ചിങ്കാരി 2 [Shana] 272

” നീ കൂടുതലൊന്നും പറയണ്ട ഇവിടെ നിന്നാ മതി, അച്ചൂ ദാ ഇതൊക്കെ ഇങ്ങനെ ഇങ്ങനെ കൈയ്കാര്യം ചെയ്യും അവൾ കൈ ഞൊടിച്ചു കൊണ്ടു പറഞ്ഞു നീ വേണേ കണ്ടു പടിച്ചോ.. ഞാൻ കേറിയിട്ടു വരാം ” അവൾ സ്റ്റാഫ് റൂമിന് അകത്തേയ്ക്കു നടന്നു.

“സർ , റെക്കോർഡ് ” അവൾ സാറിനു മുന്നിൽ ചെന്നു വിനയത്തോടെ പറഞ്ഞു.

” അവിടെ വെച്ചേക്ക് , അല്ല ഇന്നലെ നീ വന്നില്ലല്ലോ എന്തു പറ്റി ” അയാൾ അവളെ തുറിച്ചു നോക്കി.

“സാർ ഭയങ്കര തലവേദന ആയിരുന്നു അതാ വരാഞ്ഞേ. ” അവൾ നഖം കടിച്ചു കൊണ്ട് പറഞ്ഞു.

” ലീവ് ലെറ്റർ എവിടെ ” അതു ചോദിച്ചതും അവൾ ഞെട്ടി, ഷെഫീക്കിനുള്ള പണി ആലോചിച്ച് അവൾ ലീവ് ലറ്ററിൻ്റെ കാര്യം മറന്നു പോയിരുന്നു.

എന്താ നിൻ്റെ വായിൽ നാക്കില്ലേ. സാർ അവൾ മിണ്ടാതെ നിൽക്കുന്നതു കണ്ട് ഉച്ചത്തിൽ ചോദിച്ചു. അതോടെ മറ്റു ടീച്ചർമാരുടെയും ശ്രദ്ധ അവരിലേയ്ക്കായി.

” മറന്നു പോയി സാർ ” അവൾ ഒരു വിധം പറഞ്ഞൊപ്പിച്ചു.

” മറക്കും നിനക്കൊക്കെ വേറെ പലതും ആണല്ലോ ചിന്ത , നിനക്കൊന്നുമല്ല തലവേദന. നിന്നെയൊക്കെ പഠിപ്പിക്കുന്ന ഞങ്ങൾക്കാ, നീയൊക്കെ പഠിക്കാനല്ലല്ലോ കെട്ടിയൊരുങ്ങി വരുന്നത്. രണ്ട് ദിവസം മുന്നേ നീ റോഡിൽ നിന്ന് ചീത്ത വിളിക്കുന്നത് കണ്ടല്ലോ. സാറിൻ്റെ വാക്കുകൾ ഇടുത്തീ പോലെയാണ് അവൾ കേട്ടത്. അവൾക്ക് തൊണ്ട വറ്റിവരളുന്നതു പോലെ തോന്നി.ശബ്ദം പുറത്തേയ്ക്കു വരുന്നുണ്ടായിരുന്നില്ല.

നീ കള്ളം പറയാൻ ഒന്നും ശ്രമിക്കണ്ട. ഞാൻ അവിടെ ഒരു കടയിൽ ഉണ്ടായിരുന്നു. സാധനം വാങ്ങി പുറത്തു വന്നപ്പോഴാ നീ ഒരു ചെറുക്കനെ ചീത്ത വിളിക്കുന്നത് കണ്ടത്. നാളെ നീ വീട്ടിൽ നിന്ന് ആളെ വിളിച്ചോണ്ട് വന്നിട്ട് ക്ലാസിൽ കേറിയാ മതി.

എല്ലാം കേട്ടു തലകുനിഞ്ഞു നിൽക്കാനേ അവൾക്കായുള്ളൂ.

“ഇവിടെ കിടന്നു കറങ്ങാതെ ക്ലാസിൽ പോകാൻ നോക്ക് ” സാർ പറഞ്ഞതു കേട്ടതും അവൾ യാന്ത്രികമായി പുറത്തേയ്ക്കു നടന്നു.

“ടി അയാൾ വല്ലതും പറഞ്ഞോ ” ശോകമടിച്ചു വരുന്ന അച്ചുവിനോട് അജി ചോദിച്ചു. അവൾ ഒന്നും മിണ്ടുന്നില്ലെന്ന് കണ്ട് അജിത്തവളെ കുലുക്കി വിളിച്ചു.

“ടി സാർ എന്താ പറഞ്ഞേ”

“ടാ അയാൾ എല്ലാരുടെയും മുന്നിൽ എന്നെ നാറ്റിച്ചു ,പഠിക്കാനല്ലത്രേ ഞാൻ വരുന്നത് . പോരാത്തതിന് അന്നു ഞാൻ ഒരുത്തനെ ചീത്ത വിളിച്ചില്ലേ. അതു അങ്ങേര് കേട്ടു. വീട്ടീന്ന് ആളെ വിളിച്ചോണ്ട് വരാൻ പറഞ്ഞേക്കുവാ.” അവൾ ദയനീയമായി പറഞ്ഞു.

“നീ വിട്ടുകള ,പോട്ടെ അയാൾ അങ്ങനെ തന്നല്ലേ ”

” ഇല്ലാ ഇന്നയാൾക്ക് എന്തേലും പണി കൊടുക്കണം ഇല്ലങ്കിൽ എനിക്ക് സമാധാനം കിട്ടില്ല. നീ എൻ്റെ കൂടെ നിൽക്കുമോ. ”

” ടീ അതിന് കുട്ടികൾക്ക് കൊടുക്കും പോലെ അയാൾക്ക് കൊടുക്കാൻ പറ്റില്ലല്ലോ ആരേലും അറിഞ്ഞാൽ പിന്നെ ഇവിടം കൊണ്ട് നിൽക്കില്ല സ്കൂളീന്ന് വരെ പുറത്താക്കും ”

“നീ പോടാ പേടിതൊണ്ടാ ഇത് ഞാൻ നോക്കിക്കോളാം ” അവൾ പുച്ഛത്തോടെ പറഞ്ഞു

“ടി അതല്ല ഇതു കൈവിട്ട കളിയല്ലേ അതാ പറഞ്ഞേ ”

“അതു തന്നാ ഞാനും പറഞ്ഞത് നീ പോക്കോളാൻ , ഒരു ചെറിയ സഹായം മാത്രം ചെയ്താൽ മതി രണ്ട് മുള്ളാണി വേണം പെട്ടന്ന് ഒപ്പിച്ചു താ ”