായി അയാളെ നോക്കി നിന്നു

“നിങ്ങൾ ഇവിടെ നിൽക്കുവല്ലേ ഞാൻ ഈ മരുന്ന് ഒന്ന് വാങ്ങിയിട്ടു വരാം ” അത്രയും പറഞ്ഞ് ആ സ്ത്രീ പുറത്തേക്ക് പോയി

” സാർ ഇപ്പൊ പോയത് ആരാ സാറിൻ്റെ അമ്മയാണോ ” അജി ചോദിച്ചു

“അതെ , ഇതെന്താ അച്ചു ഒന്നും മിണ്ടാതിരിക്കുന്നെ ” അവളുടെ സങ്കടം പിടിച്ചുള്ള നിൽപ്പുകണ്ട് അയാൾ അലിവോടെ ചോദിച്ചു

അവൾ പെട്ടന്ന് അയാളുടെ കാലിൽ പിടിച്ചു എന്നിട്ട് പറഞ്ഞു

“സാർ എന്നോട് ക്ഷമിക്കണം ഞാൻ കാരണമാണ് സാറിനിങ്ങനെ സംഭവിച്ചത് , അങ്ങനെ ചെയ്യാൻ പാടില്ലായിരുന്നു തെറ്റായിരുന്നു , ഇങ്ങനെക്കെ സംഭവിക്കുമെന്ന് കരുതിയില്ല , സോറി സാർ”

ഒറ്റ ശ്വാസത്തിൽ അവൾ പറഞ്ഞു നിർത്തി

അവളുടെ കുമ്പസാരം കേട്ട് സാറിൻ്റെ മുഖം ആകെ വലിഞ്ഞു മുറുകി
ഇനിയെന്തു സംഭവിക്കും എന്നോർത്ത് അജി ഞെട്ടി തരിച്ചു നിന്നു.

“താൻ ആദ്യം കാലിൽ നിന്ന് കൈ മാറ്റിക്കേ , എന്തൊക്കെയാ പറയുന്നത് എന്താ കുട്ടി താൻ ഈ പറയുന്നത്, കുട്ടി എന്തുചെയ്തുന്ന ” സർ കുറച്ചു ദേഷ്യത്തിൽ ചോദിച്ചു

കാലിൽ നിന്നും കൈ മാറ്റാതെ തന്നെ വീണ്ടും അച്ചു കരഞ്ഞുകൊണ്ടേയിരുന്നു. അജി എന്തു ചെയ്യണമെന്നറിയാതെ അവളെയും സാറിനെയും നോക്കി.

” സാർ, ഞാൻ കാരണമാ സാർ ഇപ്പോ ഇവിടെ കിടക്കേണ്ടി വന്നത്, ഒരിക്കലും ഇങ്ങനെ സംഭവിക്കുമെന്ന് ഞാൻ കരുതിയില്ല… ഞാൻ അങ്ങനെ ചെയ്യാൻ പാടില്ലായിരുന്നു…” അച്ചു വലിയവായിൽ നിലവിളിച്ചു പറഞ്ഞു. അവളുടെ കണ്ണുനീരിനൊപ്പം തന്നെ മൂക്കില്നിന്നും ഒഴുകിയ വെള്ളവും എല്ലാം കൂടി സാറിന്റെ കാൽ നനച്ചു ബാക്കി അവൾ പിഴിഞ്ഞ് ഉടുപ്പിലും തേച്ചു

” കുട്ടി മാറിക്കേ എന്താ ചെയ്യുന്നെ , അജി അച്ചുവിനെ പിടിച്ചു മാറ്റ് , ഇയാൾ എന്തൊക്കയാ ഈ പറയുന്നെ ”

അജി ഇതെല്ലാം കണ്ട് വല്ലാത്തൊരവസ്ഥയിൽ ആയിരുന്നു. ഇതിൻ്റെയൊക്കെ അവസാനം എന്താകുമെന്നോർത്ത് അവൻ്റെ തലയാകെ പുകയുകയായിരുന്നു. അച്ചുവിൻ്റെ സങ്കടം കണ്ടപ്പോൾ വേദനയും കൂടെ ദേഷ്യവും അവൻ്റെ ഉള്ളിൽ പതഞ്ഞുപൊങ്ങി അവൻ അച്ചുവിനെ പിടിച്ചു മാറ്റാൻ നോക്കിയെങ്കിലും അവൾ സാറിൻ്റെ കാലിൽ മുറുകെ പിടിച്ചിരുന്നു.

“സാർ ഇന്നലെ വഴക്കു പറഞ്ഞില്ലേ ആ ദേഷ്യത്തിന് ഞാനാ സാറിൻ്റെ വണ്ടിയിൽ ബബിൾഗം ഒട്ടിച്ചത് , ഞാൻ ആണിയടിച്ചു വെച്ചിട്ടാ സ്കൂട്ടറിൻ്റെ ടയർ പഞ്ചറായത് , ഞാൻ അങ്ങനെ ചെയ്യാൻ പാടില്ലായിരുന്നു സാർ കുറച്ചു സമയം വണ്ടി തള്ളി നടന്നോട്ടെ എന്നാ കരുതിയത് അത് ഇങ്ങനെ ആകുമെന്ന് കരുതിയില്ല സോറി സാർ , എന്നോട് ക്ഷമിക്കില്ലേ പ്ലീസ് സാർ.. എന്നോട് ക്ഷമിച്ചൂന്ന് പറ. ”