ചിങ്കാരി 2 [Shana] 272

ആ ചോദ്യം കേട്ടപ്പോൾ മൂന്നു പേരും മുഖത്തോട് മുഖം നോക്കി. അവരുടെ നിൽപ്പ് കണ്ട് തന്നെ സാർ പറഞ്ഞു തുടങ്ങി.

“ഞാൻ വീണതു കണ്ടിട്ടുള്ള സങ്കടമാ അമ്മേ , എൻ്റെ ക്ലാസിലെ കുട്ടികളാ , എന്നോട് നല്ല സ്നേഹമാണ് അതാണ് അറിഞ്ഞപ്പോൾ തന്നെ ഓടി വന്നത് ” സാർ ഒരു ചിരിയോടെ പറഞ്ഞു.

അച്ചുവിൻ്റെയും അജുവിൻ്റെയും ശിരസ് കുറ്റബോധത്താൽ കുനിഞ്ഞു.

“അതു സാരമില്ല മക്കളേ , കുറച്ചു ദിവസം കഴിഞ്ഞ് അവൻ സ്കൂളിലേക്ക് വരും നിങ്ങൾ വിഷമിക്കേണ്ട ”

അച്ചുവും അജുവും വിളറിയ ഒരു പുഞ്ചിരി ആ വയോധികയ്ക്ക് സമ്മാനിച്ചു.

“സാർ ഞങ്ങൾ ഇറങ്ങട്ടെ ” അജി സാറിനോട് അനുവാദം ചോദിച്ചു.

“പൊയ്ക്കോ , ഇപ്പോൾ തന്നെ വൈകി. ഇന്നിനി സ്കൂളിൽ ചെല്ലുമ്പോൾ താമസിക്കില്ലേ ”

“ഇവിടെ കേറിയിട്ട് പെട്ടന്ന് പോകാമെന്നാ കരുതിയത് വൈകി ഇന്നിനി പോകുന്നില്ല ” അജി മറുപടി പറഞ്ഞു

“ഞാനില്ലന്നു കരുതി ഉഴപ്പാൻ നിൽക്കണ്ട , ഞാൻ വേണമെങ്കിൽ സ്കൂളിൽ വിളിച്ചു പറയാം നിങ്ങൾ സ്കൂളിലേയ്ക്കു പൊയ്ക്കോ”

“വേണ്ട സാർ , ഇന്നിനി പോകുന്നില്ല ” അച്ചുവിനെ നോക്കിക്കൊണ്ട് അജി പറഞ്ഞു. അവൾ മുഖം കുനിച്ചു നിൽക്കുകയായിരുന്നു അപ്പോഴും.

അവളുടെ മാനസികാവസ്ഥ ശരിയല്ലാ എന്നു മനസിലായതു കൊണ്ട് സാർ പിന്നെ നിർബന്ധിച്ചില്ല ,രണ്ടു പേരും സാറിനോടും അമ്മയോടും യാത്ര പറഞ്ഞിറങ്ങി

” എന്തു നല്ല മക്കളാല്ലേ , ഇന്നും അദ്ധ്യാപകരെ സ്നേഹിക്കുന്ന ഇങ്ങനത്തെ മക്കളുണ്ടല്ലോ ” സാറിൻ്റെ അമ്മ പറഞ്ഞു

“അതെ വളരെ നല്ല കുട്ടികളാണ് , കുറച്ചു കുറുമ്പ് കൂടുതലാണന്നേ ഉള്ളൂ.. എൻ്റെ നിയമോളെപ്പോലെ” സാർ ഒരു നെടുവീർപ്പിട്ടു കൊണ്ട് പറഞ്ഞ് നിർത്തി. അയാളുടെ കണ്ണിലെ നനവ് പടർന്നതു കണ്ട അമ്മ അവർ പോയവഴിയിലേയ്ക്കു നോക്കിയിരുന്നു.

പുറത്തേക്കിറങ്ങിയ അജിയും അച്ചുവും ഒരു ദീർഘനിശ്വാസമെടുത്തു ,പിന്നെ ഒന്നും മിണ്ടാതെ പുറത്തേക്ക് നടന്നു കുറച്ചു കഴിഞ്ഞപ്പോൾ അജി സംസാരത്തിനു തുടക്കമിട്ടു

” ടീ എന്താ അവിടെ സംഭവിച്ചെ , ഞാനാകെ പേടിച്ചു പോയി ”

“ഞാനും ”

” അല്ല നിനക്കിത്രക്ക് സങ്കടമുണ്ടായിരുന്നോ , സാറിനോട് ഇത്രക്കിഷ്ടവും”

” ടാ പകുതി സത്യം പകുതി കള്ളം ” അവൾ ചിരിച്ചു കൊണ്ട് പറഞ്ഞു

” എന്നു വെച്ചാ ” അവൻ അത്ഭുതത്തോടെ ചോദിച്ചു.

“ടാ സാറിൻ്റെ അവസ്ഥ കണ്ടപ്പോൾ സങ്കടമായി , പിന്നെ നമ്മുളെ പഠിപ്പിക്കുന്ന സാറല്ലേ. ഒരിക്കലും നമ്മൾ അങ്ങനെ ചെയ്യാൻ പാടില്ലല്ലോ. സാറ് തിരിച്ചറിഞ്ഞില്ലേലും നമുക്കറിയാല്ലോ തെറ്റ് നമ്മളാ ചെയ്തതെന്ന് അറിഞ്ഞു കൊണ്ടല്ലങ്കിലും അതിനു കാരണക്കാരി ഞാനല്ലേ അതാ മാപ്പു ചോദിച്ചത് ”
അവൾ പറഞ്ഞു നിർത്തി.

“പിന്നെ കള്ളമെന്നു പറഞ്ഞതോ ”